Na vai e faaroo i ta tatou poroi?
1 Mai tei ore i itehia aˈenei, mea rahi te mau haamaramaramaraa e pûpûhia nei i te taata, mea papu ore hoi te rahiraa, e mea haavare atoa. No reira, e rave rahi taata o tei ohipa roa, e mea fifi atura no tatou ia aratai ia ratou ia faaroo i te poroi o te Basileia o te Atua. Aita ratou e ite ra i te maitai e noaa mai ia faaroo ratou i te Parau a te Atua.—Luka 11:28.
2 Te oaoa nei tatou i te iteraa e, i roto e rave rau fenua o te ao nei, e mau ahuru tausani taata o te faaroo nei i teie poroi e o te farii nei i te haapii i te Bibilia. Teie râ, i roto i te tahi atu mau tuhaa fenua, aita te taata e tâuˈa mau nei. E rave rahi tauaparauraa ta tatou i roto i te taviniraa o te ore e faatupu nei i te hotu, e peneiaˈe te aniani nei tatou e na vai e faaroo i ta tatou poroi.
3 E tia ia tatou ia ara ia ore tatou ia haaparuparu. Teie ta Paulo i parau: “O te tiaoro atoa hoi i te iˈoa o Iehova ra, e hope roa ïa i te ora. Eaha ra te taata nei e tia ˈi ia tiaoro atu ia ˈna, . . . i tei ore ratou i ite ia ˈna? e eaha hoi ratou e ite ai i te faaite ore? . . . oia hoi tei papaihia ra e, O te nehenehe o te avae o te feia . . . o tei hopoi mai i te evanelia o te maitai ra e!” (Roma 10:13-15) Mai te peu e e ueue tatou i te huero o te Basileia ma te tuutuu ore, e faatupu ïa te Atua i te reira i roto i te feia aau haavare ore.—Kor. 1, 3:6.
4 Te taviri o te manuïa, o te hoˈi-tamau-raa ïa e farerei i te taata: I roto i te mau tuhaa fenua e mea iti roa te feia e faaroo mai i ta tatou poroi, e tia ia tatou ia atuatu i te anaanatae atoa e itea mai ia tatou, noa ˈtu e e vaiiho tatou i te hoê vea aore ra te hoê buka, aore ra eita. No te aha hoi tatou e faaoti oioi noa ˈi e aita e hotu e noaa mai? Ia tanu tatou i te huero, aita tatou i ite e ihea e tupu ai. (Koh. 11:6) Mai te peu e e hoˈi atu tatou i muri aˈe i to tatou faaineineraa no te tufa i te hoê manaˈo no roto mai i te mau Papai, noa ˈtu e e haapoto noa tatou, peneiaˈe e manuïa tatou i te haaputapû i te mafatu o te taata. E nehenehe tatou e vaiiho i te hoê api parau iti aore ra e pûpû atu i te mau vea apî. E i muri iho, peneiaˈe e nehenehe tatou e faaite atu e nafea te hoê haapiiraa Bibilia ia faaterehia. E maere e e oaoa atoa tatou i te iteraa e e haamaitai hua mai Iehova i ta tatou mau tutavaraa.—Sal. 126:5, 6.
5 Ua vaiihohia te hoê api parau iti na te hoê vahine o tei faaite i te anaanatae. E piti noa avaˈe i muri iho to ˈna farereiraahia i to ˈna fare, tera râ, aita to ˈna e taime no te paraparau. Ua vaiiho-faahou-hia ˈtu tera noâ api parau iti. Noa ˈtu e ua tamata pinepine te tuahine i te farerei ia ˈna, e toru noa avaˈe i muri iho to ˈna manuïaraa i te farerei ia ˈna, e ua pohehia oia i te maˈi. Ua hoˈi atu te tuahine i te hebedoma i muri iho, e ua haamata ˈtura te hoê tauaparauraa poto noa no nia i te api parau iti. I to ˈna hoˈi-faahou-raa ˈtu i te hebedoma i muri iho, ua faaite teie vahine i te anaanatae mau no te poroi o te Basileia. Ua tupu hoi te hoê tauiraa i roto i to ˈna oraraa e mea na reira to ˈna iteraa i to ˈna mau hinaaro i te pae varua. Ua haamata ˈtura te hoê haapiiraa Bibilia, e ua haapii teie vahine ma te aau tae i te mau hebedoma i muri iho.
6 Noa ˈtu e e tiare anei, e maa pota aore ra e anaanatae no te poroi o te Basileia, e tia ia atuatu i te mau mea atoa o ta tatou e hinaaro ra e ite ia tupu. E titau te reira i te taime, te mau tutavaraa, te haapao-maitai-raa e te manaˈo papu ia ore tatou ia faarue. I te matahiti i mairi aˈenei, fatata e 400 000 taata ua aa te huero o te Basileia i roto ia ratou, o tei bapetizohia! Mai te peu e e tamau noa tatou i te poro, e nehenehe tatou e tiaturi e e itea mai ia tatou e rave rahi taata o te faaroo i ta tatou poroi.—Hiˈo Galatia 6:9.