Te mau tiaau o te aratai nei ia tatou: te tiaau i te Haapiiraa o te Taviniraa Teotaratia
1 E matahiapo i roto i te hoê auraa pae varua te tiaau i te Haapiiraa o te Taviniraa Teotaratia o te rohi i roto i te parau e te haapiiraa, o te tia ia tatou ia faatura ˈtu e ia rave tahoê atu tatou e o ˈna. (Tim. 1, 5:17) Eaha ta ˈna mau hopoia?
2 Na ˈna e haapao i te vairaa buka o te Haapiiraa o te Taviniraa Teotaratia i te Piha no te Basileia. E hinaaro oia e faaitoito i te feia atoa o te faaî ra i te mau titauraa no te apiti atu i te haapiiraa. E vai ara oia e ia faaî-maitai-hia te vairaa parau ia nehenehe te mau tumu parau e horoahia ma te nahonaho hau atu i te toru hebedoma na mua ˈtu. E tia ia ˈna ia matau maitai i te amuiraa, te feia haapii tataitahi atoa e to ratou mau aravihi. Noa ˈtu e e tauturu te tahi atu taeae ia ˈna no te faaineine i te porotarama no te haapiiraa, e hiˈopoa oia iho e ia opere-maitai-hia te mau tumu parau.
3 No te haapii ma te aravihi i te haapiiraa, e tia i te tiaau ia faaineine maitai ia ˈna i te mau hebedoma atoa, ma te tuatapapa maitai i te mau tuhaa i faataahia. E tauturu te reira ia ˈna ia faaaraara noa i te amuiraa, no te hiˈopoa mai te peu e ua ohipa-maitai-hia te mau tuhaa atoa e no te haamatara i te mau manaˈo faufaa o te riro ei tuhaa no te faahaamanaˈoraa.
4 I muri aˈe i te mau tumu parau tataitahi, e haapopou te tiaau i te taata haapii e e faataa oia no te aha tera huru oreroraa i ohipa-maitai-hia ˈi aore ra no te aha e tia ia haamaitaihia. Mai te peu e e hinaaro te hoê i te tauturu no te faaineine i ta ˈna mau tuhaa i te haapiiraa, e horoa ˈtu ïa te tiaau aore ra te hoê o ta ˈna i maiti i te reira.
5 Ia faufaa-rahi-hia tatou i te ohipa teimaha e ravehia e te tiaau i te Haapiiraa o te Taviniraa Teotaratia e te tahi atu feia aˈo o te ohipa nei i raro aˈe i ta ˈna faatereraa, e tia ia tatou ia apiti tamau i te haapiiraa. E tia ia tatou ia vauvau atoa i te mau tuhaa atoa i horoahia mai e ia faaohipa i te mau aˈoraa o ta tatou e fanaˈo nei aore ra o tei horoahia i te tahi atu feia haapii. Ia ˈna reira tatou, te haamaitai mǎrû noa ra ïa tatou i to tatou aravihi no te tufa i te poroi o te Basileia i mua i te taata e i tera fare e tera fare.—Ohi. 20:20; Tim. 1, 4:13, 15.