Nafea ia faaineine i te omuaraa parau anaanatae?
1. No te aha mea faufaa ˈi te omuaraa parau maitai?
1 Ia pûpûhia mai te tahi amuamuraa au roa e tupu to tatou hiaai e amu i to muri mai maa, e ere anei? Hoê â huru no te pororaa. Mea faufaa te omuaraa parau maitai ia nehenehe tatou e faatupu i te aparauraa Bibilia anaanatae. Ua rau te mau omuaraa parau maitai, mea taa ê te tumu parau e te roa. Mai te maa râ, mea titauhia na mua ia feruri maitai hou a faaineine ai. (Mas. 15:28) Nafea ïa ia faaineine i te tahi omuaraa anaanatae?
2. Nafea ia faaineine i te omuaraa parau anaanatae?
2 A maiti i te mau tumu parau anaanatae: E mea tia ia rave i te omuaraa parau anaanatae. Aita anaˈe, e nehenehe paha te taata e faaoti i te aparauraa. No reira, a faaineine ai, a feruri i te mau tapitapiraa a te taata o te tuhaa fenua. Te hinaaro ra anei ratou i te hoê faatereraa maitai, te oraraa utuafare oaoa aore ra ia faaorehia te tamaˈi? Mea au roa na te taata e horoa i to ratou manaˈo, a faaineine ïa i te tahi uiraa manaˈo no te haaferuri atu. E nehenehe anei oe e faaohipa hoê o te mau hiˈoraa o Ta tatou taviniraa i te Basileia e e faatano i te reira i ta oe tuhaa fenua? No te aha e ore ai e tamata i te tahi mau omuaraa i ta oe arui haamoriraa utuafare?
3. Nafea ia faatano i te omuaraa parau i te taˈere e huru oraraa o te taata?
3 A haapao i te taˈere e te mau tiaturiraa o te taata: I te tahi mau fenua, e mea tia ia faaite oioi tatou i te tumu o to tatou tere. I te tahi atu râ mau vahi, e omua tatou ma te tahi mau parau aroha e ma te faataa atoa paha o vai tatou. Te vai atoa ra te tahi mau fenua mea puai te mana a te haapaoraa Kerisetiano, e nehenehe ïa tatou e faahiti oioi atu i te manaˈo o te Bibilia. (Ohi. 2:14-17) I te mau vahi râ e ere te taata i te Kerisetiano aore ra aita ta ratou e haapaoraa, mea maitai aˈe paha ia faahiti i te Bibilia ia hoˈi faahou atu tatou.—Ohi. 17:22-31.
4. Mai te aha te huru o ta tatou mau parau matamua e tia ˈi?
4 Te mau parau matamua: A maiti maitai i ta oe mau parau matamua. Mea maitai aˈe ia faaohipa i te mau pereota poto e te ohie. Mea faufaa atoa ia oraora ta tatou huru paraparau. E mata ataata e te haavare ore to tatou e tia ˈi! E faaite ïa te reira e te tâuˈa ra tatou i te taata. E tauturu mai te peeraa i tera mau manaˈo ia faaineine i te mau omuaraa parau anaanatae mau. E faaitoito ïa te reira i te taata o ta tatou tuhaa fenua ia haere mai e tamaa i “te amuraa a te Fatu ra [o Iehova].”—Kor. 1, 10:21.