Ia ueue rahi tatou, e ma te aau tae
1 Ua ite te feia faaapu atoa e mai te peu e e ueue rahi ratou, e ooti rahi atoa ratou, mai te peu râ e ueue ratou ma te faaherehere, e mea papu e mea iti ta ratou e ooti mai (Kor. 2, 9:6). Te haapao maitai nei ratou ia ueue rahi i te mau huero ma te ara i to ratou tupuraa. E tia ia tatou ia ohipa e te hoê â huru feruriraa ia faaite tatou i te mau buka ma te ore e haamâ i te ani i te hoê tino moni ei tauiraa. Te imi nei tatou ia vaiiho atu i te mau taata atoa ta tatou e farerei i te mau uputa. Te hinaaro ra tatou e horoa i te feia e au ia ite ratou i te aroha faito ore o Iehova e ia noaa i te tiaturiraa o te Basileia.
2 Ia hiˈo tatou te teitei noa ra anei te mau vea, te mau vea iti, e rave rau atu â, i nia i te paepae, inaha e nehenehe ratou e tauturu i te mau taata e au o te tuhaa fenua ia ite i te parau mau (a hiˈo i te Mataio 25:25)? Te haamarirau ra anei tatou i te tahi mau taime ia pûpû i te mau vea aore ra te tahi atu mau buka, i te aparauraa matamua no te mea te haama nei tatou i te faaite i te moni o te buka?
3 Ua ite te feia poro aravihi e huru maitai to te feia e farii ra i te poroi ia faataahia ˈtu ia ratou ma te ohie e te parau-roa-raa ˈtu e te pûpûhia nei teie mau buka ei tauiraa i te hoê ô e na tatou ïa e faaite atu i te moni.
4 E nehenehe to tatou aau tae e tapeapeahia ia faaite tatou i te tamatahitiraa aore ra i te hoê buka, no te mea te manaˈo ra tatou e mea moni roa no te taata ta tatou e paraparau ra. No reira, e haamarirau rii vetahi feia poro ia paraparau no nia i te pûpûraa e e faaite noa ïa ratou i te api parau iti. E tia ia tatou ia haapaiuma i teie fifi. Teie ta te hoê tiaau haaati i te Hau amui no Marite i papai e: “Ia haere au e farerei i te mau amuiraa, ua haafaufaa vau i te manaˈo e e faaite i te pûpûraa ma te tuutuu ore e te reira i te uputa tataitahi. E tia ia vaiiho i te taata e faaroo ia faaoti. E ere na tatou e rave i te faaotiraa no ˈna. Ua hoˈi mai te feia poro mai te tuhaa fenua e ua parau e: “Aita vau i manaˈo e ua anaanatae mau ratou, tera râ ua faaite au i te pûpûraa e ua farii ratou.”
5 Eiaha tatou e faatupu i te mau manaˈo hape ia faaohipa râ tatou i te hoê huru feruriraa maitai. E nehenehe tatou e papu e e tauihia ta tatou mau buka e te hoê tino moni tano maitai. I Beresilia, ua parau te hoê taata poro e: “Eiaha e manaˈo e aita e navai te moni a te tahi mau taata no ta tatou mau buka. Te haamâuˈa ra te mau taata e rave rahi i te moni eiaha noa no te mau mea faufaa ore noa, no te mau mea atâta atoa râ, mai te avaava. Ua haamarirau rii te hoê taata poro i te pûpû i te tamatahitiraa i te hoê taata paari e ahu tahito e ua pe te fare. Aita oia i tamatahiti noa ia ˈna, ua tǎpǔ râ oia e hamani o ˈna i te hoê afata rata i to ˈna uputa, no te mau vea anaˈe.”
Mai te peu e te mǎtaˈu noa ra tatou i roto i teie tuhaa, peneiaˈe aita tatou i faaineine. Teie te tahi mau manaˈo:
E nehenehe tatou e parau e:
◼ “Te horoa ra teie buka i te mau haamaramaramaraa anaanatae i nia i te tumu parau. E oaoa mâua i te vaiiho ia oe ra no te hoê tino moni iti e . . . tara. E papu ia ˈu e oaoa oe no te mea i papaihia i roto.”
E nehenehe outou e parau faahou e:
◼ “Te moni e faahitihia e mea haihai roa no te aufau noa i te mau haamâuˈaraa neneiraa, haaponoraa e te faaôraa mai i te mau taoˈa i roto i te fenua. Oia mau, e ô teie ohipa i roto i te tuhaa o te ohipa haapiiraa na te ao taatoa nei o tei manuïa na roto i teie mau ô.”
E nehenehe tatou e parau atoa e:
◼ “Te horoa nei matou i ta matou mau buka i te mau taata atoa o te imi ra ia taa maitai i te Bibilia. Mai te peu e e hinaaro oe ia noaa mai ta oe Bibilia, e oaoa vau i te horoa ˈtu ia oe ra no te tino moni e . . . tara.”
6 Ia pûpû ratou i te mau vea, e faaite te tahi mau taata poro i te api i roto e e parau ratou e:
◼ “Mai te oe e ite ra i ǒ nei, e manuïa ta matou ohipa na roto i te mau ô. Ma te farii i te taio i teie mau buka i te hoê tino moni iti e . . . tara, te turu nei ïa oe i teie ohipa.”
7 Eiaha tatou e faaea i te ueue i te mau huero o te Basileia no te mea te haama ra tatou i te faataa i te mau taata e te vaiihohia nei ta tatou mau buka no te hoê tino moni. I roto i te totaiete o te haamâuˈaraa o ta tatou e ora ra i roto, e haafaufaa rahi te mau taata i te hoê taoˈa ta ratou i hoo mai i tei noaa mai ia ratou ma te tamoni ore. A hiˈo noa i te rahiraa o te mau api parau aore ra mau vea faaruehia i roto i te mau aroâ no te mea ua faarirohia ratou ei mea faufaa ore. Te oaoa ra te mau taata aau mehara no te parau apî maitai ta tatou e faaite nei ia ratou i te afai mai i ta ratou turu i te pae moni. — A hiˈo i te Mataio 10:42.