E haaputuputu anaˈe i te mau taata no te mau reo atoa

¹ Te tupu tia nei te Parau a te Atua. Te farii nei te taata “no roto i te mau parau atoa o te mau fenua” i te haamoriraa mau. (Zek. 8:23) E nafea te mau Ite no Iehova e tauturu ai i te taata no ‘te mau opu atoa, no te mau nunaa atoa, e no te mau reo atoa’ ia riro ei taata viivii ore i mua ia Iehova, ma te tiaturiraa e ora ˈtu i “te ati rahi”?—Apo. 7:9, 14.

² Te tauturu a te faanahonahoraa a te Atua: Ua rave te Tino aratai i te tahi mau faanahoraa e ia neneihia te mau papai bibilia na roto fatata e 380 reo, ia taa maitai i te taata o te fenua atoa nei te faufaaraa o te parau apî maitai. E ohipa iti rahi ia faaineine e ia nenei i te mau papai na roto i tera rahiraa reo. E tia ia haamauhia te tahi mau pǔpǔ taata huri aravihi e ia horoa ˈtu i te mea e hinaarohia no te huri i te mau papai na roto i taua mau reo ra, neneihia e haponohia ˈtu ai. Na te feia poro taitahi i te Basileia râ e rave i te tuhaa faufaa: te faataeraa i te poroi faaora o te Bibilia i te taata.

³ Te hoê fifi e tia ia faaruruhia: E ere i te mea varavara i teie mahana ia farerei i te mau pǔpǔ taata reo ěê huru rahi. Ia tae te parau apî maitai i taua mau taata ra, te tutava ra te mau tavini a te Atua e rahi noa ˈtura i te haapii i te reo Tinito, Rusia, Paniora aore ra te tahi atu mau reo e paraparauhia i to ratou fenua. Te haapii ra te tahi atu i te reo aparaa rima. I te mau Hau Amui, te vai ra fatata e 2 900 amuiraa e e 240 pǔpǔ o te poro ra na roto e 38 reo taa ê atu i te reo Beretane. Te farii nei vetahi o tei ore i faaroo aˈenei i te parau no nia ia Iehova aore ra o tei ore i ite aˈenei i te Bibilia i te parau mau o te Parau a te Atua.—Roma 15:21.

⁴ E nehenehe anei tatou e haa puai atu â no te faaite i te parau apî maitai i te taata no te tahi atu taˈere o ta tatou tuhaa fenua? (Kol. 1:25) Te poro ra e rave rahi amuiraa i te nunaa taata reo ěê o to ratou vahi. E haapii na mua te feia poro maa taˈo no te horoa i te hoê faaiteraa ohie mai teie: “Ia ora na. Teie te hoê parau apî maitai na oe. [I muri iho, e vaiiho ratou i te hoê api parau aore ra te hoê buka rairai na roto i te reo o te taata.] E parahi.” Mea papu e e haamaitai mai Iehova i teie mau haamataraa haihai.

⁵ E faatae mai te poroi o te Basileia i te mau taata no te mau taˈere e mau reo atoa. E faaohipa anaˈe i te taime maitai no te faaite atu.