Te haafaufaa ra anei outou i ta Iehova i rave no te faaora ia outou?
“Ia haamaitaihia te Fatu te Atua no Iseraela; ua haapao mai hoi oia, e ua faaora i to ˈna taata.”—LUKA 1:68.
1, 2. E nafea ia faahohoˈa i te ino-roa-raa o to tatou nei tupuraa, e eaha te mau uiraa ta tatou e hiˈopoa?
TE TARAVA ra paha oe i nia i te roˈi i te fare maˈi. Tei roto oe i te hoê piha hoê â maˈi to oe e to te taata atoa i reira, aita râ e raau. Ia faaroo oe e te imi ra te hoê taote i te ravea, e tapea oe. E tiai ru oe i te parau apî o ta ˈna mau maimiraa. I te hoê mahana, faaroo aˈera oe e ua itehia mai te hoê raau! E haapaeraa rahi hoi ta tera taote i rave. Eaha ïa to oe huru? Mea papu e e faatura e e haamauruuru roa oe i te taote tei imi i te ravea ia ora mai oe e te tahi atu.
2 E au ra e ua faarahihia te tupuraa, tei roto râ tatou i te hoê tupuraa mai tera atoa. Mea ino roa ˈtu â râ to tatou nei i tei faataahia mai nei. E hinaaro iti rahi tatou i te hoê faaora. (A taio i te Roma 7:24.) Ua rave Iehova i te haapaeraa rahi no te faaora ia tatou. Ta ˈna atoa Tamaiti. E hiˈopoa anaˈe ïa e maha uiraa faufaa. No te aha tatou e hinaaro ai i te faaoraraa? Eaha te haapaeraa ta Iesu i rave? Eaha te haapaeraa ta Iehova i rave? E nafea tatou e faaite ai e te haafaufaa ra tatou i te faaoraraa a te Atua?
Te tumu e hinaaro ai tatou i te faaoraraa
3. E nafea te hara e au ai i te hoê maˈi parare?
3 Ia au i te hoê numeraraa apî, o te fiva Paniora no 1918 hoê o te mau maˈi parare ino roa ˈˈe i roto i te tuatapaparaa o te taata, o tei haapohe e rave rahi mirioni taata. Mea rahi atu â te taata e pohe i te tahi atu mau maˈi. Mea iti te taata e peehia i te reira, o te rahiraa râ o ratou te pohe.a E faaau anaˈe râ i te hara i tera maˈi parare. A haamanaˈo i te Roma 5:12: “No te taata hoê ra i ô mai ai te ino [aore ra hara] i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” Ua peehia te taata atoa i te hara, no te mea e taata tia ore te taatoaraa. (A taio i te Roma 3:23.) Ehia ïa te pohe i te hara? O “te taata atoa” ïa ia au i ta Paulo i papai.
4. Eaha to Iehova manaˈo i to tatou oraraa, e e nafea to ˈna manaˈo e taa ê ai i to e rave rahi i teie mahana?
4 Te manaˈo ra e rave rahi i teie mahana e mea hara e e pohe iho â te taata. Te haapeapea ra ratou no ta ratou e parau ra te pohe oioi, eiaha râ no te pohe “natura” e tiai maira i te taata i to ratou ruhiruhiaraa. E moe ohie roa i te taata te manaˈo o te Atua Poiete. Mea poto aˈe to tatou oraraa i ta Iehova i opua. Inaha aita hoê aˈe taata i ora ‘hoê mahana’ i to Iehova manaˈo. (Pet. 2, 3:8) Te faaite ra hoi te Parau a te Atua e e oraraa poto to tatou mai te aihere aore ra te mahu mau ore. (Sal. 144:4; Pet. 1, 1:24) Eiaha tatou e haamoe i teie manaˈo. No te aha? Ia taa ia tatou te ino rahi o te “maˈi” ta tatou e faaruru ra, e haafaufaa ˈtu â ïa tatou i te “ravea rapaauraa,” to tatou faaoraraa.
5. Eaha ta tatou paatoa i ere no te hara?
5 No te taa i te ino rahi o te hara e te mau faahopearaa, ia maramarama ïa tatou i ta tatou i ere no te hara. Mea fifi paha no te mea ua faaere te hara ia tatou i te tahi mea ta tatou i ore i fanaˈo aˈenei. I fanaˈo na Adamu raua Eva i te oraraa taata tia roa. I te mea e e feruriraa e e tino tia roa to raua, e nehenehe ta raua e haavî i to raua mau manaˈo e huru aau e ta raua mau ohipa. E nehenehe ïa raua e faatupu noa i te mau huru maitatai roa ei tavini a te Atua ra o Iehova. Aita râ, ua patoi raua i taua ô faufaa roa ra. No to raua hararaa ia Iehova, ua ere raua e to raua huaai i te oraraa ta Iehova i opua no ratou. (Gen. 3:16-19) I te hoê â taime, ua roohia raua e o tatou i te “maˈi” ino mau ta tatou i tauaparau mai nei. Ua tano Iehova i te faautuaraa ia raua. Tera râ, te pûpû ra oia i te tiaturiraa o te faaoraraa no tatou.—Sal. 103:10.
Ta Iesu i haapae no te faaora ia tatou
6, 7. (a) I te omuaraa, mea nafea to Iehova faaiteraa e e titauhia te hoê haapaeraa rahi no te faaora ia tatou? (b) Eaha ta tatou e haapii mai i te mau tusia i pûpûhia e Abela e te mau patereareha i ora na hou te Ture?
6 Ua ite Iehova e e titauhia te hoê haapaeraa rahi no te faaora i te huaai o Adamu raua Eva. I roto i te parau tohu o te Genese 3:15, e ite tatou i te titauhia no te reira. E faaohipa Iehova i te hoê “huaai,” aore ra huero, te hoê faaora, o te haamou roa ia Satani. E mauiui atoa râ taua faaora ra, e haaparuparu-taipe-hia hoi to ˈna poro avae. Eaha ïa te auraa? Eaha hoi ta te Taata ta Iehova i maiti e faaruru?
7 No te faaora i te huitaata i te hara, e titauhia ia horoa te faaora i te ravea no te tatara i te hara, ia faite te taata i te Atua ma te faaore i te mau faahopearaa o te hara. Eaha te titauhia? Te hoê ïa tusia ia au i te mau faaiteraa matamua. I to Abela, taata haapao maitai matamua, pûpûraa i te mau animara ei tusia na Iehova, ua farii maitai te Atua ia ˈna. I muri aˈe, ua pûpû atoa te mau patereareha mai ia Noa, Aberahama, Iakoba, e Ioba tei mǎtaˈu i te Atua i te tusia ta ˈNa i au. (Gen. 4:4; 8:20, 21; 22:13; 31:54; Ioba 1:5) E senekele i muri aˈe, ua haamaramarama ˈtu â te Ture a Mose i te parau o te tusia.
8. Eaha ta te tahuˈa rahi e rave i te Mahana o te Taraehara i te mau matahiti atoa?
8 I rotopu i te mau tusia faufaa roa ˈˈe ta te Ture i titau, te vai ra o tei pûpûhia i te Mahana o te Taraehara i te mau matahiti atoa. I taua mahana ra, e rave te tahuˈa rahi i te tahi mau ohipa taipe. E pûpû oia i te mau tusia na Iehova no te tatara i te hara a te pǔpǔ autahuˈa na mua e a te mau opu e ere i te autahuˈa. E tomo te tahuˈa rahi i roto i te vahi Moˈa Roa o te sekene aore ra hiero, i reira noa oia e nehenehe ai e haere i teie noa mahana o te matahiti. I reira, e pîpî oia i te toto o te mau tusia i mua i te afata o te faufaa. I nia aˈe i taua afata moˈa ra, e fa mai te hoê ata anaana i te tahi mau taime, o te faahohoˈa ra i te vairaa mai o te Atua ra o Iehova.—Exo. 25:22; Lev. 16:1-30.
9. (a) I te Mahana o te Taraehara, o vai ta te tahuˈa rahi e faahohoˈa ra, e eaha te auraa o te mau tusia ta ˈna i pûpû? (b) Te faataipe ra te tomoraa te tahuˈa rahi i roto i te vahi Moˈa Roa i te aha?
9 Ua faaurua te aposetolo Paulo e Iehova no te faaite i te auraa o teie mau ohipa taipe. Te faahohoˈa ra te tahuˈa rahi i te Mesia ra o Iesu, e te pûpûraa i te mau tusia i te pohe o te Mesia ei tusia. (Heb. 9:11-14) E horoa taua tusia tia roa ra i te taraehara mau no e piti pǔpǔ taata, te pǔpǔ autahuˈa o na 144 000 taeae faatavaihia i te varua o te Mesia e te mau “mamoe ê atu.” (Ioa. 10:16) I to te tahuˈa rahi tomoraa i roto i te vahi Moˈa Roa, te faataipe ra ïa oia i to Iesu tomoraa i roto i te raˈi no te faaite i te faufaa o to ˈna tusia taraehara i mua i te aro o te Atua ra o Iehova.—Heb. 9:24, 25.
10. Ia au i te mau parau tohu bibilia, eaha ta te Mesia e faaruru?
10 No te faaora i te huaai o Adamu raua Eva, e haapaeraa rahi iho â te titauhia. Ia pûpû te Mesia i to ˈna ora ei tusia! Ua faataa ˈtu â te mau peropheta o te mau Papai Hebera i teie parau mau. Ei hiˈoraa, ua faaite roa te peropheta Daniela e e ‘tâpû-ê-hia’ te “Mesia te Arii” no te ‘tatara i te hara.’ (Dan. 9:24-26) Ua tohu Isaia e e patoihia, e hamani-ino-hia, e e haapohehia, aore ra e patiahia, te Mesia no te hopoi ê i te mau hara a te mau taata tia ore.—Isa. 53:4, 5, 7.
11. Mea nafea te Tamaiti a Iehova i te faaiteraa i to ˈna ineineraa i te horoa i to ˈna ora no te faaora ia tatou?
11 Hou to ˈna haereraa mai i te fenua nei, ua ite maitai te Tamaiti fanau tahi a te Atua i te titauhia ia ˈna no te faaora ia tatou. E haamauiui-roa-hia oia e e haapohehia ˈtu ai. I te faaiteraa to ˈna Metua ia ˈna i teie pue parau mau, ua otohe aore ra ua patoi anei oia? Aita, ua auraro atu oia ma te aau tae. (Isa. 50:4-6) I te fenua nei atoa, ua rave Iesu ma te auraro i te hinaaro o to ˈna Metua. No te aha? Ua pahono oia: “Te hinaaro nei au i te Metua.” Ua na ô â oia: “Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira.” (Ioa. 14:31; 15:13) I roto i te hoê tuhaa rahi, no te here ïa o te Tamaiti a Iehova e faaorahia ˈi tatou. Noa ˈtu e ua horoa oia i to ˈna ora taata tia roa, ua oaoa roa oia i te na reira no te faaora ia tatou.
Ta Iehova i haapae no te faaora ia tatou
12. E faaiteraa te hoo i to vai hinaaro, e no te aha oia i horoa ˈi i te reira?
12 E ere o Iesu te Tumu aore ra tei Opua i te tusia taraehara. E tuhaa faufaa râ teie ravea o te faaoraraa o te hinaaro o Iehova. Ua faaite te aposetolo Paulo e te faahohoˈa ra te fata i te hiero, i reira i pûpûhia ˈi te mau tusia, i te hinaaro o Iehova. (Heb. 10:10) Na mua roa, auaa o Iehova e faaorahia ˈi tatou na roto i te tusia o te Mesia. (Luka 1:68) E faaiteraa te reira i to ˈna hinaaro tia roa e i to ˈna aroha rahi i te taata.—A taio i te Ioane 3:16.
13, 14. E nafea to Aberahama hiˈoraa e tauturu ai ia tatou ia haafaufaa i ta Iehova i rave no tatou?
13 Ua haapae Iehova i te aha ei faaiteraa i to ˈna here ia tatou? Mea fifi no tatou ia taa. E faatiaraa bibilia râ te tauturu ia tatou ia maramarama maitai aˈe. Ua ani Iehova ia Aberahama, taata haapao maitai, i te tahi ohipa fifi roa, e pûpû i ta ˈna tamaiti ia Isaaka ei tusia. E metua tane î i te here hoi o Aberahama. Ua faahiti Iehova ia Isaaka mai “to tamaiti hoê . . . ta oe e here na.” (Gen. 22:2) Ua ite râ Aberahama e mea faufaa aˈe te hinaaro o Iehova i to ˈna here ia Isaaka. Ua faaroo Aberahama. Aita râ Iehova i vaiiho ia Aberahama ia rave i ta ˈNa iho e rave i te hoê mahana. Ua tono oia i te hoê melahi e tapea ia Aberahama hou rii oia e pûpû ai i ta ˈna tamaiti. No te mea ua faaoti papu roa Aberahama i te faaroo i to ˈna Atua i roto i teie tamataraa rahi, ua papu ia ˈna e o te tia-faahou-raa te tiaturiraa hoê roa e farerei faahou ai oia i ta ˈna tamaiti. Ua tiaturi roa oia e na te Atua e faatupu i taua tia-faahou-raa ra. Inaha, ua parau Paulo e ua noaa faahou Isaaka ia Aberahama na roto i te tia-faahou-raa “ei taipe.”—Heb. 11:19, V.C.J.S. (huriraa Katolika reo Tahiti).
14 Eaha paha Aberahama i te mauiui a faaineine ai oia i te pûpû i ta ˈna tamaiti ei tusia! I roto i te hoê auraa, te faahohoˈa ra te tupuraa o Aberahama i to Iehova o tei pûpû i ta ˈna i parau “tau Tamaiti here.” (Mat. 3:17) A haamanaˈo râ e mea rahi aˈe to Iehova mauiui. Ua ora amui raua ta ˈna Tamaiti ehia mirioni, ehia miria atoa matahiti. Ua ohipa te Tamaiti ma te oaoa ei “tamaiti faaamu,” aore ra rave ohipa aravihi, here e ei Auvaha, “te Logo,” na te Metua. (Mas. 8:22, 30, 31; Ioa. 1:1) Ua hau aˈe ta Iehova i faaoromai a haamauiuihia ˈi ta ˈna Tamaiti, a faaooohia ˈi, e a haapohehia ˈi ei taata ohipa ino, i ta tatou i ite. E haapaeraa rahi ta Iehova i rave no te faaora ia tatou! E nafea ïa tatou e faaite ai e te haafaufaa ra tatou i taua faaoraraa ra?
E nafea outou e faaite ai e te haafaufaa ra outou i te faaoraraa?
15. Mea nafea to Iesu faahope-roa-raa i te taraehara rahi, e eaha tei itehia mai?
15 Ua faahope roa Iesu i te taraehara rahi i muri aˈe i to ˈna tia-faahou-raa no te ora i nia i te raˈi. Ua faaite oia i te faufaa o to ˈna tusia i to ˈNa Metua here. E haamaitairaa rahi to muri mai. E faaore-roa-hia te hara, na mua a te mau taeae faatavaihia o te Mesia e ta “to te ao atoa nei.” I teie mahana, maoti taua tusia ra, e fanaˈo te taata atoa o te tatarahapa mau i ta ratou hara e o te riro ei pǐpǐ mau a te Mesia, i te hoê taairaa piri e te Atua ra o Iehova. (Ioa. 1, 2:2) E nafea e tano ai te reira no oe?
16. E nafea tatou e faahohoˈa ˈi i te tumu e mauruuru ai tatou ia Iehova no ta ˈna faaoraraa ia tatou?
16 E rave faahou anaˈe i te faahohoˈaraa i te omuaraa. E parau paha te taote tei ite i te raau i te feia maˈi i roto i to oe piha: E ora iho â te taata maˈi o te farii i te rapaauraa e o te haapao maitai i ta ratou maa. E nafea ïa ia ore te feia maˈi e pee i te aratairaa a te taote, ma te parau e mea fifi roa ia rave i te raau aore ra ia haapao maitai i ta ratou maa? E pee anei oe ia ratou, noa ˈtu e ua papu ia oe e e ora oe i tera raau? Eita ïa! E haamauruuru râ oe i te taote e e haapao maite oe i ta ˈna mau faaueraa, ma te faaite atoa paha ia vetahi ê i ta oe faaotiraa. I roto i te hoê auraa rahi aˈe, ia faaite ïa tatou taitahi ia Iehova i to tatou mauruuru rahi no te faaoraraa ta ˈna i faanaho na roto i te tusia taraehara o ta ˈna Tamaiti.—A taio i te Roma 6:17, 18.
17. E nafea oe e faaite ai i to oe mauruuru no ta Iehova i rave no te faaora ia oe?
17 Mai te peu e te mauruuru ra tatou ia Iehova e i ta ˈna Tamaiti no to raua faaoraraa ia tatou i te hara e te pohe, e faaite ïa tatou. (Ioa. 1, 5:3) E aro tatou i to tatou hinaaro e hara. Eita roa tatou e hema i te rave-tamau-raa i te hara e te tapiraa e piti huru oraraa haavarevare. Aita anaˈe, te haafaufaa ore ra ïa tatou i te hoo. E faaite râ tatou i to tatou mauruuru ma te tutava puai i te atuatu i te hoê taairaa maitai e o Iehova. (Pet. 2, 3:14) E parau tatou ia vetahi ê i to tatou tiaturiraa faahiahia o te faaoraraa, ia fanaˈo atoa hoi ratou i te hoê taairaa maitai e o Iehova, e te tiaturiraa e ora e a muri noa ˈtu. (Tim. 1, 4:16) E tano mau â ia horoa tatou i to tatou taime e itoito atoa no te arue ia Iehova e i ta ˈna Tamaiti! (Mar. 12:28-30) A feruri! E nehenehe tatou e tiai ru i te taime e faaora-roa-hia ˈi tatou i te hara. E ora tatou mai ta te Atua i opua, ma te tia roa e a muri noa ˈtu, maoti ta Iehova i rave no te faaora ia tatou!—Roma 8:21.
[Nota i raro i te api]
a Ua parauhia e e 20 e tae atu e 50 % o te huitaata o te ao tei peehia i te fiva Paniora i tera tau. I roto 1 e tae atu 10 % o te feia i peehia i teie maˈi tei pohe. Area tei peehia i te Ebola, te hoê maˈi mea varavara ia tupu, fatata ïa te taatoaraa tei pohe.
Eaha ta outou e pahono?
• No te aha outou e hinaaro ru ai i te faaoraraa?
• Eaha te faahopearaa o to Iesu tusia i nia ia outou?
• Eaha to outou huru aau i mua i ta Iehova ô o te hoo?
• Ia aha outou i mua i ta Iehova mau faanahoraa no te faaora ia outou?
[Hohoˈa i te api 29]
I te Mahana o te Taraehara, te faahohoˈa ra te tahuˈa rahi o Iseraela i te Mesia
[Hohoˈa i te api 31]
Te haapii rahi maira to Aberahama ineineraa i te pûpû i ta ˈna tamaiti no nia i ta Iehova tusia rahi aˈe