‘E faaitoito hua’
1 I to tatou pûpûraa ia tatou no Iehova, ua tǎpǔ tatou e horoa na ˈna i ta tatou tuhaa maitai roa ˈˈe. No reira, ua faaue te aposetolo Petero i te mau Kerisetiano ia faaitoito hua no te haapaari i to ratou mau taairaa e o Iehova. (Pet. 2, 1:10) Te hinaaro mau nei tatou e faaitoito hua no te faaoaoa ia Iehova na roto i te taviniraa ia ˈna i teie nei iho. Eaha ïa te auraa? Ia hohonu noa ˈtu â to tatou mau taairaa e o Iehova e ia feruri maite tatou i nia i te mau mea atoa o ta ˈna i rave no tatou nei, e turai to tatou mafatu ia tatou ia rave noa i te tuhaa maitai roa ˈˈe i roto i ta ˈna taviniraa. E hinaaro ïa tatou e haamaitai i te huru o ta tatou taviniraa e, mai te peu e e nehenehe, i te rahiraa.—Sal. 34:8; Tim. 2, 2:15.
2 Ua itea ihora i te hoê taeae apî o tei hinaaro e rave hau atu â i roto i te taviniraa, e ua faarahi to ˈna haapii-tamau-raa i te Parau a te Atua i to ˈna mauruuru ia Iehova, e ua horoa atoa mai i te itoito rahi aˈe. Na te reira i turai ia ˈna ia faaî i te hoê aniraa no te taviniraa pionie. Ua faaohipa te hoê tuahine, mea fifi roa hoi no ˈna ia paraparau i te mau taata ta ˈna i ore i matau, i te tahi mau omuaraa parau a te buka ra Haaferuriraa (Farani), e ua nehenehe atura oia e manuïa oioi noa i roto i te taviniraa. Ua haapii oia i te Bibilia e te tahi feia faaipoipo o tei farii i te parau mau.
3 A oaoa i tei maraa ia outou: Te farerei nei vetahi i rotopu ia tatou nei, i te mau fifi mai te maˈi anei, te patoiraa a te fetii, te veve aore ra te tâuˈa ore o te taata i roto i te tuhaa fenua. E rave rahi atu â mau tupuraa matauhia i teie mau mahana hopea, o te nehenehe e haafifi i ta tatou taviniraa. (Luka 21:34; Tim. 2, 3:1) Te auraa anei ïa e aita tatou e tapea ra i ta tatou i euhe ia Iehova? Aita, mai te peu e te rave ra tatou i tei maraa ia tatou i roto i ta ˈna taviniraa.
4 Eita e tano e ia haava tatou ia tatou iho ma te hiˈo i ta vetahi ê e nehenehe e rave. Area ra, te faaitoito nei te mau Papai ia tatou tataitahi ia ‘hiˈopoa maite i ta ˈna ihora ohipa.’ Mai te peu e e pûpû tatou ia tatou taatoa ia au i tei maraa ia tatou iho, e farii mai ïa o Iehova ia tatou e e oaoa atoa tatou.—Gal. 6:4; Kol. 3:23, 24.
5 Ia haapao tatou i te mau parau a Petero e tia ˈi, e ‘ia faaitoito tatou, e haapapu hua ia roohia mai tatou e te Atua ma te hau, ma te porao ore e te hapa ore.’ (Pet. 2, 3:14) Na teie haerea e faatupu mai i te peapea ore e te hau o te feruriraa ta Iehova anaˈe e nehenehe e horoa mai.—Sal. 4:8.