‘Hiˈo-maitai-hia to ratou aravihi’: nafea?
1 No te maraaraa tamau e itehia ra i roto i te faanahonahoraa a Iehova e hinaaro-noa-hia ˈi te mau taeae aravihi o te nehenehe e riro mai ei mau tavini tauturu. Te hinaaro nei te rahiraa o te mau taeae aitâ i nominohia ˈtura, tae noa ˈtu te mau taurearea, ia faaohipahia ratou i roto i te amuiraa. Ia horoahia te tahi mau ohipa hau na ratou, e ite ratou i to ratou faufaaraa e to ratou haereraa i mua. Na mua ˈˈe ratou e amo ai i te mau hopoia rahi atu â, e tia ia ‘hiˈo-maitai-hia [to ratou aravihi].’ (Tim.1, 3:10; MN) Nafea ïa?
2 Te hopoia a te mau matahiapo: Eiaha noa te mau matahiapo e hiˈo e te faaî ra anei te hoê taeae i tei titauhia i te mau tavini tauturu, ia au i te Timoteo 1, 3:8-13, e fafa atoa râ ratou i to ˈna aravihi i te amo i te mau hopoia. E nehenehe ratou e ani i ta ˈna tauturu no te opere i te mau vea e te mau papai, te faaohipa i te mau micro, te atuatu i te Piha a te Basileia, e te tahi atu â. E hiˈo te mau matahiapo nafea oia ia rave i teie mau ohipa. E imi ratou i te mau huru maitatai mai te farii-oioi-raa, te taeraa mai i te hora tia, te rave-noa-raa, te haehaa, te hoê feruriraa rima tauturu e te taairaa au mau e vetahi ê. (Phil. 2:20) E hiˈoraa maitai anei oia i roto i to ˈna huru ahuraa e te faaneheneheraa rouru? E amo mau anei oia i te mau hopoia? E hinaaro te mau matahiapo e ite, i roto i to ˈna “haapao maitai . . . i ta ˈna ohipa, ma te mǎrû o te paari mau ra.” (Iak. 3:13) Te hinaaro mau ra anei oia ia faaohipahia oia i roto i te amuiraa? Te faaroo ra anei oia i te faaueraa a Iesu e ‘faariro i te taata ei pǐpǐ’ na roto i te apitiraa ma te itoito i roto i te taviniraa?—Mat. 28:19; hiˈo Te Pare Tiairaa o te 1 no Setepa 1990, mau api 10-20.
3 Noa ˈtu e aita te Bibilia i haamau i te faito matahiti no te riro mai ei tavini tauturu, te parau ra oia no te mau ‘[tane] e rave ra i te toroa.’ Mea fifi ia feruri e e tano te parau “[tane]” i te mau tamarii aore ra te mau taurearea apî roa, te parau-atoa-hia ra hoi e e vahine e e tamarii paha ta ˈna. (Tim. 1, 3:12, 13; MN) Eiaha ratou ia vî i te mau “hinaaro o te apîraa,” ia ohipa râ ma te haapao maitai, e ei haerea maitai e ei manaˈo haava viivii ore to ratou i mua i te Atua e te taata.—Tim. 2, 2:22.
4 Noa ˈtu e mea faufaa te aravihi, mea faufaa roa ˈtu â râ te hoê huru feruriraa maitai. Te hinaaro ra anei te hoê taata e arue i te Atua ma te haehaa e e tavini i to ˈna mau taeae? E haamaitai ïa Iehova i ta ˈna mau tutavaraa no te haere i mua i roto i te amuiraa.