Te tau o te Oroa haamanaˈoraa: e tano no te ohipa rahi atu â
1. Eaha te faahopearaa o “te mau oroa” i nia i te mau Iseraela e mǎtaˈu ra i te Atua?
1 I te mau taime taa maitai o te matahiti, e faatupu na te mau Iseraela i tahito ra i “te mau oroa a Iehova.” (Lev. 23:2) A rave ai ratou i te taime no te feruri i te maitai o te Atua, ua ite ratou i te oaoa rahi e ua itoito-rahi-hia ratou no te haamoriraa viivii ore.—Par. 2, 30:21–31:2.
2, 3. No te aha e tano ai ia faarahi tatou i ta tatou ohipa pae varua i te tau o te Oroa haamanaˈoraa, e afea te Oroa haamanaˈoraa e tupu ai?
2 Oia atoa, i te mau matahiti atoa, e taime oaoa te tau o te Oroa haamanaˈoraa i reira tatou e faarahi ai i ta tatou mau ohipa teotaratia. E taime maitai tera no te feruri hohonu i te ô faito ore ta Iehova i horoa mai—ta ˈna Tamaiti fanau tahi. (Ioa. 3:16; Pet. 1, 1:18, 19) E turai tera feruriruriraa i te here o te Atua e ta ˈna Tamaiti ia tatou ia arue ia Iehova e ia faaitoito i te rave i to ˈna hinaaro.—Kor. 2, 5:14, 15.
3 I teie matahiti, e faatupu tatou i te Amuraa maa a te Fatu i te Mahana maha 24 no Mati, i muri aˈe i te toparaa mahana. E nafea tatou e nehenehe ai e faarahi i ta tatou taviniraa i na avaˈe Mati, Eperera, e Me?
4, 5. (a) Eaha ta vetahi e rave no te poro e rave rahi atu â taata? (b) Eaha te mau huru pororaa manuïa i ǒ tatou nei?
4 E poro e rave rahi atu â taata: A imi i te mau ravea no te poro e rave rahi atu â taata. E nehenehe anei outou e faanaho e poro na te mau fare i te mau taime to te fare te taata, i te taperaa mahana anei aore ra i te ahiahi? Mai te peu e e hinaaro vetahi melo o ta outou haapiiraa buka e poro hou te haapiiraa, e nehenehe te tiaau no ta outou haapiiraa buka e faanaho i te hoê putuputuraa poto no te taviniraa i roto i te hoê tuhaa fenua tapiri.
5 Te tahi atu ravea no te poro e rave rahi taata, o te pororaa ïa i te mau vahi taata. Ua hinaaro te hoê tuahine i Tapone e riro ei pionie tauturu noa ˈtu e e ohipa taime taatoa ta ˈna. Ua parau te hoê matahiapo ia ˈna e poro na te mau aroâ i pihai iho i te hoê tapearaa pereoo auahi hou oia a haere ai i ta ˈna ohipa. Ua faaitoito oia i te haavî i to ˈna mamahu e te faaruru i te tâhitohitoraa a te tahi feia o te rave i te pereoo auahi o te tuhaa oire, tera râ ua haamau oia i te hoê tapura opereraa vea fatata e 40 taata, to roto atoa te feia o te tuhaa oire, te mau rave ohipa i te tapearaa pereoo auahi, e te mau fatu fare toa tapiri. Ua opere oia i te faito au noa e 235 vea i te avaˈe. Na roto i te faaiteraa i te mau manaˈo bibilia i te taata maa taime noa i te mau mahana atoa, ua nehenehe oia e haamata e ono haapiiraa bibilia.
6. E nafea te feia apî e nehenehe ai e faarahi i ta ratou ohipa pae varua?
6 Te tahi mau taime maitai no te poro: Te fanaˈo nei te feia apî i te tau faaearaa haapiiraa. Tera te taime maitai no te riro ei pionie tauturu. E nehenehe atoa ratou e faarahi i ta ratou taviniraa ma te poro i te fare haapiiraa. E nehenehe outou, te mau Kerisetiano apî, e maere i te anaanatae o to outou mau hoa haapiiraa i ta outou mau tiaturiraa. No te aha e ore ai e faaohipa i te mau hiˈopoaraa aore ra aparauraa e te piha haapiiraa no te poro? A manaˈo atoa i ta tatou mau ripene video. Ua haamata vetahi i te mau haapiiraa bibilia e te mau hoa haapiiraa e ua tauturu ia ratou e tae noa ˈtu i te bapetizoraa. Tera te tahi mau ravea maitai roa no “te haamaitai i te iˈoa o Iehova.”—Sal. 148:12, 13.
7. (a) Mea nafea to te hoê taeae raveraa no te poro? (b) Ua farerei ê na anei outou i tera tupuraa?
7 A imi i te mau ravea no te paraparau no nia i to tatou Atua taa ê roa e ta ˈna mau parau fafau faahiahia i te feia ta outou e farerei i te roaraa o te mahana. Ia tano, e poro te hoê taeae o te rave i te hoê â pereoo auahi i te mau mahana atoa i te mau horopatete. Ei hiˈoraa, a tiai ai oia i te hoê tapearaa pereoo auahi, ua poro oia i te hoê tane apî i te mau mahana atoa e pae minuti i te maoro. Ei faahopearaa, ua farii te tane apî e to ˈna hoa i te hoê haapiiraa bibilia, haapiiraa o te faaterehia i roto i te pereoo auahi. Tau taime i muri aˈe, ua ani atoa te hoê vahine ruhiruhia o tei faaroo i ta ratou aparauraa i te hoê haapiiraa bibilia e mai reira mai, te haapii atoa ra oia i te mau mahana e rave ai oia i te pereoo auahi. Mea na reira to te taeae haapiiraa e hoê ahuru taata taa ê i roto i te pereoo auahi.
8. Eaha te huru pororaa e nehenehe ai te feia taotiahia e te matahiti rahi aore ra te maˈi, e faarahi i ta ratou apitiraa i roto i te taviniraa?
8 Te taotiahia ra anei outou e te matahiti rahi aore ra te maˈi? E ere ïa mai te huru ra e eita ta outou e nehenehe e arue atu â ia Iehova. Ua tamata ê na anei outou i te poro na roto i te niuniu paraparau? Mai te peu e aita outou i ite maitai e nafea ia rave i tera pororaa, a parau atu i te tiaau no ta outou haapiiraa buka. E nehenehe oia e ani i te tahi feia poro aravihi i roto i tera huru pororaa ia tauturu ia outou. Ia haa amui outou, e nehenehe outou e haapii e e tauturu te tahi i te tahi ia aravihi atu â. Te vai ra te tahi mau manaˈo tauturu maitai no nia i te pororaa na roto i te niuniu paraparau i roto i Ta tatou taviniraa i te Basileia no Fepuare 2001, api 5-6.
9. E nafea tatou e nehenehe ai e tauturu i te mau piahi Bibilia ia apiti i te taviniraa i mua i te taata e te amuiraa?
9 E nehenehe te haereraa i te Oroa haamanaˈoraa e faaitoito i te mau melo apî ia faarahi atoa i ta ratou arueraa ia Iehova. Mai te peu e e taiâ rii ratou ia poro ma te faanahohia, a tamǎrû ia ratou ma te faatia i te tahi mau tupuraa faaitoito e ma te haapii ia ratou ia faataa i te mau haapiiraa bibilia e ia parau, aore ra paruru, i to ratou faaroo. (Pet. 1, 3:15) Ia hinaaro hoê o ratou e poro i te parau apî maitai, a faaite atu i te tiaau peretiteni. E faanaho oia e farerei i te piahi no te hiˈo e te faaî ra anei oia i te mau titauraa no te apiti i te taviniraa i mua i te taata e te amuiraa. Eaha râ paha Iehova i te oaoa i te iteraa i tera mau melo apî ia turu i to ˈna mana arii o te ao taatoa!—Mas. 27:11.
10. (a) E nafea te hoê porotarama maitai e tauturu mai ai ia riro ei pionie tauturu? (b) Ua nehenehe anei outou e riro ei pionie tauturu i te matahiti i mahemo i te tau o te Oroa haamanaˈoraa? Eaha ta outou i rave?
10 E nehenehe anei outou e riro ei pionie tauturu? E mea maitai ia feruri-maite-hia te fa e 50 hora o te taviniraa pionie tauturu. (Mat. 5:37) E tuea ïa i te faito au noa 12 hora pororaa i te hebedoma. E tano anei hoê o na hohoˈa porotarama i te api 5 i to outou tupuraa? Mai te peu e eita, e nehenehe anei outou e faanaho i te hoê porotarama ê atu no te riro ei pionie tauturu i Mati, Eperera, aore ra Me? A ani ia Iehova ia haamaitai i ta outou mau tutavaraa i te faarahi i ta outou ohipa.—Mas. 16:3.
11. E nafea te mau matahiapo e te mau tavini tauturu e turu ai i te mau pionie tauturu?
11 E turu roa te mau matahiapo e te mau tavini tauturu i ta outou mau tutavaraa i te faariro i te tau o te Oroa haamanaˈoraa ei tau arueraa taa ê ia Iehova. Mea rahi paha o ratou o te riro ei pionie tauturu. Ia hinaarohia, e faanaho te mau matahiapo i te mau putuputuraa hau no te taviniraa, i te taperaa mahana anei, i te ahiahi aore ra i te hopea hebedoma. No te faataa ihea e afea e faatupu ai i tera mau putuputuraa e o vai te haapao i te reira, e nehenehe te mau matahiapo e paraparau e te feia tei faaoti ê na (aore ra e manaˈo noa ra) e riro ei pionie. E e faataa ratou i te hora e nehenehe ai te tahi atu feia poro e apiti ia outou i te mau taime ta outou i faanaho no te pororaa. Mea na reira e papu maitai ai te mau porotarama e e ravehia ˈi te hoê ohipa maitai roa.—Mas. 20:18.
12. Eaha te turai ia tatou ia arue ia Iehova ma te ore e faaea?
12 A faaitoito: Ia ore to outou tupuraa e faatia ia outou ia riro ei pionie tauturu, a haamanaˈo e e farii Iehova i ta tatou mau tutavaraa e haapaeraa e rave ia au ‘i ta tatou i noaa eiaha i tei ore i noaa.’ (Kor. 2, 8:12) Mea rahi roa te mea e haamauruuru ai tatou ia Iehova! Ua tano roa Davida i te papairaa e: “E haamaitai â vau ia Iehova e ore e faaea; ia vai tamau maite â te haamaitai ia ˈna i roto i to ˈu nei vaha.” (Sal. 34:1) Tera atoa ta tatou faaotiraa i te tau o te Oroa haamanaˈoraa!
[Tumu parau tarenihia i te api 3]
E nafea outou e faarahi ai i ta outou ohipa?
◼ Ma te poro i te taime tei te fare te taata
◼ Ma te poro i te mau vahi taata
◼ Ma te poro i ta outou vahi raveraa ohipa aore ra i te fare haapiiraa
◼ Ma te poro na roto i te niuniu paraparau
◼ Ma te riro ei pionie tauturu
[Tapura i te api 3]
Hohoˈa porotarama no te taviniraa pionie tauturu no te poro 12 hora i te hebedoma
Poipoi—Monire e tae atu i te Mahana maa
E nehenehe te Tapati e mono i te tahi atu mau mahana.
Mahana Taime Hora
Monire poipoi 2
Mahana piti poipoi 2
Mahana toru poipoi 2
Mahana maha poipoi 2
Mahana pae poipoi 2
Mahana maa poipoi 2
Taatoaraa hora: 12
Piti mahana taatoa
Piti mahana o te hebedoma (Tei te mahana i maitihia, e 48 noa hora)
Mahana Taime Hora
Mahana toru mahana taatoa 6
Mahana maa mahana taatoa 6
Taatoaraa hora: 12
Piti ahiahi e te hopea hebedoma
Piti ahiahi o te hebedoma
Mahana Taime Hora
Monire ahiahi 1 h 30
Mahana toru ahiahi 1 h 30
Mahana maa mahana taatoa 6
Tapati afa mahana 3
Taatoaraa hora: 12
Toru taperaa mahana e Mahana maa
E nehenehe te Tapati e mono i te tahi atu mau mahana.
Mahana Taime Hora
Monire taperaa mahana 2
Mahana toru taperaa mahana 2
Mahana pae taperaa mahana 2
Mahana maa mahana taatoa 6
Taatoaraa hora: 12
Ta ˈu iho porotarama pororaa
A faaoti i te rahiraa hora no te taime taitahi.
Mahana Taime Hora
Monire
Mahana piti
Mahana toru
Mahana maha
Mahana pae
Mahana maa
Tapati
Taatoaraa hora: 12