“Ia vai ara outou”
1 I muri aˈe i to ˈna faahitiraa i te mau ohipa taa ê o te tapao i te mau mahana hopea o teie faanahoraa o te mau mea, ua faaitoito Iesu i ta ˈna mau pǐpǐ ia “vai ara.” (Mar. 13:33, MN) No te aha e tia ˈi i te mau Kerisetiano ia vai ara? No te mea te ora nei tatou i te tau atâta roa ˈˈe o te tuatapaparaa. Eita tatou e nehenehe e taoto i te pae varua. I te na reiraraa, te faaiti ra ïa tatou i te faufaa o te ohipa ta Iehova e horoa maira i teie anotau hopea. Eaha taua ohipa ra?
2 Te ani ra Iehova i ta ˈna mau tavini ia poro i te parau apî maitai no nia i to ˈna Basileia, te ravea otahi no te huitaata, e ati aˈe te fenua atoa nei. Na roto i te turu-maite-raa i te faanahonahoraa a te Atua, e faaite tatou e e Kerisetiano mau tatou o te haapao ra i te tau ta tatou e ora nei e te faufaaraa e tauturu i to tatou taata-tupu ia faaroo i te mau “parau o te ora mure ore ra.” (Ioa. 6:68) E haapapu to tatou apitiraa ma te itoito i roto i taua ohipa faufaa ra e te vai ara ra tatou i te pae varua.
3 Turaihia ia poro: E tia ia noaa ia tatou, te mau Ite no Iehova, i te hoê hiˈoraa maitai no nia i te taviniraa. Na te here i te Atua e te taata-tupu e turai ia tatou ia apiti i roto i te pororaa. (Kor. 1, 9:16, 17) I te na reiraraa, e ora mai tatou e tae noa ˈtu tei faaroo mai ia tatou. (Tim. 1, 4:16) Ia faaoti papu ïa tatou e apiti tamau, ia au i tei maraa, i roto i te pororaa i te Basileia o te Atua, te faatereraa maitai roa ˈˈe ta te huitaata e nehenehe e tiaturi, ma te horoa i te hora rahi roa ˈˈe.
4 Te haapapu ra te hoê manaˈo faufaa ia tatou e mea ru teie taviniraa: e tupu te ati rahi a rohi noa ˈi tatou i roto i taua ohipa ra. I te mea e aita tatou i ite i te mahana e te hora, e tia ïa ia vai ara e ia ineine noa tatou, ma te tiaturi ia Iehova i roto i te pure. (Eph. 6:18) Te parare noa ra te pororaa, ua fatata râ te taime e naea ˈi i te ohipa rahi roa ˈˈe o te tuatapaparaa to ˈna faito teitei roa ˈˈe.
5 E haapao maitai anaˈe i te faaueraa a Iesu e “vai ara.” Mea faufaa roa te reira i teie nei iho â râ. Ia na reira tatou ma te ite e mea ru te tau. I te mau mahana atoa, ia vai ara tatou i te pae varua e ia ohipa tatou i roto i te taviniraa ia Iehova. Oia, ‘e ara tatou e e haapao maitai [noa anaˈe].’—Tes. 1, 5:6; MN.