Ia riro tatou ei taata faaroo maitai
1 No te faaroo maitai, eita noa e titauhia te haavîraa ia ˈna iho, oia atoa râ te hinaaro e haapii e e haafaufaa i te mea e faaroohia ra. No reira o Iesu i haamataratara ˈi i te faufaaraa e ‘ara i te huru e faaroo ai tatou.’—Luka 8:18.
2 E parau mau iho â râ te reira ia haere tatou i te mau putuputuraa a te amuiraa e i te mau tairururaa. E mau taime tera e tia ˈi ia faaroo maitai. (Heb. 2:1) Teie te tahi mau manaˈo o te tauturu ia tatou ia riro ei taata faaroo maitai i taua mau haaputuputuraa Kerisetiano ra.
◼ E haafaufaa anaˈe i te mau putuputuraa. Tera te hoê o te mau ravea faufaa ‘e haapii ai Iehova’ ia tatou na roto i ta ˈna ‘tiaau haapao maitai.’—Isa. 54:13; Luka 12:42.
◼ E faaineine aˈena anaˈe ia tatou. E hiˈopoa anaˈe i te mau tumu parau e tauaparauhia e e afai anaˈe mai i ta tatou Bibilia e ta tatou iho papai e hiˈopoahia.
◼ I te mau putuputuraa, e rave anaˈe i te tahi tutavaraa taa ê no te haamau i to tatou feruriraa. Eiaha tatou e paraparau atu i te mau taata tapiri aore ra e hiˈo eaha ta te tahi atu mau taata i putuputu mai e rave ra. E tutava anaˈe eiaha e feruri eaha ta tatou e rave ia oti te putuputuraa oia atoa i te tahi atu mau ohipa.
◼ E feruri anaˈe eaha te parauhia maira e e uiui anaˈe e: “Nafea te reira e au ai ia ˈu? I roto i teihea mau tupuraa e nehenehe ai au e faaohipa i te reira?”
◼ E tapaopao poto anaˈe i te mau manaˈo faufaa e te mau irava faahitihia. E tauturu te reira ia tatou ia haamau i to tatou feruriraa i nia i te tumu o te aparauraa e ia haamanaˈo i te mau manaˈo faufaa no te faaohipa i muri aˈe.
3 E haapii anaˈe i ta tatou mau tamarii ia faaroo: E hinaaro te mau tamarii i te hoê haapiiraa pae varua. (Deut. 31:12) I te tau tahito, e tia i “te feia atoa e ite i te parau ia taiohia ra” i roto i te nunaa o te Atua, ia faaroo maitai a taiohia ˈi te Ture. (Neh. 8:1-3) Mai te peu e e pahono te mau metua i te mau putuputuraa e e faaroo maitai mau ratou, peneiaˈe e imi te mau tamarii i te pee ia ratou. E ere i te mea paari ia afai mai i te tahi mau hauti aore ra te tahi mau buka nanaˈo ia ohipa te mau tamarii. E haafifi atoa te mau haereraa e mau hoˈiraa mai faufaa ore i te vahi haumitiraa ia ratou ia faaroo maitai. I te mea e “ua mau roa te maamaa i roto i te aau o te tamarii,” ia rave ïa te mau metua i te mau mea atoa e nehenehe ia parahi noa e ia faaroo ta ratou mau tamarii i te mau putuputuraa.—Mas. 22:15.
4 Ma te riro ei taata faaroo maitai, e faaite tatou e mea paari mau tatou e te hinaaro ra tatou ia ‘tupu te ite.’—Mas. 1:5.