E te mau taurearea, eaha ta outou mau fa i te pae varua?
1 Ua ite o Iehova e e faatupu te hoê ohipa anaanatae e te mau fa e naeahia, i te oaoaraa. (Hiˈo i te Genese 1:28; 2:15, 19.) I teie nei tau, ua horoa mai oia na ta ˈna mau tavini i te hopoia e poro e e haapii i te taata. E ta tatou fa hopea roa, o te ora mure ore ïa i roto i te Paradaiso. A tiai noa ˈtu ai, e tia ia tatou ia haamau i te mau fa tamau i te pae varua, mai te peu e e hinaaro tatou e faahoona maitai i to tatou puai e ta tatou mau ravea.—Kor. 1, 9:26.
2 Te mau fa papu no te mau taurearea: E tia i te mau taurearea ia haamau i te mau fa teotaratia ia au i tei maraa ia ratou. (Tim. 1, 4:15) Ua naeahia i te tahi mau tamarii i te fa e tamau aau i te iˈoa o te mau buka atoa o te Bibilia hou ratou e ite ai i te taio. Na roto i te haapiiraa utuafare, te haapii nei te tahi mau tamarii i te faaineine i te mau putuputuraa ia nehenehe ratou e horoa i te mau pahonoraa feruri-maitai-hia e e tapao i to ratou iˈoa i te Haapiiraa o te Taviniraa Teotaratia. Ia haere ratou e poro na muri iho i to ratou mau metua, e haapii ratou i te rave i ta ratou tuhaa i roto i te ohipa faaiteraa e e haere atoa ratou i mua no te riro mai ei feia poro bapetizo-ore-hia. E mea maitai ia paraparau tamau noa te mau metua i ta ratou mau tamarii no nia i te fa e pûpû ia ratou e bapetizo atu ai.
3 Mai te peu e e taurearea outou, eaha te mau fa pae varua o ta outou i haamau? ‘E haamanaˈo i tei Hamani ia outou’ na roto i te haamauraa i to outou feruriraa i nia i te mau fa faufaa mau i roto i te oraraa. (Koh. 12:1; Sal. 71:17) No te aha e ore ai e riro ei pionie tauturu i te tau faaearaa haapiiraa? Ua feruri anei outou e rave i te taviniraa ma te taime taatoa ei pionie tamau? E nehenehe anei outou e haapii i te hoê reo e paraparauhia ra i roto i ta tatou tuhaa fenua, ia nehenehe outou a muri aˈe e turu i te hoê pǔpǔ aore ra i te hoê amuiraa i to outou vahi aore ra i te vahi ê? I rotopu i te mau taeae e te mau tuahine e tavini nei i te Betela, aore ra ei mau tiaau ratere e ei mau mitionare, e rave rahi o tei haamau i te fa no te taviniraa ma te taime taatoa, i te tau a haere noa ˈi ratou i te haapiiraa. No te aha outou e ore ai e na reira atoa?
4 E te mau taurearea, a tutava i te pee i te hiˈoraa o Iesu. I te 12raa o to ˈna matahiti, ua matau aˈena oia i te paraparau no nia i te mau tumu parau pae varua. (Luka 2:42-49, 52) Ia haamau outou i te mau fa maitatai o te faaitoito ia outou ia rave i te haapiiraa tataitahi, ia taio i te Bibilia i te mau mahana atoa e ia maimi i te amuimuiraa o te mau Kerisetiano paari i te mau putuputuraa e i roto i te pororaa, e fanaˈo ïa outou i te hoê faaineineraa o te tauturu ia outou ia haapii ia vetahi ê no nia i te Basileia o te Atua, mai ta Iesu atoa i rave na.