“Teie hoi te ora mure ore”

¹ E tia ia haafaufaa i te mau parau a Iesu i roto i te Ioane 17:3. Mea maramarama maitai teie mau parau: ia haapii tatou i te ite i te Atua e te Mesia, e noaa mai ïa te ora mure ore! E navai noa anei râ ia ite ia Iehova e ia Iesu no te fanaˈo i teie haamauruururaa? Eita. Ua ite te mau ati Iseraela e o Iehova to ratou Atua, aita râ to ratou huru oraraa i tuea e teie tiaturiraa. No reira, ua erehia ratou i te farii maitai o te Atua. (Hos. 4:1, 2, 6) I teie mahana, “e itoito” paha to te mau mirioni taata “i ta te Atua, e ere râ i te itoito ite.” (Roma 10:2) E tia ia ratou ia naea i te ite ia Iehova, “te Atua mau” hoê ra, e ia ite nafea ia tavini ia ˈna ma te tano. No teie tumu, e pûpû tatou i te buka ra Te ite e aratai i te ora mure ore i te avaˈe Novema. Nafea tatou ia pûpû i teie buka? Teie te tahi mau manaˈo o te nehenehe e tauturu ia tatou.

² I te mea e aita te rahiraa o te taata i matau i te manaˈo ra e ora e a muri noa ˈtu i nia i te fenua nei, e nehenehe teie omuaraa parau e huti i to ratou ara-maite-raa:

◼ “E uiraa ta matou e ani nei i to matou mau taata tapiri. Mai te peu e e anihia mai oe e ora e a muri noa ˈtu i roto i te hoê ao mai teie te huru, e farii anei oe? [A faaite i te hohoˈa i te mau api 4-5 o te buka ra Te ite. A faaroo i te pahonoraa.] E nehenehe mau â oe e fanaˈo i teie oraraa oaoa. Tera râ, i to oe manaˈoraa, eaha te tia ia oe ia rave no te fanaˈo i te reira? [A vaiiho i te taata ia pahono.] A hiˈo na i te mea e anihia ra i roto i te Ioane 17:3. [A taio i teie irava.] Te tauturu nei teie buka i te mau taata e rave rahi ia noaa mai i teie ite taa ê. E hinaaro atoa anei oe i teie buka? [A faaroo i te pahonoraa.] I te taime i mua nei, e faaite au ia oe e no te aha e tano ia tiaturi e e nehenehe tatou e ora e a muri noa ˈtu i ǒ nei, i nia i te fenua nei.”

³ Ia hoˈi tatou e hiˈo i te feia o ta tatou i tauaparau no nia i te Ioane 17:3, e nehenehe tatou e na ô atu e:

◼ “I te taime i mairi aˈenei, ua taio atu vau i te parau maere mau a Iesu i roto i te Ioane 17:3, i reira to ˈna haapapuraa e ia ite tatou ia ˈna e i to ˈna Metua, e noaa mai ïa te ora mure ore. Tera râ, e rave rahi taata o te tiaturi nei e, i nia anaˈe i te raˈi tatou e fanaˈo ai i te hoê oraraa maitai aˈe. Eaha to oe manaˈo? [A faaroo i te pahonoraa.] Mai te peu e e nehenehe oe e haere e tii i te buka o ta ˈu i vaiiho mai, te hinaaro nei au e faaite ia oe i te tahi mau irava Bibilia e haapapu ra e e faahoˈihia mai te Paradaiso i nia i te fenua nei. [A tauaparau no nia i te mau paratarapha 11-16 i te mau api 9-10 o te buka ra Te ite.] I te taime i mua nei, te hinaaro nei au e faaite ia oe e no te aha oe e nehenehe ai e tiaturi i teie mau parau tǎpǔ a te Bibilia. A tiai noa ˈtu ai, peneiaˈe e nehenehe ta oe e taio i te pene 2 o ta oe buka?”

⁴ Teie paha te hoê faaiteraa e tano ia farerei tatou i te hoê taata tiaturi i te Atua:

◼ “Te paraparau nei matou e to matou feia tapiri no nia i te mau tumu i rahi ai te mau haapaoraa taa ê na te ao nei. Ua hau atu i te 10 000 rahiraa pǔpǔ faaroo na te mau fenua atoa. Teie râ, hoê anaˈe Bibilia. Ia manaˈo anaˈe oe, no te aha i rahi ai te mau haapaoraa? [A tiai i te pahonoraa. A iriti i te buka ra Te ite i te pene 5 e a taio i te paratarapha 1.] E ite oe i te mau pahonoraa papu i teie mau uiraa ia taio oe i teie pene. E oaoa roa vau i te vaiihoraa mai i teie buka na oe mai te peu e e hinaaro oe e taio.” Mai te peu e e farii te taata, a haamau i te hoê taime farereiraa e a faaoti: “I te taime i mua nei, e nehenehe tâua e tuatapapa mai te peu e e mau eˈa taa ê anaˈe te mau haapaoraa atoa e aratai tia ˈtu i te hoê â vahi.”

⁵ Ia hoˈi mai tatou no te tauaparau no nia i te mau tumu i rahi ai te mau haapaoraa, e nehenehe tatou e parau e:

◼ “I to tâua farereiraa i te taime i mairi aˈenei, ua ani au ia oe e, e mau eˈa taa ê anei te mau haapaoraa atoa e aratai tia ˈtu i te hoê â vahi. Eaha to oe manaˈo? [A faaroo i te pahonoraa.] Te hinaaro nei au e faaite ia oe i roto i te buka o ta ˈu i vaiiho mai i ta Iesu i parau no nia i teie uiraa. [A iriti i te buka ra Te ite i te pene 5 e a taio i te mau paratarapha 6-7 i reira te faahitiraahia te Mataio 7:21-23.] Peneiaˈe te aniani ra oe e no te aha e mea faufaa roa ia ite papu i te hinaaro o te Atua. E ite mai oe e e mea rahi te haapiiraa e noaa mai i roto i te mau paratarapha i muri mai. Mai te peu e e tia ia oe, a taio ïa i te toea o teie pene; e ia hoˈi mai au i te taime i mua nei, e oaoa roa vau i te faaite ia oe i te faufaaraa o te ite papu no nia i te Bibilia.”

⁶ Mea pinepine te hoê omuaraa parau papu i te manuïa no te haamata i te mau haapiiraa Bibilia. No roto mai te omuaraa parau i muri nei i te vea iti ra “Nafea ia haamata e ia tamau â i te mau aparauraa Bibilia” i te api 4:

◼ “Te haere mai nei au e farerei ia oe no te faaau i te hoê haapiiraa Bibilia tamoni ore i te fare. Mai te peu e e faatia mai oe, te hinaaro nei au e rave i te tahi noa minuti no te faaite atu ia oe nafea, i roto fatata e 200 fenua o te ao nei, te mau taata e hiˈopoa ˈi i te Bibilia i ǒ ratou, e to ratou utuafare fetii. E nehenehe tâua e tuatapapa i te tumu parau o ta oe e hinaaro. [A faaite i te tabula tumu parau o te buka ra Te ite.] Te vai ra anei te hoê tumu parau o te faaanaanatae taa ê ra ia oe?” A vaiiho i te taata ia maiti. A iriti i te buka i te pene o ta ˈna e anaanatae ra e a haamata i te haapiiraa mai te paratarapha matamua mai.

⁷ Teie te tahi atu ravea papu o ta tatou e nehenehe e tamata no te haamata i te mau haapiiraa:

◼ “Te horoa nei au i te mau haapiiraa Bibilia tamoni ore e te toe râ te tahi taime vata i roto i ta ˈu tabula ohipa no te tahi atu feia haapii. Teie te buka o ta ˈu e faaohipa nei. [A faaite i te buka ra Te ite.] Tau avaˈe noa te maororaa o te haapiiraa e e ite mai oe i te mau pahonoraa i te mau uiraa mai teie: No te aha te Atua e faatia ˈi i te mauiui? No te aha tatou e ruau ai e e pohe ai? Eaha te tupu i nia i te feia pohe herehia e tatou? Aore ra: Nafea oe ia haafatata ˈtu i te Atua?” A ani atu i muri iho e: “E nehenehe anei au e faaite noa ˈtu e mea nafea teie haapiiraa ia faaterehia?” Mai te peu e eita te taata e anaanatae i te haapiiraa, a ani atu ahiri e e hinaaro oia e rave i te buka ra Te ite no te taio. Mai te peu e e parau mai oia e e taio oia, a vaiiho atu ïa i te hoê buka.

⁸ E taoˈa faufaa rahi ta te taata te vai ra ia ˈna te ite papu no nia i te Atua e te Mesia! Auaa te haapiiraa i te ite ia raua e noaa mau ai te ora mure ore i roto i te mau huru tupuraa tia roa. I te avaˈe Novema, e faaohipa anaˈe i te mau ravea atoa no te tufa na vetahi ê i te ite e aratai i taua oraraa ra.