O vai tei aravihi no te poro?
1 Ua faatupu aˈena anei outou i te manaˈo mai to Mose no nia i te taviniraa? Ua faˈi oia e: “E tau Fatu, e ere au i te taata parau, mai ia oe â i parau mai i to tavini nei, e mai mutaaiho mai â.” (Exo. 4:10) Mai te peu e teie atoa to outou manaˈo, peneiaˈe te faataupupu nei te reira i ta outou pororaa. Tera râ, ua “faaue [Iesu] ia tatou ia poro” i te mau taata e ia horoa i te hoê faaiteraa taatoa. (Ohi. 10:42, MN) Nafea ïa ia riro mai ei taata poro aravihi i te parau apî maitai?
2 E ere na to tatou faito haapiiraa e faaaravihi ia tatou no te taviniraa. Ua parau Paulo e “aita rea e taata paari i te haapaoraa i te tino nei . . . i parauhia” e “te paari hoi o teie nei ao, e mea maamaa ïa i te Atua.” (Kor. 1, 1:26; 3:19) Ua maiti Iesu i ta ˈna mau aposetolo i rotopu i te pǔpǔ taata rave ohipa; e feia ravaai e maha i rotopu ia ratou e peneiaˈe hau atu. Ua haavahavaha te mau raatira faaroo teoteo ia ratou ma te faariro ia ratou ei ‘pue taata haapii-ore-hia e te itea ore.’ Haavahia ia au i te mau titauraa a te ao nei, e ere te mau aposetolo i te feia aravihi no te poro. Teie râ, ua turai te oreroraa parau faahiahia roa ta Petero i hohora i te mahana o te Penetekose e 3 000 taata ia bapetizo!—Ohi. 2:14, 37-41; 4:13.
3 Te faaaravihi nei Iehova ia tatou no te poro: Teie ta Paulo i parau: “No ǒ mai i te Atua ra to matou aravihi.” (Kor. 2, 3:5, MN) Ua haapii Iehova, te Tumu o te paari, i te mau mirioni taata ia poro ratou ia vetahi ê i te parau mau no nia i te Basileia. (Isa. 54:13) E ohipa aravihi teie e te hotu maitai: oia mau i te matahiti i mairi aˈenei, e 338 491 taata tei bapetizo-apî-hia, e “episetole haamaitai” ora anaˈe ratou. (Kor. 2, 3:1-3) E mau tumu atoa ta tatou no te poro ma te itoito e ma te tiaturi i te mea ta Iehova i haapii mai.
4 Ua haamau te faanahonahoraa a te Atua i te hoê porotarama o te faaineineraa i ta ˈna mau tavini na te ao atoa nei. Maoti te mau Papai e te mau buka Bibilia e rave rau, te haapiihia ra e te faaineinehia ra tatou no te riro ei feia “aravihi roa, ineine maitai” no te poro. (Tim. 2, 3:16, 17, MN) E rave rahi taata tei maere i te ite hohonu e vai ra i roto i te mau papai a te Taiete. Ei hiˈoraa, teie te nehenehe e taiohia i roto i te hoê vea no Tuete: “Te faaite nei te faaroo e porohia ra e te mau Ite no Iehova i te hoê ite rahi o te Bibilia e te hoê haamaramaramaraa faahiahia na te ao atoa nei.”
5 Na roto i te mau faaueraa ta tatou e fanaˈo ra i roto i ta tatou na putuputuraa tahebedoma e pae, ta tatou porotarama taioraa e te haapiiraa o te Bibilia, te mau aˈoraa e noaa ra ia tatou i te Haapiiraa o te Taviniraa Teotaratia, te tauturu a te tahi atu mau tavini aravihi, e hau atu â, te turu a te varua moˈa o Iehova, e nehenehe tatou e papu e te faariro nei Iehova ia tatou ei feia aravihi roa no te poro. ‘E, ei feia tonohia e te Atua, i mua i te aro o te Atua, e te Mesia, te parau nei tatou i te parau.’—Kor. 2, 2:17.
6 Mai te peu e e haafaufaa rahi tatou i te faaineineraa teotaratia ta te Atua e horoa ra na roto i te arai o ta ˈna faanahonahoraa, aita e tumu ta tatou no te faataupupu aore ra no te mǎtaˈu. E poro anaˈe ïa ma te oaoa ia vetahi ê, ma te tiaturi papu e e haamaitai Iehova i ta tatou mau tutavaraa.—Kor. 1, 3:6.