E haaparare anaˈe i te mau parau apî oaoa no te tahi mea maitai aˈe
1 Hoê hanere ahuru ma hitu matahiti i teie nei to Te Pare Tiairaa parururaa i te parau mau a te Bibilia. Te neneihia ra i teie nei taime 18 950 000 vea o te numera tataitahi na roto 125 reo. E mea maoro atoa to te A ara mai na! riroraa ei paruru no te Parau a te Atua e 15 730 000 vea o te piahia ra i teie nei na roto e 80 reo.—Hiˈo Kolosa 1:23.
2 Te haamâha nei te mau vea i te hoê hinaaro i te pae varua: E mau mirioni taata aau haavare ore o te faufaahia nei na roto i Te Pare Tiairaa e te A ara mai na! o te tauturu nei ia ratou ia haamâha i to ratou mau hinaaro i te pae varua na roto i te mau tumu parau o te haapaari nei i te faaroo. Ei hiˈoraa, i roto i Te Pare Tiairaa o te 1 no Febuare 1996, ua tuatapapa mai tatou i te hoê tumu parau no nia i te faufaaraa ia tiaturi ia Iehova e i ta ˈna Parau. Ua faaitoito mai Te Pare Tiairaa o te 1 no Mati 1996 ia tatou ia ohipa noa i roto i te taviniraa a Iehova e ia tamau noa i te tiai ia ˈna. Ua itoito-mau-hia tatou na roto i te hiˈopoa-huˈahuˈa-raahia te parau tohu a Zephania! I muri iho, ua fanaˈo tatou i te hoê haapiiraa anaanatae mau no nia i te taiva-ore-raa kerisetiano i roto i Te Pare Tiairaa o te 15 no Mati 1996. Ua haamatara te vea o te 15 no Me 1996 i te faufaaraa ia taio e ia tuatapapa tamau i te Parau a te Atua. Ua tauturu mai teie mau tumu parau ia tatou ia faahohonu i to tatou ite o te Parau a te Atua e ia faarahi i to tatou mauruuru no ta ˈna Basileia.
3 Hau atu, te vai ra i roto i te mau vea te mau tumu parau tano roa e te ohie ia faaohipa no nia i te haerea e auhia e te Atua, te morare kerisetiano e te tahi atu mau tumu parau faufaa roa. Te faataa nei te reira i te tahi mau uiraa faufaa roa no nia i to tatou oraraa. E nehenehe ïa tatou e fanaˈo i te hoê oraraa maitai aˈe i teie nei iho, a tiai noa ˈtu ai e ia tupu te mau parau tǎpǔ a te Atua no nia i te tahi mea maitai aˈe no te tau i mua nei.—Isa. 48:17; Tim. 1, 6:19.
4 Ia taio faahou tatou i te parau i papaihia i te api 4 o te numera tataitahi o te A ara mai na! e ite ïa tatou e e mau tumu papu ta tatou no te faaitoito i te taioraa i teie vea. Noa ˈtu eaha te vahi e faaeahia ra e te taata, e taurearea anei aore ra e taata paari, e vea maitai roa no ratou ia taio. Te na ôhia ra e: “Ua neneihia te A ara mai na! no te maitai o te utuafare taatoa. Te faaite maira oia nafea râ ia faaruru atu i te mau fifi atoa e farereihia nei i teie mau mahana. Te tuatapapa nei oia i te mau parau apî, te faatia nei hoi i te mau parau a te mau nunaa e rave rau e te mau tumu parau i te pae no te faaroo e no te ite paari. E ere râ hoi te reira anaˈe. Te faahohonu nei teie nei vea e te haamaramarama nei i te mau ohipa e tupu nei, ma te tapea maite râ i to ˈna tiaraa pae tahi ore i te pae politita e i te pae no te nunaa. Hau atu â râ, te horoa mai nei teie vea i te mau tumu papu maitai e nehenehe ai tatou e tiaturi i te Poiete tei tǎpǔ mai e e haamau oia i te hoê ao o te fatata i te mono i te faanahoraa o te mau mea iino e vai nei, e o te vahavaha ra i te ture.”
5 E pûpû anaˈe i te mau vea na te taata: Ia pûpû tatou i Te Pare Tiairaa e te A ara mai na! ma te pipiri ore. (Hiˈo Timoteo 1, 6:18.) A rave noa i te tahi mau vea no te pûpû atu na te feia o ta tatou e farerei noa ˈtu. (Koh. 11:6) E nehenehe tatou paatoa, e te mau taurearea e te feia poro apî atoa, e apiti hua i roto i te opereraa vea i teie avaˈe na roto i te faaohiparaa i te mau faaiteraa poto noa i niuhia i nia i te mau tumu parau no teie nei tau e vai ra i roto i te mau numera hopea nei. Ia ite maitai tatou i teie mau tumu parau e ia pûpû anaˈe tatou na te taata ma te aau haavare ore e te manaˈo papu.
6 Te vai ra i roto i Te Pare Tiairaa e te A ara mai na! te mau haamaramaramaraa te tia i te taata tataitahi ia ite. A vaiiho atu na te taata; tera hoi te hoê o te mau ravea maitatai roa ˈˈe no te tauturu ia ratou ia haapii i te parau apî maitai e faaite ra e fatata roa te tahi mea maitai aˈe i te tupu.