E faaite anaˈe i te faaau ohie i roto i te pororaa
1 E parauhia na i te tahi taime e horoa te huru rau i te putaputa i te ora. E mea pinepine, e faaanaanatae atu â i te hoê tumu parau ma te tatara i roto i te hoê huru taa ê. Mai te reira atoa i roto i te pororaa. Mai te peu e eita tatou e ara, e mea papu e riro mai ta tatou mau faaiteraa ei mau parau matau-noa-hia. Mai te peu e te reira noa ta tatou omuaraa parau, e nehenehe te reira e riro mai ei mea taahoa no tatou e no te mau taata e faaroo mai. E faaite anaˈe i te mǎrû i roto i te pororaa. Tera râ, nafea ia tatou e tapae ai?
2 Maoti i te parau noa e “Iaorana oe, te paraparau nei matou i to matou mau taata tapiri i te parau apî maitai o te Basileia”, no te aha e ore ai e feruri i te huru e taui tatou i ta tatou mau parau haamataraa? Te vai ra i roto i te buka Haaferuriraa, i te mau api 9-15, te hoê tabula o te mau omuaraa parau no nia e 18 na tumu parau taa ê. I roto i te rahiraa o te mau tupuraa, e horoahia mai e piti na omuaraa parau.
3 Mai te peu e faaite tatou i te vea iti “Te haapao mau ra anei te Atua ia tatou?”, e nehenehe tatou e faaohipa i te omuaraa parau i mua nei i raro aˈe te upoo parau “Oraraa/Oaoaraa”, i te api 14:
◼ “Te tauaparau nei matou e te feia e haapeapea nei ma te aau rotahi no te huru maitai o te oraraa i teie mahana. Te aniani nei vetahi e mai te peu e e nehenehe e ite i te oaoaraa mau. Te faaite nei teie vea iti i te hoê manaˈo faaitoito o te turai i te haaferuri.” E tatara anaˈe i te vea iti i te api 25 e e taio anaˈe hoê aore ra e piti manaˈo faufaa o te mau paratarapha 15 e 16.
4 Te ite nei te tahi mau taata poro o te Basileia — te mau taurearea e te mau taata poro apî iho â râ, e te tahi atoa mau taata paari—e mea ohie aˈe ia haamata i te tauaparauraa e te mau api parau iti.
E nehenehe te hoê taata poro apî e parau, ma te faaohiparaa i te api parau iti “Te hoê oraraa utuafare oaoa”:
◼ “E poroi poto noa ta ˈu e faaite atu ia oe no nia i te ravea ta te Atua e rave no te tahoê e no te faaoaoa i te mau utuafare. Te hinaaro nei au e vaiiho mai ia oe ra teie api parau iti teie hoi te tumu parau Te hoê oraraa utuafare oaoa.” E na te taata poro paari o te apee ra i te taurearea e faaoti, ia au i te huru o te taata, e tia anei ia tamau i te aparauraa.
5 Mai te peu e te faaite ra te taata i te anaanatae, e nehenehe te taata paari aˈe e parau e:
◼ “Te aˈo ra te Bibilia ia tatou i nia i te tiaraa o te tane, o te vahine e o te mau tamarii i roto i te utuafare. O te Atua te Tumu o te utuafare, aita anei oe e manaˈo e o ˈna te mea ite aˈe no te parau mai e nafea ia faatere? Te hinaaro nei au e ite i to oe manaˈo i nia i te mau aˈoraa tahaa ta te Bibilia e horoa ra i te melo tataitahi o te utuafare.” E taio o ˈna i muri iho te Ephesia 5:22, 23, 28-31.
6 Mai te peu e faaite tatou i te buka Apokalupo: tatararaa hopea, eita anei e tia ia haafaufaa i te ora no a muri aˈe faahiahia mau faahitihia i roto i te Apokalupo 21:3, 4? I muri iho e taio anaˈe i te paratarapha 7, i te api 303. E ani anaˈe i te taata e faaroo ia tatou e mai te peu e mea tano anei ia tiaturi e faatupu mau â te Atua i ta ˈna mau parau tǎpǔ. Ma te hiˈopoa poto noa e o ˈna i te mau parau tohu a te Bibilia o tei tupu aˈena, e haapaari ïa tatou i to ˈna tiaturiraa i roto i te mana o te Atua no te haamaitai i te mau taata.
7 Te hinaaro nei te mau taata poro atoa i te Basileia e tavini i te tumu o te faatereraa a te Atua ma te tanu i te mau huero o te parau mau i te vahi tano, e ma te atuatu i te anaanatae. I muri aˈe i te raveraa i ta tatou tuhaa, e nehenehe tatou ma te tiaturiraa taatoa e tuu i te haereraa i mua no a muri aˈe i roto i te mau rima o Iehova. Te vai ra ia tatou te parau apî faahiahia roa ˈˈe ia tufa i to tatou taata-tupu. Ma te faaineine noa, e faaite ïa tatou i te poroi o te Basileia ma te faaau ohie, e ite ïa tatou e afea roa e vaiiho ai i te mau buka.