Ia tapea mai tatou i te hoê manaˈo aifaito i nia i te faaohiparaa i te mau matini roro uira
1 Ua faaitoito te aposetolo Paulo i te mau kerisetiano o te senekele I eiaha e vaiiho ia ratou ia haafariu-ê-hia, no te mea, ua parau o ˈna e, “te poto nei te taime.” (Kor. 1, 7:29.) Inaha hoi e te piri maira te hopea o teie faanahoraa o te mau mea e vai nei, e tia ia tatou ia ‘imi na mua roa i te Basileia e te parau-tia o te Atua’ e ia ‘faaherehere maite i te taime.’ E mea faufaa roa te taime.—Mat. 6:33; Eph. 5:15, 16.
2 Te fariihia nei te mau ravea aravihi apî no nia i te oreraa e haamâuˈa te taime. Ei hiˈoraa, ma te taumi noa i nia i te hoê pitopito a te hoê matini roro uira, e nehenehe e noa oioi ia tatou e rave rahi mau haamaramaramaraa. Hau atu â, e mea pinepine te mau matini roro uira i te rave maa tetoni noa i te hoê ohipa o te nehenehe hoi e ani e rave rahi hora, e rave rahi hebedoma atoa. Faaohipahia ma te au, e riro ïa ratou ei mau tauihaa faufaa roa.
3 E faaohie mau anei te reira i te ohipa? Eita e nehenehe e faaohipa i te matini roro uira mai te peu e aita e horoahia te tahi moni e i te taime atoa. E titauhia i te tahi taime e rave rahi hora no te haapii e nafea te matini roro uira ia rave i te tahi mau ohipa. Hau atu, te horoa nei te taata o tei anaanatae roa i te matini roro uira i te hoê taime o ta ˈna e nehenehe e faaohipa maitai roa ˈˈe. E tia ia tatou ia vai aifaito, ma te tapea i roto i to tatou feruriraa i te faaueraa tumu e matara maira mai roto mai i te faaararaa a te aposetolo Paulo, o te parau ra i te mau kerisetiano ia haere ‘mai te feia ite ra, ma te faaherehere maite i te taime.’—Eph. 5:15, 16; hiˈo atoa Korinetia 1, 7:31.
4 Ua faanaho vetahi, ma te manaˈo maitai, i te mau porotarama i roto i te matini roro uira no te faanaho i te mau haapueraa parau a te amuiraa. Oia mau, e tia i te taata tataitahi ia rave i te faaotiraa e nafea o ˈna ia faaohipa i ta ˈna matini roro uira. Tera râ, eiaha e faaherehere i te mau haapueraa parau a te amuiraa i roto i te matini roro uira ia horoahia mai te mau api parau no te reira tumu, no te mea e nehenehe te mau tamarii aore ra te tahi atu taata e haere atu i roto i teie porotarama e eita hoi oia e nehenehe. E tia ia haamauhia te mau haapueraa parau a te amuiraa (tabula faufaa moni, mau api parau no te taviniraa, e te tahi atu ohipa.) ia au i te mau api parau haaponohia mai e te Taiete e eiaha e haaputu i te mau haamaramaramaraa e vai ra i roto i te matini roro uira. Ia na reira anaˈe, e paruruhia ïa te mau haapueraa parau a te amuiraa.
5 E tia i te mau tiaau o tei titauhia ia faaineine i te mau porotarama no te Haapiiraa o te taviniraa teotaratia e te putuputuraa no te taviniraa, ia ara maitai ia horoa anaˈe ratou na te mau melo taa ê o te amuiraa e rave rau tumu parau e vauvau. E tia ia ratou ia haamanaˈo i te mau tumu parau o tei horoahia. Ei hiˈoraa, i te haapiiraa o te taviniraa, mea iti paha te mau taata haapii o te nehenehe e tatara i te tahi upoo parau. E tia ia haapao i te tapao o te tumu parau, i te mau ite aravihi o te mau taeae e te mau tuahine e te huru o te mau tumu parau. Eita e tia ia tatou ia vaiiho e na te hoê matini roro uira e faaoti e na vai e hohora i tera aore ra i te tahi atu tumu parau.
6 Eita e tia i te hoê taeae o te hohora i te hoê tumu parau i te hoê putuputuraa, ia rave i te mau manaˈo faaineinehia na te tahi atu taata, mai te peu iho â râ e na te hoê taata matau-ore-hia, no te mea noa e nehenehe e noaa mai i roto i te matini roro uira e mea ohie aˈe no ˈna ia faaohipa i te reira. Aita te mau kerisetiano haapao maitai e rave ra mai ta ratou e hinaaro e faaineine i te mau oreroraa parau huiraatira aore ra te mau tumu parau e ia tuu atu i mua i te mau taata na roto i te matini roro uira. Tera râ, e manaˈo paha te hoê taeae e mea faufaa roa ia faaohipa i te hoê matini roro uira e te Bibliothèque de la Société Watchtower i roto i te CD-ROM no te apiti mai i roto i ta ˈna tumu parau i te mau maimiraa anaanatae, parau mau i roto iho â ra i te taime faataahia.
7 E paraparau anaˈe no nia i te faaohipa-faahou-raa e te opereraa na te mau taeae te mau porotarama, te mau tabula e te tahi atu â mau parau mai teie te huru, aore ra te faaineineraa e te afaifairaa i te mau tumu parau faanahohia no te putuputuraa no te taviniraa aore ra no te Haapiiraa o te taviniraa teotaratia na roto i te mau ravea uira aore ra te tahi atu mau taoˈa. E mea maitai aˈe e na te mau taeae iho e faaineine i ta ratou iho mau tumu parau ma te haamanaˈo i te mau hinaaro o ta ratou amuiraa (Tim. 1, 4:13, 15). Eiaha roa ˈtu tatou e faaohipa i to tatou mau taairaa i roto i te amuiraa no to tatou hinaaro i te pae moni iho â ra.
8 Eaha ïa no nia i te opereraa i te mau papie o tei papaihia i te mau irava bibilia i roto i te mau tumu parau e tuatapapahia i te haapiiraa o Te Pare Tiairaa aore ra i te haapiiraa buka? E au ra e mea maitai aˈe ia nota roa mai te feia poro i nia i ta ratou Bibilia e ta ratou iho mau buka. Eita paha te mau taata o te faaohipa ra i teie mau papie i te mau putuputuraa e paheru i te mau irava i roto i ta ratou Bibilia. Inaha o te hoê tuhaa hoi teie o te faaineineraa fanaˈohia i te mau putuputuraa e tae noa ˈtu i te mau haapiiraa bibilia no te faaaravihi ia tatou e ia nehenehe tatou e faaohipa i te Bibilia ma te ohie i roto i te pororaa. I te rahiraa o te taime, ia titauhia iho â râ i te feia i putuputu mai ia apee mai i te taioraa o te mau irava roroa o te mau Papai, e huti mai tatou i te maitai rahi ia tatara i ta ˈna Bibilia.
9 Te tahi atu mau marei atâta: Mai tei haapapuhia i te api 17 o Te Pare Tiairaa no te 1 no atete 1993, e nehenehe tatou e fifi roa i te pae varua ma te tuati atu i te mau tabula poroi uira. Mai te hoê taata taiâ ore o te nehenehe e faaô mai i te hoê porotarama atâta i roto i te tabula poroi uira, oia hoi te hoê porotarama no te faaino aore ra e faaore roa i te mau haapueraa parau no teie matini, e nehenehe te mau apotata, te mau ekalesiatiko aore ra te mau taata o te hinaaro nei e haaviivii ia vetahi ê i te pae morare e faaite tahaa i to ratou mau manaˈo viivii e te turori. Taa ê noa ˈtu i te tuatiraa ˈtu i te hoê tabula poroi uira o te hiˈopoa-maitai-hia ra (te faaiteraa “Faahereherehia no te mau Ite no Iehova” e ere ïa i te hoê paruru) e o te mau tavini a Iehova paari e te haapao maitai anaˈe o te faatiahia, e nehenehe te hoê kerisetiano e haafifihia e te mau “amuiraa iino ra.” (Kor. 1, 15:33.) Ua afaihia te mau tabula i te Taiete ra no nia i te mea e piihia ra te mau “faanahoraa haapurororaa taa ê” o tei faaohipahia eiaha no te horoa noa i te mau maimiraa no nia iho i te mau uiraa i te pae varua, no te horoa atoa râ i te mau aˈoraa ino, no te haaparare i te mau parau faaino e te mau haamaramaramaraa hape, no te horoa i te mau manaˈo hape, no te faahiti i te mau uiraa e no te haafeaa i te manaˈo, te mau huru mea atoa o te faatahuri i te faaroo o vetahi ê e o te haaparare ra i ta ratou iho mau tatararaa o te mau Papai. Ia hiˈohia ˈtu, e au ra e mea anaanatae te tahi mau haamaramaramaraa e e horoa mai i te haapiiraa, tera râ e mau manaˈo taero to roto. Te tiaturi ra te mau kerisetiano i nia i te “tavini haapao maitai e te paari” no te fanaˈo i te maa i te pae varua i te taime au e e rave rau atu â mau haamaramaramaraa. (Hiˈo i Te Pare Tiairaa no te 1 no tiurai 1994, i te mau api 9-11.) E hopoia teimaha ta te kerisetiano tataitahi ia paruru i to ˈna faaroo i te mau ohipa viivii atoa e, no reira, e tia ia ˈna ia ite noa i te mau taata o ta ˈna e amuimui nei.—Mat. 24:45-47; Ioane 2, 10, 11.
10 Te faahaamanaˈo ra taua noâ tumu parau ra o Te Pare Tiairaa i te faufaaraa ia faatura i te mau ture faturaa. Te tuu nei te rahiraa taiete o te faaineine e o te hoo ra i te mau porotarama i te mau parau faturaa. E horoa atoa ratou i muri iho i te parau faatia o te faataa ra i te mau otia faatiahia e te ture ia faaohipa i te mau porotarama. Te haapapu maitai ra te mau parau faatia i te pae rahi e aita te taata faaohipa e faatiahia ra ia faaohipa faahou i te mau porotarama no te tahi atu mau taata. Oia mau, ia rave i teie huru ohipa, ua riro ïa ei ofatiraa i te mau ture faturaa na te ao taatoa. E rave rahi mau taata o te ore e mǎtaˈu ra i te ofati i te ture. Area ra te mau kerisetiano, te faatura maite ra ïa ratou i te mau ture, ma te faahoˈi i te ohipa a Kaisara ia Kaisara ra.—Mat. 22:21; Roma 13:1.
11 Te hoo nei te tahi mau taiete rarahi i te mau matini roro uira e te mau porotarama i haamau-aˈena-hia ma te tuu atoa ˈtu i te parau faatia. I te tahi mau taime aita te tahi mau fare toa e horoa ra i te mau parau faatia no te mea ua tuu ratou i roto i te matini roro uira i te mau porotarama faaineine-aˈena-hia; te ofati nei ïa te feia e hoo mai i teie tauihaa i te ture. No reira, eita e tia i te mau kerisetiano ia faaô i roto i te hoê faanahoraa haapurororaa aore ra ia faaî na roto i te hoê tabula poroi uira i te mau api parau haamanahia e te mau ture faturaa (mai te mau buka a te Taiete); aita e tuea ra i te ture ia faaohipa faahou i te reira ma te ore e ani i te parau faatia a te mau fatu.—Heb. 13:18.
12 E tia ia fariihia te faufaaraa o te hoê ravea aravihi apî ma te haapao maitai i te mau ohipa atâta no nia i to ˈna faaohiparaa. Ei hiˈoraa, e nehenehe e huti mai i te tahi mau vahi maitai o te afata teata, tera râ e nehenehe ta ˈna mau faahopearaa hairiiri i nia i te huitaata nei e turai atoa i te mau taata hiˈopoa e ere i te mau Ite no Iehova ia uiui ia ratou iho. Te parare nei te mau matini roro uira na te ao taatoa e e nehenehe te reira e afaifai e rave rahi haamaramaramaraa faufaa i te fare, aore ra i te vahi raveraa ohipa. Te horoa nei te reira e rave rahi mau tauturu i te mau taiete e te mau taata taa ê, i rotopu i te hoê nunaa ohipa roa, e tia ia ratou ia ite i te haereraa i te rahi o ta ratou iho mau faufaa aore ra i te pae tapihooraa tauihaa. Tera râ, i roto i te hoê â taime, ua haaviiviihia taua mau faanahoraa haapurororaa ra e te peu faufau, e te mau poroi feii no te faaamahamaha, te mau haamaramaramaraa faataa-maitai-hia e nafea ia rave i te mau huru ohipa faufau atoa e te ino, e te vai atu â.
13 No reira e rave rahi tumu e tia i te hoê kerisetiano ia tapea i te hoê manaˈo aifaito no nia i te faaohiparaa i te mau matini roro uira. I roto i te tahi mau reo, te pûpû nei te Taiete i te Traduction du monde nouveau, e nau buka e piti o te Étude perspicace e te porotarama GetVerse i nia i te mau disquettes, e e rave rahi o te faaohipa nei i te reira. Ua rave mai te tahi atu mau taata i te Bibliothèque de la Societé Watchtower i roto i te CD-ROM, ia nehenehe e rave i te mau maimiraa rahi atu â. A farii noa ˈi i te faufaaraa o te ravea aravihi apî, e tia i te taata o te faaohipa ra i te reira no te hoê tumu maitai ia vai ara noa e ia paruru ia ˈna iho, ia ˈna e ia vetahi ê, i ta ˈna mau tuhaa atâta. E tia ia tatou ia faaite i te huru aifaito ia ore te ravea aravihi apî, i roto atoa i to ˈna mau pae maitatai, ia faaohipa rahi roa i te taime o ta tatou i pûpû no te Atua aore ra ia haafariu ê ia tatou i ta tatou ohipa e i ta tatou mau tapao matamua.—Mat. 6:22; 28:19, 20.