Te vai ra anei ‘te hoê tara i roto i to tatou tino’?
1 Te hinaaro mau ra tatou e amo i te faito rahi roa ˈˈe o te maraa ia tatou i ta tatou hopoia oia hoi te pororaa i te parau apî maitai. Eita râ e rave rahi o to tatou mau taeae e tuahine e nehenehe e rave taatoa i te reira, no te mea te tapea ra te mau maˈi aore ra te mau paruparu o te tino ia tavini mai ta ratou e hinaaro. Peneiaˈe e ere i te mea ohie no ratou i te faarururaa ˈtu i te haaparuparuraa, ia ite anaˈe iho â râ ratou i te itoito rahi o vetahi ê i roto i te taviniraa.—Kor. 1, 9:16.
2 Te hoê hiˈoraa no tatou: Ua faaoromai mau â te aposetolo Paulo i “te hoê tara i roto i [to ˈna] tino.” E toru taime to ˈna taparuraa ia Iehova ia tatara i taua haafifiraa mauiui ra, o ta ˈna i faataa mai ‘te melahi a Satani’ o te haavî noa ra ia ˈna. Ua faaoromai noa râ oia e ua tamau maite i roto i te taviniraa. Aita oia i aroha noa ia ˈna iho e aita oia i amuamu noa. Ua horoa taatoa oia ia ˈna iho. Auaa te haapapuraa o ta ˈna i fanaˈo no ǒ mai i te Atua ra i manuïa ˈi oia: “To ˈu nei maitai atire ïa ta oe: ei te paruparu e [“tia,” MN] maitai roa ˈi to ˈu puai.” Ua riro mai te paruparu o Paulo ei puai i to ˈna haapiiraa ia farii i to ˈna huru tupuraa e ia turui i nia ia Iehova e i nia i te varua moˈa no te faaoromai.—Kor. 2, 12:7-10.
3 Nafea ia faaoromai: Te tuu ra anei te paruparu taata nei i te mau otia i nia i ta tatou taviniraa no te Atua? Mai te peu e e, e pee anaˈe ïa i te huru o Paulo. Noa ˈtu e aita iho â e ravea no te arai i to tatou nei maˈi aore ra to tatou nei paruparu o te tino, i roto i teie faanahoraa o te mau mea nei, e nehenehe tatou e tuu i to tatou tiaturiraa taatoa i nia ia Iehova, no te mea ua ite oia i to tatou mau hinaaro e e horoa mai oia ia tatou nei i te “puai tei hau aˈe i tei matauhia ra.” (Kor. 2, 4:7, MN) E haafaufaa anaˈe i te tauturu fanaˈohia e tatou i roto i te amuiraa e eiaha e faaatea ê mai ia tatou. (Mas. 18:1) Mai te peu e e ere i te mea ohie ia poro i tera uputa e tera uputa, e imi anaˈe eaha ta tatou e nehenehe mau e rave no te faaite i te poroi ma te faanaho-ore-hia aore ra na roto i te taniuniuraa.
4 Mai te peu e te faaiti ra te hoê tara i roto i to tatou tino i ta tatou mau ravea i roto i te taviniraa, eiaha tatou e haaparuparu. Mai ia Paulo, e nehenehe atoa tatou e “faaite hua ˈtu i te evanelia ra i te aroha o te Atua ra,” ia au i te maraa i to tatou nei puai e to tatou nei huru tupuraa. (Ohi. 20:24) Eiaha ia moehia ia tatou e, a tutava noa ˈi tatou i te rave faahope roa i ta tatou taviniraa, te faaoaoa ra tatou ia Iehova.—Heb. 6:10.