Ia ara maite noa tatou i ta tatou haapiiraa
1 E haamata te porotarama apî no te Haapiiraa o te taviniraa teotaratia i te avaˈe tenuare 1995. Eaha te mea apî i roto i taua porotarama ra no te mau amuiraa reo farani? O te aamu anaanatae mau o te faanahonahoraa a te mau Ite no Iehova i to tatou nei tau te upoo parau o te rahiraa o te mau oreroraa parau haapiiraa. I te roaraa o te matahiti, e tuatapapahia na 178 api o te buka ra Te mau Ite no Iehova: Feia poro i te Basileia (farani). I te mea hoi e aita e uiraa faahaamanaˈoraa ia hohorahia te oreroraa parau haapiiraa niuhia i nia i te buka ra Feia poro, eaha ta tatou e nehenehe e rave ia ara tatou i te haapiiraa horoahia e ia haafaufaa rahi atu â?—Tim. 1, 4:16.
2 Parau mau, e rave rahi tei taio aˈena i te buka ra Feia poro, e tauturu râ te tuatapaparaa i taua mau tumu parau ra i te haapiiraa ia tatou paatoa ia haafaufaa rahi atu â i ta tatou ô teotaratia (Sal. 71:17, 18). No te aha e ore ai e faanaho i te hoê taime i te hebedoma tataitahi no te hiˈo faahou i te mau tumu parau faanahohia i roto i te buka ra Feia poro?
3 Te mau oreroraa parau haapiiraa oraora e te anaanatae: E tia e ia hohorahia te mau oreroraa parau haapiiraa niuhia i nia i te buka ra Feia poro ma te oraora e te anaanatae. E tia atoa ia ratou ia haamatara i te faufaaraa ohie o te mau tumu parau, na roto i te tatararaa ia rahi to tatou auraro no te faanahonahoraa a Iehova, e to tatou aau mehara no ta tatou mau haamaitairaa taa ê ei mau tavini a te Atua. Mai te peu e e afai mai te utuafare tataitahi i te buka ra Feia poro i te Haapiiraa o te taviniraa teotaratia, e nehenehe ïa te mau melo e apee maite i te oreroraa parau haapiiraa e e haafaufaa i te mau faahohoˈaraa e te mau hohoˈa i roto i te buka.
4 Te mau taioraa o te Bibilia o te haaferuri: No te haapii ma te aravihi, e mea faufaa ia ite maitai i te taio, e te hoê toparaa reo oreroraa maitai e te faatupuraa i te mau manaˈo hohonu. No reira, e ere i te mea roa roa te tuhaa e taio i roto i te tumu parau n° 2, e taime rahi roa to te taata haapii ia hohora i te hoê omuaraa parau e te hoê faaotiraa. E tia i te omuaraa parau ia faaara i te anaanatae o te feia i putuputu mai no te tuhaa e taio e ia faaineine ia ratou ia taa i to ˈna faufaaraa ohie. E nehenehe te taata haapii e faataa i te tahi mau manaˈo aore ra e horoa i te hoê haapiiraa i roto i ta ˈna faaotiraa, e nehenehe ïa o ˈna e haafaufaa rahi i te taime faataahia.
5 Te vai ra te tahi atu â mau haamaramaramaraa i roto i te “Porotarama 1995 no te Haapiiraa o te taviniraa teotaratia” nafea ia hohora i te tumu parau tataitahi. E ara maite tatou i ta tatou haapiiraa mai te peu e e hiˈo faahou tatou i taua mau haapiiraa ra, e faaineine maitai tatou i ta tatou mau tumu parau e e faaohipa tatou i te mau aˈoraa horoahia mai na tatou, no te haamaitai atu â i to tatou aravihi o te oreroraa e o te haapiiraa. Te faaitoito nei matou ma te mahanahana i te feia aitâ i tapao atura ia ratou i te haapiiraa ia rave i te reira.