E taata poro tamau anei outou?
1 I te avaˈe Atete o te matahiti 1998, ua oaoa tatou paatoa i te iteraa e ua naeahia i ǒ tatou nei te hoê numera maitai roa 1 933 feia poro, e faahopearaa ïa o te hoê tutavaraa tahoê e te papu! I te mau avaˈe i muri iho, ua fifihia te tahi feia poro no te ohipa tamau, no te mea, mai reira mai, teie rii te faito au noa, 1 800 feia poro. I roto 12 feia poro, hoê anaˈe i te faito au noa tei ore i faaî i ta ˈna tabula taviniraa i te mau avaˈe atoa. Te manaˈo nei matou e e tauturu te mau faaitoitoraa i muri nei i te faatitiaifaro i teie fifi.
2 Ia ite tatou i ta tatou haamaitairaa: E tia ia mauruuru roa tatou i ta tatou haamaitairaa e faaite i te parau apî maitai o te Basileia ia vetahi ê. E faaoaoa taua ohipa ra i te mafatu o Iehova e e faaite i te eˈa o te ora i te mau taata mafatu haavare ore. (Mas. 27:11; Tim. 1, 4:16) E haamaitai te poro-tamau-raa i to tatou aravihi i roto i te taviniraa e e faatupu i te oaoa e te mauruuru.
3 E tuu anaˈe i ta tatou tabula taviniraa: Te poro nei vetahi ma te ore râ e haamanaˈo i te tuu oioi mai i ta ratou tabula taviniraa. Eiaha roa ˈtu tatou e manaˈo e mea iti roa ta tatou tutavaraa. (Hiˈo Mareko 12:41-44.) Eiaha roa ˈtu tatou e taiâ i te faaite e ua apiti tatou. E faanaho anaˈe i te fare i te hoê mea no te tapao i to tatou taime i roto i te pororaa (ei hiˈoraa, te hoê kalena); e faahaamanaˈo tamau mai ïa te reira i to tatou hinaaro e faaite ma te tano i ta tatou tabula taviniraa i te mau hopea avaˈe atoa.
4 E pûpû anaˈe i ta tatou tauturu: E hinaaro paha te mau amuiraa e hiˈo faahou i ta ratou mau faanahoraa no te turu maite i te feia e ore e manuïa ra i te poro-tamau-raa. E nehenehe te papai parau e te mau taeae faatere i te haapiiraa buka e ani i te turu a te tahi atu feia poro. Mai te peu e e tamarii ta outou aore ra te haapii ra outou i te tahi feia poro bapetizo-ore-hia, a haapii ia ratou ia tuu i ta ratou tabula taviniraa i te mau avaˈe atoa.
5 A haamanaˈo i te aamu ra “Mauruuru no te hoê oraraa roa i roto i te taviniraa a Iehova” e vai ra i roto i Te Pare Tiairaa o te 1 no Atopa 1997. Ua riro Ottilie Mydland, hoê tuahine Norevetia, ei vahine poro tamau hou to ˈna bapetizoraahia i te matahiti 1921. E hitu ahuru ma ono matahiti i muri aˈe, i te 99raa o to ˈna matahiti, ua na ô oia e: “Te oaoa nei au e e nehenehe noâ vau e riro ei vahine poro tamau.” E hiˈoraa maitai to ˈna huru feruriraa no te mau tavini atoa a Iehova!