Mea faufaa anaˈe tatou paatoa no te rave i te taviniraa
1 E tia i te pǐpǐ tataitahi a Iesu Mesia ia ite e e mea faufaa roa ta ˈna mau tutavaraa no te turu i te pororaa i te Basileia e i te apitiraa ˈtu i roto. Ua ite o Iesu e e faatupu mai ta ˈna mau pǐpǐ i te mau hotu i nia i te mau faito taa ê. (Mat. 13:23) Noa ˈtu e na te mau pionie itoito e rave rahi e rave nei i te hoê tuhaa rahi o te pororaa, te haapopouhia nei râ te feia atoa o te tamau nei ma te anaanatae rahi i te faahanahana i te Atua ma te horoa i te hotu rahi roa ˈˈe ta ratou e nehenehe.—Ioa. 15:8.
2 Mea faufaa roa te mau tutavaraa a te taatoaraa: Ua tohu Iesu e e faatupu mai te tutava-amui-raa ta ˈna mau pǐpǐ atoa i te mau ohipa rahi aˈe i ta ˈna iho. (Ioa. 14:12) Noa ˈtu e e taotia to tatou iho huru tupuraa i te mea o ta tatou e nehenehe e rave aore ra e farii te reira ia tatou ia horoa rahi i te taime no te pororaa, mea faufaa anaˈe tatou tataitahi no te rave i te taviniraa. O ta Paulo iho â ïa i faahiti e: “Te au-maite-raa o te tino atoa ra, e i ati ai hoi no te maitai o te mau tiaatiraa atoa, e te puai au o te mau vahi atoa ra, tupu aˈera te tino i te rahiraa.”—Eph. 4:16.
3 E nehenehe vetahi e manaˈo e e ere i te mea faufaa roa ta ratou mau tutavaraa. Teie râ, te mea faufaa i mua i te aro o Iehova, ia rave ïa tatou i ta tatou taviniraa ma to tatou nephe atoa. E mea faufaa te mau mea atoa o ta tatou e rave nei no ˈna, e te mauruuru mai ra oia i te reira.—Hiˈo Luka 21:1-4.
4 E tamau anaˈe i te turu i te taviniraa: Te fanaˈo nei tatou paatoa i te haamaitairaa e horoa i te tauturu i te pae materia i te taviniraa na te ao nei. E nehenehe atoa vetahi e apiti tino atu i roto i te mau ohipa e titauhia ra e te taviniraa o te Basileia. E nehenehe tatou tataitahi e tutava i te horoa i te mau pahonoraa faaineine-maitai-hia i te mau putuputuraa e i te apiti i roto i te Haapiiraa o te Taviniraa Teotaratia. Ma te imiraa i te mau ravea no te faaitoito ia vetahi ê, te turu ra ïa tatou na roto i te hoê ravea nehenehe mau i te huru pae varua o te amuiraa, o te tauturu hoi ia ˈna ia rave maitai aˈe i ta ˈna hopoia.
5 Inaha, e mea faufaa anaˈe tatou paatoa no te rave i te taviniraa. Eiaha roa ˈtu hoê taata e manaˈo e e mea faufaa ore o ˈna. Noa ˈtu e e mea rahi aore ra mea iti, te faaite ra ta tatou mau tutavaraa amui no te tavini ia Iehova e tei rotopu tatou i te nunaa haamori mau hoê roa a te Atua. (Mal. 3:18) E ohipa faufaa anaˈe ta tatou tataitahi e nehenehe e rave no te faahanahana ia Iehova e no te tauturu ia vetahi ê ia ite e ia tavini ia ˈna.