Pahonoraa i ta outou mau uiraa

◼ Eaha te tia ia tatou ia haamanaˈo mai te peu e e faaohipa tatou i te hoê niuniu paraparau afaifai?

E tauturu mai teie taihaa ia farerei i te hoê taata noa ˈtu eaha te vahi tei reira tatou. Noa ˈtu to ˈna faufaaraa, e tia ia tatou ia vai ara ia ore teie mauhaa ia haafifi ia tatou i roto i ta tatou taviniraa aore ra i te mau putuputuraa Kerisetiano. Te vai ra anei teie haafifiraa?

A feruri na i te faahopearaa e tupu mai ia taˈi ta outou niuniu paraparau afaifai a horoa ˈi outou i te faaiteraa i te hoê taata. Eaha ta te taata e faaroo maira ia outou e nehenehe e manaˈo? Eaha te huru ta outou e vaiiho atu ia faaea outou i te paraparau no te pahono i te niuniu? Papu maitai, eita tatou e hinaaro e rave i te tahi noa ˈˈe ohipa o te nehenehe e haafifi i te tahi atu ia faaroo i te poroi o te Basileia. (Kor. 2, 6:3) No reira, mai te peu e e niuniu paraparau afaifai ta tatou, e tia ia faatanohia te reira ia ore tatou aore ra to tatou mau taeae e faaea i te pororaa.

E mai te peu e te tiai ra tatou a horoa ˈi te tahi atu i te faaiteraa? Mai te peu e ua rave tatou i te taime no te pororaa, eita anei e tia ia tatou ia haamau noa i to tatou feruriraa i nia i tera ohipa? No to tatou faatura i ta tatou taviniraa moˈa, e faaitoito anaˈe i te haapao i ta tatou iho mau ohipa ru ore i te tahi atu taime. (Roma 12:7) Parau mau, eita te reira e opani ia tatou ia faaohipa i te niuniu paraparau no te horoa i te faaiteraa aore ra no te haamau i te hoê farereiraa no tera tumu.

I te tahi aˈe pae, e tia ia tatou ia haapao maitai ia faaohipa tatou i te niuniu paraparau afaifai ia faahoro tatou i te pereoo, no te mea te faaite ra te tahi mau maimiraa e e nehenehe te mau ati pereoo e maraa rahi. E tia ia tatou ia faatura maite i te mau ture o te faataa ra i te faaohiparaa o te niuniu paraparau afaifai e te tereraa o te mau pereoo.

E haere tatou i te mau putuputuraa Kerisetiano e i te mau tairururaa no te haamori ia Iehova e ia haapiihia tatou e ana. I te mea e ua ite tatou i te huru moˈa o teie mau haaputuputuraa, e tia ia tatou ia faatano i ta tatou niuniu paraparau ia ore tatou ia haafifihia, tatou aore ra te tahi atu mau taata i tae mai. Mai te peu e e huti mai te hoê ohipa ru i to tatou ara-maite-raa, e mea au aˈe ia haapao tatou i te reira i rapaeau i te vahi putuputuraa. No te toea, e tia ia tatou ia faaitoito i te haapao i ta tatou iho mau ohipa i te hoê taime ê atu i tei faataahia no ta tatou haamoriraa.—Kor. 1, 10:24.

Mai te peu e e niuniu paraparau afaifai ta tatou aore ra e taihaa eretoroni ê atu, e haapao maitai anaˈe i te faaohipa i te reira ma te tâuˈa ia vetahi ê e ma te faaite e mea faufaa roa na tatou te mau mea pae varua.