E o outou, e tae mai anei outou?
1 Ua parau te hoê Ite mea maoro i roto i te parau mau e: “Ia mairi tatou i te mahana matamua o te tairururaa, mea rahi roa ïa te reira!” Eaha ta ˈna e hinaaro ra e parau? E omuaraa te mahana matamua o te hoê tamaaraa rahi i te pae varua i faaineinehia e te faanahonahoraa a Iehova no tatou. (Isa. 25:6) E faaite to tatou taeraa i te haamataraa iho â e te farii ra tatou i te mau manaˈo hohonu o te papai salamo o te na ô ra e: “Oaoa aˈera vau e te feia atoa i parau mai ia ˈu e, [E haere] tatou i nia i te fare o Iehova.”—Sal. 122:1; MN.
2 I vetahi mau tairururaa mataeinaa “Te parau tohu a te Atua” o te matahiti i mairi aˈenei, ua iti roa mai te numera o te feia i tae mai i te Mahana pae i to te Mahana maa e Sabati. Te auraa ïa e e rave rahi mau Ite i ore i fanaˈo i te mau oreroraa parau e faataa ra i te mau manaˈo faufaa roa no nia i te parau tohu. Ua ere-atoa-hia ratou i te auhoaraa maitatai o to ratou mau taeae e tuahine.
3 Eiaha e vaiiho i ta tatou ohipa e na nia ˈˈe i te mau mea atoa: Peneiaˈe aita vetahi e tae mai ra i te Mahana pae no te mea aita ratou e hinaaro ra e ia fifihia ta ratou ohipa. Teie râ hoi, ua ite e rave rahi mau Ite e te hinaaro mau ra ta ratou paoti ohipa e horoa i te hoê mahana faafaaearaa mai te peu e e faaara-oioi-hia oia. Ua putapû te hoê paoti ohipa i te faaotiraa papu a te hoê tuahine pionie e ore e mairi i te hoê noa ˈˈe putuputuraa a te amuiraa e te hoê noa ˈˈe tairururaa; te faahopearaa, ua haere ïa oia i te hoê mahana taatoa o te tairururaa!
4 Eiaha roa ˈtu e manaˈo e eita iho â ta outou paoti ohipa e vaiiho ia outou, e aita e fifi ia ere outou i te hoê mahana o te tairururaa. Ma te hoê tiaturiraa hohonu, a faaineine ia outou no te haapapu ia ˈna ma te aravihi, maoti te mau Papai, no te aha te taeraa i te tairururaa e riro ai ei tuhaa faufaa no ta outou haamoriraa. (Heb. 10:24, 25) I muri iho, a tiaturi taatoa i te mau tǎpǔ a Iehova e a papu maite e e noaa te mau mea materia ta outou e titau ra ia tuu outou i to outou mau hinaaro i te pae varua i te parahiraa matamua.—Mat. 6:33; Heb. 13:5, 6.
5 Mea faufaa roa te iteraa i “te mau mea i hau i te maitai ra.” (Phil. 1:10, 11; Sal. 27:4) E turai te reira ia tatou ia faaineine oioi ia tatou no te fanaˈo i te taatoaraa o taua faanahoraa faufaa roa ra a Iehova. A haamata ma te ore e haamaoro e a faaoti papu e tae mai, o outou atoa, i na mahana tairururaa e toru.