A ani i te tauturu ta outou e hiaai ra
1 “Fifi ia faaoromai”: e tano mau teie parau Bibilia i te tau ati ta tatou e ora ra. (Tim. 2, 3:1, MN) No reira, eaha ta outou e nehenehe e rave ia farerei outou i te mau mea o te haafifi ra i to outou huru pae varua e ia manaˈo outou e aita ta outou e ravea no te faaruru atu?
2 E hinaaro anei outou e tauaparau i te hoê melo paari i te pae varua o te amuiraa? E nehenehe vetahi e taiâ i te na reira no te mea e huru ê ratou, eita ratou e hinaaro e faaohipa rahi aore ra e manaˈo ratou e aita iho â te hoê taata e nehenehe e tauturu ia ratou. Parau mau, e tia ia tutava tatou i te amo i ta tatou iho mau hopoia ma te maitai roa ˈˈe ia au i ta tatou e nehenehe; teie râ, eiaha roa ˈtu tatou e taiâ i te imi i te tauturu no te mau tuhaa i taaihia i to tatou maitairaa i te pae varua.—Gal. 6:2, 5.
3 Ihea e haamata ˈi: E nehenehe outou e paraparau i to outou taeae faatere haapiiraa buka e e ani i te poro na muri ia ˈna. E ravea ïa ta outou no te faataa ia ˈna i to outou hinaaro e haere i mua i te pae varua. Mai te peu e e tavini tauturu oia, a parau atu e te hiaai ra outou i te hoê tauturu i te pae varua e e ani ïa oia i te mau matahiapo e tauturu ia outou. Aore ra e nehenehe outou e paraparau i te hoê o te mau matahiapo o ta outou amuiraa no nia i te mau mau fifi ta outou e ite ra.
4 Eaha te tauturu ta outou e hiaai ra? Na te hoê mea anei i haaparuparu i to outou itoito? O outou anaˈe anei te rave ra i ta outou mau tamarii i roto i te parau mau? E taata ruhiruhia anei outou o te hinaaro ra i te tauturu? Aore ra no te hoê fifi anei i haaparuparu ai outou? Mea fifi roa ia faaruru i te tau ati ta tatou e ora ra, teie râ, te vai ra te ravea. E nehenehe outou e tauturuhia.
5 Nafea te mau matahiapo e nehenehe ai e tauturu ia outou: Te tapitapi mau ra te mau matahiapo ia vetahi ê. E haapao maitai ratou i to outou mau fifi. Mai te peu e hoê â fifi to te tahi atu feia poro e to outou, e haapao ïa te mau matahiapo i te reira i roto i ta ratou mau haapiiraa e mau ohipa tiai mamoe. Ei ‘aveia no te nǎnǎ,’ ua ineine noa ratou i te ohipa i roto i te oaoa na muri ia outou. (Pet. 1, 5:3) Maoti te mau aˈoraa niuhia i nia i te mau faaueraa tumu Bibilia, e nehenehe teie mau taeae aravihi e tauturu ia maitai ta outou taviniraa e e turu ia outou i roto i to outou oraraa i te mau mahana atoa.—Tim. 2, 3:16, 17.
6 Ua horoa mai Iesu e rave rahi “mau ô taata.” (Eph. 4:8, MN) Te auraa ïa, ua tuuhia mai te mau matahiapo no outou e e nehenehe ratou e tauturu ia outou. “No outou” hoi ratou. (Kor. 1, 3:21-23) Eiaha ïa e taiâ, a paraparau ia ratou. A ani i te tauturu ta outou e hiaai ra.