Te Pare Tiairaa e te A ara mai na!: te mau vea tano no to tatou nei anotau hopea
1 Ia au i te mau parau tohu a te Bibilia, te tupu nei te mau ohipa peapea na te ao taatoa! Ia hiˈo anaˈe tatou i te mau mea e haaati ra ia tatou, i roto e i rapaeau i te faanahonahoraa teotaratia, te taa ra ia tatou e mea ru mau ia poro ‘i te parau apî maitai’ o te Basileia (Mareko 13:10). Te turai nei te reira ia tatou ia tamau noa i te rave i ta tatou taviniraa ma te itoito i te roaraa o te avaˈe eperera.
2 Te haapapu ra te ohipa taa ê ta tatou e rave i te hopea o te avaˈe i te faufaaraa o ta tatou poroi. Te tiai ru nei tatou e ia tae mai Te parau apî o te Basileia ta tatou e opere i te roaraa o te mau avaˈe eperera e me. Ia tae to tatou aau no taua ohipa ra e no te faaanaanatae i te mau taata o ta tatou tuhaa fenua, e nenei Te Pare Tiairaa e te A ara mai na! i te mau tumu parau tano, mau tumu parau o te haafaufaa i te auraa o te parau tohu no nia i te mau ohipa e tupu ra na te ao nei. Nafea ïa ia faaineine i te hoê faaiteraa o te faaara i te anaanatae o te mau taata no te mau vea?
3 E aravihihia ta tatou faaiteraa mai te peu e e pee tatou i teie mau tuhaa faufaa roa: 1) E maiti tatou i roto i te hoê vea i te hoê tumu parau o te haaputapû i te mau taata o ta tatou tuhaa fenua. 2) E tapao tatou i roto i taua tumu parau ra i te hoê manaˈo aore ra hoê irava, i to tatou manaˈoraa, o te faaara i te anaanatae o te taata. 3) E faaineine tatou i te hoê omuaraa parau poto oia hoi te aroharaa auhoa, hoê uiraa aore ra hoê pereota o te haafaufaa ra i te hoê manaˈo bibilia anaanatae, e te hoê titau-manihini-raa auhoa e rave i te mau vea. Mai ta tatou e ite ra, mea ohie roa. No te aha e ore ai e faaineine e te hoê taata poro o te haere mai na muri ia tatou i roto i te taviniraa?
4 I te mea hoi e te faahiti nei te “A ara mai na!” no te 8 no febuare i te uiraa e “Te mau tamarii o tei moe ê—Afea teie ati e hope ai?” E nehenehe tatou e haamata i te aparauraa mai teie e:
◼ “Te haere mai nei mâua e farerei ia oe no te tauaparau no nia i te auraa o te mau ohipa peapea e tupu ra na te ao nei, no nia iho â râ i te mau tamarii o tei moe ê. A hiˈo na eaha ta teie tumu parau e parau ra...”
5 Te faahiti nei “Te Pare Tiairaa” no te 1 no febuare i teie uiraa e: “E faatupu anei i te hoê tauiraa i te pae faaroo i teie nei?” E nehenehe tatou e parau e ma te pûpû atu i te tamatahitiraa aore ra te vea e:
◼ “Te parau-pinepine-hia nei e eiaha roa ˈtu e paraparau no nia i te haapaoraa, no te mea te faatupu nei teie tumu parau i te mau aimârôraa rahi. Eaha to oe manaˈo?” I muri iho, e faaite tatou i te hoê tuhaa iti o te tumu parau.
6 E nehenehe tatou e pûpû i te tumu parau ra “Ua faataa aˈena anei te Atua i to tatou oraraa no a muri aˈe?” piahia i roto i “Te Pare Tiairaa” no te 15 no febuare: E huru aravihi to teie omuaraa parau:
◼ “I te roaraa o te Aamu, ua haafifihia te feruriraa o e rave rahi taata no nia i te tumu parau o te oraraa i faataa-aˈena-hia. Ua riro te reira ei tumu no te mau aimârôraa parau o tei aratai i te Reforomatio, e tae noa ˈtu i roto roa i te Ekalesia katolika iho, ua riro ei aimârôraa parau o tei faatupu i te riri e rave rahi senekele. Noa ˈtu e ua iti te tuatapaparaa i teie nei mahana, te vai noa nei râ te fifi. O vai te taata o te ore e hinaaro e ite ahiri e ua faataa-aˈena-hia anei to ˈna oraraa no a muri aˈe? Te faataa ra teie tumu parau e nafea ia ite i te pahonoraa au i taua uiraa ra...” E pûpû tatou i te tamatahitiraa i taua vea ra.
7 Hou e haere ai e poro, no te aha e ore ai e faahiti faahou i ta tatou faaiteraa e te tahi atu taata poro ia ore tatou ia taiâ? E noaa mai ïa ia tatou i te tahi mau manaˈo faufaa ia aravihi atu â tatou e ia papu maitai tatou.
8 A fatata noa mai ai te hopea o te faanahoraa o te mau mea i teie mahana, ia faaoioi ïa tatou no te tauturu i te mau taata aau rotahi ia haere mai i rapaeau ia Babulonia Rahi (Apo. 18:4)! E tuhaa rahi ta Te Pare Tiairaa e te A ara mai na! i roto i taua ohipa ra o te ore e rave-faahou-hia. E haamauruuru anaˈe ia Iehova i te horoaraa mai ia tatou nei i taua mau mauhaa ra faahiahia roa.