Te mau haamaitairaa o te Haapiiraa o te taviniraa teotaratia no 1996—Tuhaa 2
1 I muri noa ˈˈe i te avariraahia te Haapiiraa o te taviniraa teotaratia i te matahiti 1943 ra, teie ta te hoê amaa a te Taiete i faaite mai: “Ua tauturu teie faanahoraa maitai roa e rave rahi mau taeae, o tei manaˈo hoi e eita ratou e tae ia paraparau i mua i te taata, ia riro mai i roto i te hoê area taime poto, ei mau taata orero maitatai e ei feia poro aravihi.” Te tamau noa nei te haapiiraa i te horoa i te faaaravihiraa papu, o ta tatou paatoa e hinaaro nei.
2 Taioraa bibilia: E ere o te feia anaˈe o te vauvau i te hoê tumu parau te faufaahia i te haapiiraa. Inaha, te vai ra te hoê tuhaa te tia ia tatou pauroa ia faaineine: te taioraa bibilia tahebedoma. Ua tapaohia i roto i te porotarama o te haapiiraa eaha te mau pene te tia ia tatou ia taio i te mau hebedoma atoa. E rave rahi mau faahaamanaˈoraa i roto i te mau Papai o te haamatara ra i te faufaaraa ia taio i te Bibilia i te mau mahana atoa. (Ios. 1:8; Sal. 1:2; Ohi. 17:11) Mea faufaa roa teie taioraa no to tatou oraora-maitai-raa i te pae varua; e faaamu oia i te feruriraa e te mafatu. Ia taio tatou i te Bibilia e pae aˈe minuti i te mahana, e nehenehe ïa tatou e apee i te porotarama tahebedoma. I te hopea o te matahiti, e hope ia tatou i te taio hau atu i te 150 pene o te Parau a te Atua. Mai te peu e e vaiiho tatou i te hoê Bibilia i te vahi ohie ia rave mai, e nehenehe iho â paha ta tatou e taio i te tahi maa irava i te mau mahana atoa.
3 Oreroraa parau haapiiraa: No te turai i te mau taeae e te mau tuahine ia tavini ia Iehova ma te haapao maitai e te itoito, e tia i te taeae orero o te vauvau i te oreroraa parau haapiiraa ia riro ei taata haapii maitai, ia haamatara i te auraa o te mau tumu parau e tuatapapahia ra e ia aratai i te feia e faaroo ra ia ˈna ia faatupu i te mauruuru no te Atua, ta ˈna Parau e ta ˈna faanahonahoraa. E manuïa te mau matahiapo e te mau tavini tauturu i te na reira, maoti te faaineine-maitai-raa, te paturaa i ta ratou oreroraa parau i nia i te hoê upoo parau, te paraparauraa ma te manaˈo papu e te vauvauraa i te mau tuhaa ma te oraora maitai. (Heb. 4:12) Mea faufaa ia faatura te taeae orero i te taime i faataahia. Mea rahi roa te mau faahitiraa bibilia i roto i te buka “Te mau papai taatoa” (farani), e te faataa ra oia i te tahi mau vaehaa anaanatae o te mau Papai, o ta tatou e nehenehe e huti mai i te faufaa i te pae varua. E tauturu te tuatapaparaa i te buka Tahoêhia i roto i te haamoriraa ia tatou ia feruri maite e ia haamaitai i to tatou maramarama i te pae varua. Te faaite maira oia i te parau mau ia au i to ˈna mau huru rau e maoti te reira, e papu ia tatou, eiaha noa te taairaa i rotopu e rave rahi mau manaˈo, mea nafea atoa râ teie mau manaˈo e tano ai i nia ia tatou.
4 Te mau tuhaa anaanatae o te taioraa bibilia: E tia i te mau taeae tei horoahia teie tuhaa na ratou, ia maiti i te mau irava taa maitai, o ta ratou e nehenehe e faaohipa no te amuiraa iho. E tano ia taio ratou i te mau irava i faataahia, ia feruri hohonu e ia rave i te mau maimiraa i nia i te mau irava maitihia ia itea mai te mau tatararaa o te haamatara i to ratou auraa. I te hopea o te buka faahororaa Index des publications de la Société Watch Tower, te vai ra te hoê tuhaa “Index biblique” (“Faahororaa bibilia”), o te nehenehe e tauturu ia tatou ia imi anaˈe tatou i te mau haamaramaramaraa no nia i te tahi irava. E tia i te mau taeae o te vauvau mai i teie tumu parau ia ara maite e ia ore e faahiti i te tahi mau manaˈo aita roa e tuearaa e te mau tuhaa e tuatapapahia ra. Eiaha te mau tatararaa o ta ratou e faaineine ia mairi i te ono minuti.
5 E nehenehe tatou tataitahi e huti i te mau haamaitairaa no roto mai i te Haapiiraa o te taviniraa teotaratia. E nehenehe oia e tauturu ia tatou ia haamaitai i to tatou aravihi ei mau taata orero e ei mau taata haapii. A huti i te mau haamaitairaa no roto i teie faanahoraa o te tauturu mau â ‘ia ite te taata atoa i te tupuraa o to outou ite.’—Tim. 1, 4:15.