E titau manihini anaˈe i to tatou taata-tupu ia pee i te taata rahi roa ˈˈe
1 Ia au i te Mataio 5:14, ua parau Iesu i ta ˈna mau pǐpǐ e: “O outou te maramarama o teie nei ao.” E tia ia ratou ia paraparau na te mau vahi atoa no nia i te Basileia o te Atua e te mau faanahoraa î i te here ta ˈna i rave no te faaora, na roto i te arai o Iesu. Ma te haamanaˈo noa i teie ohipa, e pûpû tatou i te buka ra Te taata rahi roa ˈˈe i ora aˈenei i te avaˈe titema. Teie te tahi mau manaˈo ta tatou paha e hinaaro e apee.
2 I muri iho i te faaiteraa o vai tatou, e nehenehe tatou e parau na roto i ta tatou iho mau taˈo e:
◼ “Te aniani nei e rave rahi eaha mau na te huru o Iesu i to ˈna oraraa i nia i te fenua nei. I to oe manaˈoraa, i roto i teihea mau tuhaa i taa ê ai o ˈna ia vetahi ê? [A vaiiho ia pahono.] Te faahiti ra teie buka faahiahia roa, Te taata rahi roa ˈˈe i ora aˈenei, i te mau tuhaa faufaa roa o to ˈna oraraa e ta ˈna taviniraa e e ite atoa tatou eaha mau na to ˈna huru. I muri iho i to ratou taioraa, ua manaˈo vetahi e ua matau roa ratou ia ˈna, ua tufa atoa i to ˈna mau mauiui, e ua ite roa ˈtu i ta ˈna taviniraa.” A huti i te ara-maite-raa i nia i te hohoˈa matamua o te buka to reira te papairaahia te tumu parau. A faaite i muri iho i te omuaraa parau, e a taio i te paratarapha piti i raro aˈe i te upoo parau iti “Te maitai e noaa mai na roto i te tuatapaparaa i to ˈna parau” a pûpû atu i te buka.
3 E nehenehe atoa tatou e parau e:
◼ “I teie area matahiti, te manaˈo nei te mau taata ia Iesu. Tera râ, no te mau ohipa iino atoa e tupu ra na te mau vahi atoa o te ao nei, te uiui nei paha vetahi e te haapao mau ra anei Iesu ia tatou. E oe, eaha to oe manaˈo?” A vaiiho i te taata ia pahono. A hohora te buka Te taata rahi roa ˈˈe i te pene 24 e a faaite poto noa no te aha Iesu i tonohia mai ai i nia i te fenua. A taio i muri iho Ioane 15:13 ma te haapapu i te here rotahi o Iesu no to ˈna taata-tupu. E haamanaˈo tatou e rave i te mau vea hopea, hoê vea iti aore ra hoê api parau iti tano, no te pûpû atu i te taata mai te peu e eita o ˈna e farii i te buka.
4 Teie te tahi manaˈo:
◼ “Te imi nei te rahiraa o te mau taurearea i te hoê hiˈoraa no te apee, mea varavara râ te mau hiˈoraa maitatai. Ua vaiiho mai Iesu Mesia i te hoê hiˈoraa tia no tatou paatoa. [Taio Petero 1, 2:21.] Ua niuhia to ˈna oraraa taatoa i nia i ta ˈna haamoriraa i to ˈna Metua i nia i te raˈi. I to oe manaˈoraa, eaha te tupu ahiri e e tutava e rave rahi mau taata no te pee ia ˈna?” A vaiiho i te taata ia pahono. A tuatapapa i te paratarapha toru i te api na mua noa ˈˈe te api hopea o te buka, i reira te faataaraahia te mau huru maitatai o Iesu. A faataa nafea te buka ra Te taata rahi roa ˈˈe e nehenehe ai e tauturu ia tatou tataitahi ia riro mai ei mau kerisetiano maitai roa ˈˈe.
5 E hinaaro paha tatou e faaohipa i te hoê manaˈo mai teie e:
◼ “Ia faahitihia Iesu Mesia, e rave rahi te manaˈo ra ia ˈna mai te hoê aiû anei, aore ra hoê taata e mauiui ra. Ua taotiahia to ratou manaˈo no nia ia Iesu i to ˈna fanauraa e to ˈna poheraa. Aita e faahiti-pinepine-hia te mea maitai roa ˈˈe ta ˈna i parau e i rave i te roaraa o to ˈna oraraa. No nia te mau mea atoa ta ˈna i faatupu i te mau taata atoa tei ora na. No reira e mea faufaa ia ite hau atu â tatou eaha te mea faahiahia roa ta ˈna i rave no tatou.” Taio Ioane 17:3. A faaite i te api matamua o te omuaraa o te buka Te taata rahi roa ˈˈe e a taio i te paratarapha maha. A haapapu e nehenehe e noaa mai teie buka e a faaite nafea ia faaohipa no te haapiiraa tataitahi.
6 Ia ara tatou e tapao i te anaanatae e te mau buka vaiihohia, no te faatupu i te mau hoˈi-faahou-raa e farerei. A nehenehe noa ˈi, e imi anaˈe ma te itoito i te mau taata aau rotahi, e e tauturu tatou ia ratou ia riro ei mau pǐpǐ a to tatou Faaora, Iesu Mesia.—Mat. 16:24.