E faaineine anaˈe no te pûpû i te mau vea i te avaˈe eperera
Mai ta ta tatou Kalena 1996 e faaite ra, e faatupu tatou i te oroa Haamanaˈoraa i teie matahiti i te 2 no eperera. Faaitoitohia e taua oroa ra, eita e ore e hinaaro tatou tataitahi e apiti ma te itoito i roto i te opereraa i te mau vea i te avaˈe eperera taatoa. E mau vea tano mau teie! Ua niuhia Te Pare Tiairaa o te 1 no eperera i nia i te oreroraa parau o te tairururaa mataeinaa hopea nei, oia hoi “E arue anaˈe i te Arii mure ore!” E rave faahou mai te vea o te 15 no eperera i te upoo parau o te oreroraa parau taa ê no te avaˈe eperera 1995 ra, “Ua fatata te hopea o te haapaoraa hape.” E faarahi atu â te oreroraa parau taa ê o te 21 no eperera, “Ia vai hapa ore tatou i rotopu i te hoê ui piˈo,” i to tatou itoito.
Ei apeeraa i te ohipa opereraa i te api parau Te parau apî o te Basileia, e faataa-taa-ê-hia te avaˈe eperera i teie matahiti no te opereraa i te mau vea. E tia ia faaineine i teie nei iho â. E rave rahi o te opua e riro ei pionie tauturu. E tia ia faataa atea e ani faarahi i te mau vea no te avaˈe eperera. E nehenehe e faanaho i te mau mahana opereraa vea e te feia atoa o te vata, e putuputu mai ïa ratou i te poipoi, i te avatea, aore ra i te ahiahi. Ia riro paatoa tatou ei ‘feia rave i te parau.’ Ia tupu atoa teie mau parau i tohuhia no te Mesia i roto i te Salamo 69:9 i nia ia tatou e tia ˈi: “Ua riro roa vau i te itoito i to fare.”—Iak. 1:22; Ioa. 2:17.