Te parau apî o te Basileia e pûpûhia na te ao taatoa i te taime au
1 I te sabati 23 no eperera, e hohorahia te hoê oreroraa parau taa ê i nia i te tumu parau putapû mau: “Te fatata mai nei te hopea o te haapaoraa hape.” I te hopea o te putuputuraa o taua mahana ra e operehia Te parau apî o te Basileia e maha api o te haaferuri. E operehia te poroi apî na te ao taatoa i te roaraa o na hebedoma e toru i muri aˈe, mai te 24 no eperera e tae atu i te 14 no me.
2 I te mau vahi atoa, tei roto te mau taata i te fifi. I te mau vahi atoa ratou e noho ai, ua teimaha ratou i te mau peapea. E riro ïa Te parau apî o te Basileia ei mea faufaa mau no te feia e tapitapi mau ra no nia i te mea e tupu ra, no te mea te aratai nei te reira i to ratou ara-maite-raa i nia i te Parau a te Atua, te pu aˈoraa aueue ore no te taata (Sal. 119:105). Te tiai ru nei tatou i te noaa mai i te 23 no eperera i Te parau apî o te Basileia. Mai teie atu nei, e mea rahi te ohipa no te faaineine i te pororaa puai e toru hebedoma.
3 Te faaitoitohia nei te taata tataitahi ia apiti mai: O vai te nehenehe e apiti i roto i taua ohipa ra? E mea papu te tiai ru nei te feia tei riro aˈena ei feia poro i te rave i te reira! E te feia ïa e haapii ra e e haere tamau ra i te mau putuputuraa a te amuiraa? Te putuputu mai nei vetahi e o tatou aita i maoro aˈenei e te rave ra i te mau tutavaraa tamau. Mai te peu e te faaau nei ratou i to ratou oraraa e te mau faaueraa tumu bibilia, te faaî ra anei ratou i te mau titauraa no te riro mai ei feia poro i te Basileia? E nehenehe te Ite e faatere ra i te haapiiraa e tauaparau i taua uiraa ra e te taata haapii e, mai te peu e te hinaaro ra o ˈna e poro, e tuatapapa ïa e piti matahiapo e o ˈna i te mau tumu parau i te api 99 o te buka Organisés pour bien remplir notre ministère. Ia rave-oioi-hia te reira, ia nehenehe te feia atoa e faaî ra i te mau titauraa no te riro ei feia poro bapetizo-ore-hia ia apiti rahi i roto i taua ohipa taa ê ra. E faaitoitohia i te feia haapii i te Bibilia eita e riro ei feia poro bapetizo-ore-hia ia horoa i Te parau apî o te Basileia i to ratou mau hoa e te mau melo o to ratou utuafare.—Hiˈo Te Pare Tiairaa no te 15 no novema 1988, api 17, paratarapha 8 (farani).
4 E ere teie ohipa i te mea fifi; e nehenehe te mau taata e apiti mai. I te haapiiraa bibilia o te hebedoma e te utuafare, e faanaho ïa te mau metua i te mau faaineineraa ia nehenehe te melo tataitahi o te utuafare ia ineine maitai no te pûpû i Te parau apî o te Basileia i roto i te pororaa na te mau fare. E mea maitai, i roto i te rahiraa o te tupuraa, ia faaohipa i te hoê faaiteraa ohie. I muri aˈe i te hoê omuaraa parau poto, a faaite i Te parau apî o te Basileia i te taata e a faaitoito ia ˈna ia taio. Ia anaanatae o ˈna, a tapao i te reira no te faahaere â i te aparauraa i te tahi atu taime (Kor. 1, 3:6, 7). Te ravea e manuïa ˈi o te hoê ïa faaiteraa ohie e te faaineine-maitai-hia.
5 E “rahi â te rave i te ohipa” i te mau avaˈe eperera e me. E horoa Te taviniraa o te Basileia no te avaˈe i mua i te tahi atu â mau haamaramaramaraa i roto i te api hau “Ia rahi â te rave i te ohipa a te Fatu.”—Kor. 1, 15:58.