E anaanatae anaˈe ma te aroha i te mau “otare”
1 O Iehova te “metua o te mau otare.” (Sal. 68:5) E itehia to ˈna anaanatae no to ratou vai-maitai-raa i roto i te faaueraa ta ˈna i horoa i mutaa ihora i te nunaa o Iseraela: “Eiaha outou e hamani ino i te vahine ivi, e te otare. Ia hamani ino noa ˈˈe oe i te reira, ia pii mai ratou ia ˈu ra, e faaroo papu ïa vau i ta ratou pii.” (Exo. 22:22, 23) Te vai ra atoa i roto i te ture a te Atua te mau faanahoraa e tauturu ia ratou ia haapao i to ratou mau hinaaro i te pae materia. (Deut. 24:19-21) I roto i te faanahoraa Kerisetiano, ua aˈohia te feia haamori mau e “hamani maitai i te otare e te mau vahine ivi i to ratou ra ati.” (Iak. 1:27) E nafea e pee ai i te anaanatae î i te aroha o Iehova i te feia e paari nei i roto i te hoê utuafare metua otahi aore ra tei amahamaha i te pae faaroo?
2 Te haapiiraa i te pae varua: Mai te peu e e metua otahi outou aore ra e hoa faaipoipo tiaturi ore to outou, peneiaˈe e mea fifi ia haapii tamau i te Bibilia i ǒ outou e ta outou mau tamarii. Teie râ, mea faufaa roa te hoê haapiiraa bibilia tamau e te haavare ore no te tauturu ia ratou ia riro ei taata paari e te faito noa. (Mas. 22:6) Mea faufaa roa atoa te mau aparauraa pae varua e o ratou i te mau mahana atoa. (Deut. 6:6-9) Ia toaruaru outou i te tahi taime, eiaha e tuu. A fariu atu i nia ia Iehova no te ani i te puai e te aratairaa, e a ‘haapii ia ratou e ia paari ma te aˈo a te Fatu ra.’—Eph. 6:4.
3 Mai te peu e e hinaaro outou i te tauturu no te amo i ta outou mau hopoia i roto i te reira tuhaa, a faaite atu i te mau matahiapo. Ma te papu e e horoa ˈtu ratou i te mau manaˈo au ia faaohipa aore ra e tauturu atu ratou ia haamau i te hoê porotarama maitai i te pae varua no to outou utuafare.
4 Te tauturu a to outou mau hoa faaroo: I te senekele matamua, noa ˈtu e ua paari o ˈna i roto i te hoê utuafare o tei amahamaha i te pae faaroo, ua riro o Timoteo ei tavini itoito rahi ia Iehova. Ma te feaa ore e tuhaa rahi ta te mau tutavaraa haapao maitai a to ˈna metua vahine e a to ˈna mama ruau no te haapii ia ˈna i te mau papai moˈa i to ˈna apîraa. (Ohi. 16:1, 2; Tim. 2, 1:5; 3:15) Ua faufaa-atoa-hia râ o ˈna i te amuiraa e te tahi atu mau Kerisetiano mai te aposetolo Paulo, o tei faahiti ia Timoteo mai ta ˈna “tamaiti here e te haavare ore i te Fatu nei.”—Kor. 1, 4:17.
5 Oia atoa i teie mahana, te haa maitai ra te mau taeae e te mau tuahine paari i te pae varua na roto i te anaanataeraa ˈtu ma te aroha i te mau tamaroa e tamahine otare i roto i te amuiraa. Ua ite anei outou i to ratou mau iˈoa? Te paraparau ra anei outou ia ratou i te mau putuputuraa Kerisetiano e i te tahi atu mau taime? A ani ia ratou e poro e o outou. No te aha e ore ai e farii ia ratou e to ratou metua faaroo i te tahi taime i roto i ta outou haapiiraa bibilia utuafare aore ra i roto i te mau taime faaanaanataeraa maitatai? Mai te peu e te faariro ra teie feia apî ia outou mai to ratou hoa, e mea ohie aˈe no ratou ia pee ia outou e e putapû atu â ratou i ta outou mau faaitoitoraa.—Phil. 2:4.
6 Te anaanatae ra o Iehova ma te haavare ore i te mau tamaroa e tamahine otare, e te haamaitai ra oia i ta tatou mau tutavaraa î i te here no te tauturu ia ratou ia farii i te parau mau. E rave rahi o ratou, o tei paari i roto i te hoê utuafare metua otahi aore ra amahamaha i te pae faaroo, e tavini ra i teie mahana ma te taiva ore ei pionie, ei tavini tauturu, ei matahiapo, ei tiaau ratere, ei mitionare aore ra ei melo o te fetii o te Betela. Ia pee tatou taitahi i to tatou Metua i te raˈi ma te imi i te mau ravea “ia mahora” to tatou here no te mau otare!—Kor. 2, 6:11-13.