Te porotarama o te tairururaa taa ê i mua e hoê mahana
1 Te haafaufaa noa nei â tatou ia Iesu Mesia maoti i ta tatou haapiiraa o te buka Te taata rahi roa ˈˈe i ora aˈenei. E mea tano te tumu parau o te mahana tairururaa taa ê o te tupu i te avaˈe setepa “Ia apee maite tatou i to tatou Hiˈoraa maitai roa ˈˈe”. Te taa maitai ra ia tatou i te auraa e apee ia Iesu Mesia.
2 Noa ˈtu ehia rahiraa matahiti parau mau, e faaitoitohia te mau taata atoa e putuputu mai ia riro hau atu â mai te Mesia. E noaa i te mau taurearea te mau aˈoraa no te faaruru i te mau fifi ta ratou e farerei no nia i te mau haapiiraa, te mau faaanaanataeraa manaˈo e te ohipa materia. Te vai ra i te tairururaa te mau oreroraa parau, te mau aamu i orahia e te mau faahiˈoraa o te faaite nafea ia patoi i te mana o te ao e ia pee i te hiˈoraa i vaiihohia e te Mesia. — Petero 1, 2:21.
3 E faaite te feia i pûpû ia ratou ia Iehova i mua i te rahiraa e te pee nei ratou i te Mesia ma te bapetizo ia ratou. Hou te bapetizoraa, e vauvauhia te hoê oreroraa parau huiraatira o te faaitoito no nia i teie tumu parau. E tia i te feia e opua ra e bapetizo ia ratou i te mahana tairururaa taa ê i mua mai ia faaite na mua ˈˈe i te tiaau-peretiteni o ta ratou amuiraa. E taime ïa to ˈna no te ani i te mau matahiapo ia hiˈopoa e te feia e bapetizo i te mau uiraa faataahia.
4 E vauvau te hoê taeae orero-ratere i te oreroraa parau matamua te tumu parau “Ia apee tatou i to tatou Hiˈoraa maitai roa ˈˈe—Ihea tatou e arataihia ˈi?” E titau manihini tatou i te mau taata farii maitai atoa i taua tairururaa faaitoito ra e tano no te haapaari i te faaroo. Aita ˈtu e mea faahiahia aˈe o te apeeraa ïa i te Hiˈoraa maitai roa ˈˈe, o Iesu Mesia. — Mat. 19:27-29.