Te pororaa i roto i te mau tuhaa fenua poro-pinepine-hia
1 E rave rahi mau amuiraa o te poro pinepine nei i roto i to ratou tuhaa fenua, e te oaoa rahi ra matou (Mat. 24:14; Tim. 1, 2:3, 4). Te faatupu ra te reira i te tahi mau fifi, te faaite nei râ te mau ohipa i tupu e nehenehe te reira e haapaiumahia ia ineine maitai tatou no te faaruru i te mau huru tupuraa atoa.
2 E mea faufaa roa te mau omuaraa parau aravihi: E mea faufaa hoê aore ra e rave rahi omuaraa parau ineine maitai. E ara tatou ia faaô mai te mau manaˈo papu o te faataa ra i te faufaaraa taatoa o to tatou mau tere pinepine.
3 Te horoa ra te buka Haaferuriraa e rave rahi mau omuaraa parau tano. Te vai ra e toru i te api 8 i raro aˈe i te upoo parau iti “I roto i te mau tuhaa fenua e poro-pinepine-hia.” E tamau tatou i ta tatou e manaˈo e faaohipa i roto i to tatou tuhaa fenua.
4 I roto i te mau tuhaa fenua poro-pinepine-hia, ua noaa i te feia poro i te tahi mau aparauraa maitatai roa ma te faaohipa i te mau haamaramaramaraa i roto i te vea o te fenua. Te horoa ra te buka Haaferuriraa e toru hiˈoraa e nafea ia rave. E hiˈo tatou i te piti o te omuaraa parau i raro aˈe i te upoo parau iti “Taparahiraa taata/Te oraraa ma te ino ore” i te api 7 e na omuaraa matamua e piti i raro aˈe i te upoo parau iti “Parau apî” i te api 6.
5 Ta outou iho mau omuaraa parau matamua: Eiaha tatou e haamarirau i te faaineine e i te faaohipa i te mau parau haamataraa ma te pee i te hiˈoraa o te mau omuaraa parau faahitihia i roto i te buka Haaferuriraa. E paraparau tatou mai ta tatou i matau e na roto i ta tatou mau parau. Hou e faaohipa ˈi i roto i te tuhaa fenua, no te aha e ore ai e faahiti atu i mua i te hoê taata poro aravihi?
6 Ei hiˈoraa, e nehenehe tatou e parau e:
◼ “Mai to ˈu haereraa mai i te taime matamua, [e faahiti tatou i te hoê ohipa apî o te haapeapea ra i te feia o te oire]. Te haapeapea nei teie fifi ia tatou paatoa, e te tapitapi nei te feia o te oire. Papu e ua anaanatae oe i teie ohipa. [E faafaaea rii tatou no te vaiiho i te taata ia paraparau.] No te mau ohipa e tupu ra na te ao nei, aita anei oe e farii ra i teie parau a te peropheta ra o Ieremia, i te pene 10, e i te irava 23 Ier 10:23?” E taio tatou i te irava e e ani tatou i te taata i to ˈna manaˈo, e i muri iho e taio tatou i te hoê irava i roto i te mau Papai o te faaite ra e nafea Iehova e faatitiaifaro i taua fifi ra.
7 E nehenehe atoa tatou e parau e:
◼ “E mea papu e ua faaroo oe i te mau parau apî i teie mahana e [e faahiti tatou i te hoê ohipa papu]. Peneiaˈe ua manaˈo oe mai ia ˈu nei e te ohipa ra te reira i nia ia tatou paatoa. [E faafaaea rii tatou no te vaiiho i te taata ia paraparau.] Te tiaturi nei tatou e e horoa mai te mau mana faatere i te hoê ravea no te tahi noa taime i taua fifi ra; tera râ, te faaite nei te Bibilia e nafea te fifi ia faatitiaifaro-roa-hia.” E huti tatou i te ara-maite-raa i nia i te hoê irava o te mau Papai o te faataa ra i te mea ta te Atua e rave.
8 “No te aha outou e hoˈi pinepine mai ai?” Te vai ra te mau pahonoraa tano i taua patoiraa ra i roto i te buka Haaferuriraa i te api 12 i raro aˈe i te upoo parau iti “No te aha outou e hoˈi pinepine mai ai?” Ma te ore e tiai ia parauhia mai tatou, e nehenehe tatou e horoa i te hoê faaiteraa maitai ma te faaohipa i te mau taime atoa no te faataa e no te here no te Atua e no to tatou taata-tupu tatou e haere ai e farerei i te taata. No taua tumu parau ra, e mea anaanatae paha ia aparau i nia i te mau parau a Iesu i roto i te Ioane 21:15-17.
9 E tamau noa tatou i te haapaiuma i te mau fifi ta te mau tuhaa fenua poro-pinepine-hia e faaite ra, tae roa i te mahana e parau ai Iehova e ua oti. Ia rave tatou i te hoê faaotiraa, ma te tiaturi i nia i ta ˈna aratairaa, i ta ˈna parururaa e i ta ˈna haamaitairaa e tae noa ˈtu i te hopea.—Mat. 28:19, 20.