E tia ia tatou ia haere e farerei ia ratou ma te tuutuu ore
1 Ua farii maitai anei outou i te parau apî maitai i te taime matamua a haere mai ai te hoê taata e aparau ia outou? Mai te peu e aita, ua oaoa paha outou i te mea e ua haere mai te mau Ite no Iehova e farerei ia outou ma te tuutuu ore, e tae roa i te taime i farii ai outou e haapii i te Bibilia. Mea maitai roa ia feruri i nia i te reira ia poro anaˈe tatou i roto i ta tatou mau tuhaa fenua na nia iho e nia iho faahou.
2 E taui noa te oraraa o te mau taata. E farerei ratou i te tahi mau fifi apî aore ra te tahi mau tupuraa apî, e ite ratou e te tupu ra te tahi mau ohipa peapea i roto i to ratou mau vahi nohoraa aore ra i roto i te ao nei, e faaruru ratou i te tahi mau fifi i te pae faanavairaa faufaa, aore ra ua tairihia to ratou utuafare na te maˈi aore ra te pohe. E nehenehe te reira e turai ia ratou ia uiui e eaha râ te tumu o teie mau mauiui atoa. E tia ia tatou ia ite e eaha to ratou mau tapitapiraa e ia haapao i te reira ia afai anaˈe tatou i te hoê poroi tamahanahana ia ratou ra.
3 E ohipa faaora: A feruri na i te tahi mau taata faaora i muri iho i te hoê ati. Noa ˈtu e te imi ra vetahi i te mau vahi e mea iti roa te taata e nehenehe e faaorahia, eita ratou e haaparuparu e eita atoa e faaea i te imi no te mea noa ua ite te tahi atu mau taata faaora e rave rahi mau taata o te ora noa ra i te tahi atu vahi. Aita roa ˈtu ta tatou ohipa faaora i oti atura. I te mau matahiti atoa, te ite nei tatou ehia hanere tausani taata o te hinaaro ra e ora ia tae anaˈe mai “te ati rahi.”—Apo. 7:9, 14.
4 “Te taata atoa o te tiaoro i te iˈoa o Iehova ra, e ora ïa.” (Roma 10:13-15, MN) E tia i teie mau parau ia turai ia tatou taitahi ia ite i te faufaaraa ia tamau noa i te poro. Mai te taime matamua a porohia ˈi ta tatou tuhaa fenua, ua paari mai te mau tamarii e ua tae ratou i te hoê faito matahiti e nehenehe ai ratou e feruri maitai i nia i to ratou oraraa no a muri aˈe e te tumu o te ora. Aita tatou e nehenehe e ite e o vai te faaroo mai i te pae hopea. (Koh. 11:6) E rave rahi mau taata o tei patoi hoi i te parau mau na mua ˈtu o tei farii râ i teie nei. Te anihia ra ia tatou, eiaha e haava ˈtu i te taata, ia tamau râ tatou i te horoa i te hoê ravea ia faaroo e ia faaorahia ratou mai roto mai i teie nei ao. Ia au i te hiˈoraa o te mau pǐpǐ matamua a Iesu, e tia ia tatou “ia haere [“tamau,” MN]” i te taata ra e ia faaitoito hua tatou i te faaara i to ratou anaanatae no te poroi o te Basileia.—Mat. 10:6, 7.
5 Te mea e nehenehe â tatou e poro, e tapao ïa te reira no te aroha o Iehova. (Pet. 2, 3:9) Ma te horoa i te ravea i to tatou mau taata-tupu ia faaroo i te poroi ma te tuutuu ore, te tuu ra ïa tatou i te here o te Atua i mua e, i te hoê â taime, te arue ra tatou ia ˈna.