‘A ahu i te huru taata apî’
1 Te oaoa nei te mau Kerisetiano i te iteraa i te parau mau. Te haapii nei tatou eiaha e ora mai te feia o teie nei ao. No te mea “ua atea ê ratou i te ora e au i te Atua,” ua “haapourihia to ratou feruriraa.” (Eph. 4:18, MN) Te haapii nei tatou i te faarue i te mau manaˈo o teie nei ao ma te haapae i te huru taata tahito e ma te ahu mai i te huru taata apî.—Eph. 4:22-24, MN.
2 Ma te feaa ore, e aratai te huru taata tahito i te toparaa i te pae morare, i te viiviiraa e i te poheraa. No reira, te faaitoitohia ra te feia atoa o te faaroo nei i te poroi o te Basileia ia haapae i te riri, te iria rahi, te ino, te tuhi e te mau parau faufau. Te feia o te hinaaro ra e fanaˈo i te aroha o te Atua, e tia ïa ia ratou ia haapae roa ma te ore ïa e haamarirau i te huru taata tahito, mai ta ratou e tatara i te hoê ahu repo.—Kol. 3:8, 9.
3 Te hoê puai apî o te faaoraora i te maramarama: No te ahu mai i te huru taata apî, e tia ia faaapîhia tatou na roto i te puai o te faaoraora i to tatou nei maramarama. (Eph. 4:23) Nafea ïa te hoê taata e nehenehe ai e faaapî i taua puai ra, aore ra huru feruriraa, ia nehenehe to ˈna maramarama e fariu mai i nia i te aveia mau? Ma te faaitoito i te haapii tamau i te Parau a te Atua e ma te feruri hohonu i nia i te mau mea ta ˈna e haapii maira. I muri aˈe, e ô mai te hoê feruriraa apî e e hiˈo oia i te mau mea ia au i ta Iehova e te Mesia e hiˈo ra. E taui tatou i to tatou oraraa ma te ahu mai i te mau huru maitaitai o te Mesia, mai te aroha, te maitai, te haehaa, te mǎrû, te faaoromai e te here.—Kol. 3:10, 12-14.
4 Na roto i te ahuraa mai i te huru taata apî, te faataa ê mai ra ïa tatou ia tatou iho i teie nei ao. Na to tatou huru oraraa e faataa ê ra ia tatou. Te parau nei tatou i te parau mau e te patu nei tatou ia vetahi ê na roto i te hoê huru paraparau viivii ore. Te haavî nei tatou i te iria rahi, te mono nei tatou i te inoino, te tutuô, te tuhi e te mau ino atoa, na roto te mau hotu nehenehe, te mau huru maitatai o te Atua. Te haere nei tatou na nia ˈˈe i tei titauhia no te faaore i te hara. Te na reira nei tatou ma to tatou mafatu atoa.—Eph. 4:25-32.
5 Eiaha roa ˈtu tatou e haapae i te huru taata apî. Aita anaˈe, e ore Iehova e farii i ta tatou nei taviniraa ia ˈna. Ia anaanatae te taata i te parau mau e ia faahanahanahia Iehova maoti to tatou nei huru taata apî e te nehenehe, na ˈna hoi i Hamani i te reira!—Eph. 4:24, MN.