Mau pahonoraa i ta outou mau uiraa
◼ E mea tano anei ia nenei faahou i te mau buka a te Taiete no te opere atu?
I roto i te roaraa o te mau matahiti, ua nenei te Taiete i te mau rahiraa buka huru rau o te tatara ra i te mau tuhaa atoa o te ite bibilia. Te tatarahapa nei te mau taata o tei ite i te parau mau aita i maoro aˈenei i te tahi taime i te oreraa e fanaˈo i te mau buka ta te Taiete e ore e nenei faahou. E mea fifi no vetahi ia roaa mai i te reira e ua opua te tahi i te nenei faahou e te horoaraa ˈtu na roto i te mau huru taa ê, i nia i te api parau anei aore ra i nia i te hoê matini roro uira. I roto i te tahi tupuraa, te imi nei taua faanahoraa ra i te hoê tapao i te pae faufaa.
Te ite nei te “tavini” haapao maitai i to tatou mau hinaaro i te pae varua e te horoa mai ra “i te hora mau ra”. (Mat. 24:45.) Ia tae i te taime e hinaarohia no te nenei faahou i te mau buka tahito, e rave te Taiete i te mau faanahoraa no te na reira. No reira, te nenei faahou ra o ˈna i te mau buka tahoêhia o te Te Pare Tiairaa e te vai ra no te taatoaraa. Tera râ, ia opua anaˈe vetahi, no ratou iho, i te tataipiti i te neneiraa e i te opere te mau buka a te Taiete, e tupu mai te mau fifi faufaa ore.
E faatupu te tataipitiraa i te neneiraa e te opereraa i te mau buka bibilia no te hoê tapao i te pae faufaa i te mau fifi iino mau. No te reira, teie ta Te taviniraa o te Basileia no setepa 1977 i parau i raro aˈe i te upoo parau Mau pahonoraa i ta outou mau uiraa: “E mea hau aˈe eiaha ia faaohipa i te mau putuputuraa, tei tupu i roto i te Piha o te Basileia, i roto i te tuhaa o te haapiiraa buka aore ra i roto i te mau tairururaa a te nunaa a Iehova, no te hoo i te mau taoˈa aore ra i te rave i te faaiteiteraa no te hoê ohipa tapihooraa. Mai te reira, e horoa tatou i te ara-maite-raa i te mau faufaa pae varua e au, e vaiiho tatou i te mau ohipa tapihoo i te parahiraa tano.” E mea faufaa e eiaha roa te faatianianiraa o te faufaa e turai ia tatou ia faaohipa i te ohipa tapihooraa i te Parau a te Atua aore ra i te mau papai bibilia.