Ia anaanatae tatou i te mau vea i te roaraa o te avaˈe atopa
1 Te vai ra i roto i Te Pare Tiairaa e te A ara mai na! te hoê poroi tamahanahana e te faaitoito no nia i te parau apî maitai mure ore. No te anaanatae i te mau vea, e tia ia rave i te taime no te taio maite ma te feruri e nafea te mau tumu parau i roto e faaara i te anaanatae o te mau taata o te tuhaa fenua.
2 Na mua roa, ia matau ïa tatou i te mau tumu parau i nia i te api matamua. E pinepine na te mau hohoˈa i te api matamua e turai i te mau taata ia farii i te mau vea. Ia maiti tatou i te mau tumu parau o te, i to tatou manaˈoraa, huti i te ara-maite-raa o te mau taata o ta tatou e farerei i roto i ta tatou tuhaa fenua. Hoê â anei haapaoraa ta te rahiraa? Eaha ta ratou mau tapitapiraa matamua? Mai te peu e e tapea mai tatou i teie mau manaˈo i roto i to tatou feruriraa, e nehenehe ïa tatou e faaineine i te hoê faaiteraa aravihi. E tuatapapa tatou i tei pûpûhia mai i muri nei.
3 Mai te peu e e pûpû tatou i “Te Pare Tiairaa” no te 1 no atopa, e nehenehe tatou e haafaufaa i te tumu parau: “Te Bibilia: eaha to ˈna faufaaraa mau?” e e parau e:
◼ “E nehenehe e itehia te hoê Bibilia i roto fatata i te mau utuafare atoa o te tuhaa fenua. Te manaˈo nei te rahiraa e te vai ra i roto te hoê parau faufaa taa ê mau.” E nehenehe tatou e ui roa ˈtu e: “I to oe manaˈoraa, na te aha i faariro i te Bibilia ei buka otahi?” aore ra: “Ia manaˈo anaˈe oe, na te aha e tauturu hau atu â i te mau taata ia haafaufaa i te Bibilia?” I muri aˈe i te pahonoraa a te taata, e nehenehe e faahaere â i te aparauraa na roto i te mau manaˈo tano mai teie te huru: “Te vai ra te mau haapapuraa tia o te faaite ra e mea faauruahia te Bibilia e te Atua e o te hoê atoa aratai o te nehenehe e tiaturihia. Tei roto te hoê ite o te nehenehe e haafanaˈo ia tatou i te ora mure ore. [Taio i te Ioane 17:3.] Te faatura nei e rave rahi taata i te reira, aita râ i ite e nafea ia faaohipa. Te faataa ra teie tumu parau o Te Pare Tiairaa e nafea oe iho e nehenehe ai e faaohipa i te Bibilia no te ite i te mau pahonoraa o ta oe mau uiraa no nia i te oraraa no a muri aˈe. Te hinaaro nei au e vaiiho atu i teie numera. Mai te peu e e anaanatae oe i te taioraa, e faataa ïa vau ia oe ia hoˈi anaˈe mai au e nafea e noaa tamau ai ia oe Te Pare Tiairaa i to oe fare.”
4 Ma te faaohipa i “Te Pare Tiairaa” no te 15 no atopa, mea au aˈe paha na tatou e rave i te hoê faaiteraa ohie mai teie:
◼ “Ua ere-aˈena-hia paha e tatou i te hoê taata tei herehia. Te horoa nei teie tumu parau i teie uiraa e: ‘Eaha te huru o te feia pohe?’ I to oe manaˈoraa, eaha te tupu ia pohe te hoê taata? [A vaiiho i te taata ia pahono.] Mai te peu e e hinaaro oe e ite i te pahonoraa a te Bibilia i teie uiraa, e oaoa vau i te vaiiho atu i teie vea.” Ia ineine tatou i te pûpû i te api parau iti Eaha te tiaturiraa no te feia herehia e tatou tei pohe? mai te peu e e hinaaro te taata e taio i te hoê mea poto noa.
5 Te tuatapapa nei te “A ara mai na!” no te 8 no atopa i te hoê o te mau tupuraa e rave rahi o te haapapu ra i te toparaa o te haapaoraa. Ma te faaohipa i te mau tumu parau i raro aˈe i te upoo parau “Te turu nei te haapaoraa”, e nehenehe tatou e ui e:
◼ “Ahiri tei te fenua nei Iesu i teie mahana, i to oe manaˈoraa, eaha to ˈna manaˈo no nia i te haavîraa uˈana e haaati ra ia tatou? [A vaiiho i te taata ia pahono.] Ua haapii mai Iesu ia tatou e e tia ia tatou ia here i te mau taata atoa, to tatou mau enemi atoa. Te apiti nei râ e rave rahi faaroo o te faahua parau nei e kerisetiano ratou i roto i te mau aroraa politita. I to oe manaˈoraa, i roto i teihea faito e ohipa ˈi te reira i nia i te feia o te hinaaro ra e ora ia au i te mau haapiiraa a Iesu? [A vaiiho i te taata ia pahono.] Te tuatapapa nei teie A ara mai na! i teie uiraa e te faaite ra eaha te ravea ta te Basileia o te Atua e horoa mai.”
6 Ia tutava tatou i te pûpû i te mau vea i te mau uputa atoa, noa ˈtu e eita ta tatou e nehenehe e haamata i te hoê aparauraa bibilia. Ua ineine te rahiraa o te mau taata o te farii i te mau vea i te horoa i te hoê ô haihai no te ohipa haapiiraa o te Bibilia na te ao nei.