Pahonoraa i ta outou mau uiraa

◼ Eaha te rave ia tupu mai te hoê ati o te haafifi roa ra i to tatou mau taeae?

Ia tupu anaˈe te hoê ati i to outou fenua: Eiaha e mǎtaˈu rahi. A vai hau noa e a haamau i to outou feruriraa i nia i te mea faufaa roa ˈˈe: te ora, eiaha te mau taoˈa materia. A horoa ˈtu i te tauturu i te pae tino e hinaaro-oioi-hia ra e to outou utuafare. I muri iho, a faaara i te mau matahiapo e eaha to outou huru tupuraa e teihea roa outou.

E tiaraa faufaa roa ta te mau matahiapo e te mau tavini tauturu e hauti i roto i te faanahoraa i te tauturu. Mai te peu e ua faaarahia e e tupu te hoê ati, mai te mau vero puai anei, ia ite papu ïa i teie mau taeae e tei te mau vahi paruruhia te taatoaraa, e mai te peu e e taime to ratou, e haere ratou e tii i te maa e e opere i te reira.

I muri iho, e tia i te mau taeae faatere i te haapiiraa buka ia ite i te vahi to reira te utuafare tataitahi, e ia aniani e mea maitai anei ratou. E tia ia faaarahia i te tiaau-peretiteni aore ra i te tahi atu matahiapo, e eaha te huru tupuraa o te utuafare tataitahi, noa ˈtu e mea maitai ratou. Mai te peu e ua pepe te tahi taata, e tutava te mau matahiapo i te rave i te mau faanahoraa ia rapaauhia oia. E horoa atoa ratou i te mau taoˈa materia atoa e hinaarohia: mai te maa anei, te ahu, te hoê tamârû aore ra te mau taoˈa na te utuafare. (Ioa. 13:35; Gal. 6:10) E horoa te mau matahiapo no reira i te hoê turu i te pae varua e i te pae morare i te amuiraa, e ia nehenehe anaˈe, e tutava ratou i te faanaho faahou i te mau putuputuraa. I muri aˈe i te hoê hiˈopoa-maite-raa o te huru tupuraa, e tia i te hoê matahiapo, no te tino matahiapo, ia faaara i te tiaau haaati no te faaite atu e te vai ra anei te feia i pepe, te mau ohipa i parari i te Piha no te Basileia, aore ra i te mau fare o te mau taeae, e te mau hinaaro taa ê. E taniuniu ïa te tiaau haaati i te amaa no te faaite i te huru tupuraa. Mai te peu e e tia ia ravehia te mau ravea rahi atu â, na te amaa ïa e faanaho i te tauturu.

Ia tupu anaˈe te hoê ati i te tahi atu fenua: E haamanaˈo ïa tatou i to tatou mau taeae e mau tuahine i roto i ta tatou mau pure. (Kor. 2, 1:8-11) Mai te peu e te hinaaro ra tatou e tauturu ia ratou i te pae moni, e nehenehe tatou e hapono i ta tatou mau ô i te Taiete ra, te vai ra ta ˈna te hoê tuhaa moni tauturu i faataahia no te reira. Teie te vahi faaearaa: Association Les Témoins de Jéhovah, B.P. 7715, 98719 Taravao. (Ohi. 2:44, 45; Kor. 1, 16:1-3; Kor. 2, 9:5-7; hiˈo i Te Pare Tiairaa o te 1 no Titema 1985, api 20-2 [Farani].) Eiaha e hapono i te mau tauihaa e te mau taoˈa materia i te tuhaa fenua e fifihia ra, taa ê noa ˈtu e ua ani roa te mau taeae e faanaho ra i te tauturu, ia outou ia na reira. E horoahia ïa te tauturu ma te nahonaho, e e opere-maitai-hia te mau taoˈa. (Kor. 1, 14:40) Eiaha e taniuniu i te Taiete ma te faufaa ore, no te mea e nehenehe te reira e faaapǐapǐ i te mau reni niuniu faufaa, ia taniuniu mai te tuhaa fenua e fifihia ra.

I muri aˈe i te ite-maitai-raa i te huru tupuraa, e faaoti te Taiete e mea faufaa anei ia faanaho i te hoê tomite tauturu. E faaarahia ïa te mau taeae e haapao i taua hopoia ra. E tia i te taata tataitahi ia turu amui i te mau matahiapo e faatere ra i te mau ohipa, ia haamâhahia te mau hinaaro o te mau taeae atoa ma te au.—Hiˈo i te buka ra Te mau Ite no Iehova—Feia poro i te Basileia o te Atua, api 310-15 (Farani).