E hopoi mai anei te moni i te oaoa mau?

UA FANAUHIA Sonia i Paniora. I to ˈna tamarii-rii-raa, ua haere atu oia i te mau putuputuraa a te mau Ite no Iehova na muri i to ˈna mama. A paari ai râ, ua tere atu oia i Lonedona, i Beretane, e ohipa ˈtura i roto i te tuuraa moni.

Mea au roa na Sonia ta ˈna ohipa. E faarahi oia i te moni e e faaohipa oia i te mau tino moni rarahi ia apî ta ˈna mau hoani. E ohipa anaanatae mau te reira, e e mea manuïa roa oia. E ohipa tamau na oia 18 hora i te mahana hoê e e taoto noa na e piti aore ra e toru hora i te tahi mau po. Ua niu o ˈna i to ˈna oraraa taatoa i nia i ta ˈna ohipa. E, taui taue aˈera to ˈna oraraa. Ua roohia Sonia i te hoê maˈi ino mau o te roro—no to ˈna paha huru oraraa ahoaho. E 30 matahiti noa to ˈna.

Aita hoê pae o te tino o Sonia i hautiuti faahou, e aita te mau taote i papu e e paraparau faahou anei oia. Ua haere oioi mai to ˈna mama i Beretane no te haapao ia ˈna. A haamata ˈi Sonia i te haere faahou, teie ta to ˈna mama i parau ia ˈna: “Te haere nei au i te putuputuraa, e e haere atoa mai oe, eita vau e nehenehe e vaiiho ia oe o oe anaˈe.” Ua farii Sonia. Te faahopearaa?

“E parau mau te mau mea atoa ta ˈu i faaroo. E mea faahiahia,” ta Sonia ïa e haamanaˈo ra. “Ua oaoa vau i te haapii i te Bibilia e hoê o te mau taata e rave rahi i farii mai ia ˈu i te taime matamua ia ˈu i haere atu i te Piha a te Basileia. Ua faaea te feia ta ˈu i matau na i te haere mai e hiˈo ia ˈu, area to ˈu mau hoa apî e mea î i te here ïa e te haapao maitai.”

Ua paraparau rii mǎrû faahou mai o Sonia, e ua haere vitiviti oia i mua i roto i ta ˈna haapiiraa bibilia. Aita i matahiti roa, ua bapetizohia oia. Tei roto e rave rahi o to ˈna mau hoa apî i te taviniraa Kerisetiano taime taatoa, e ua ite oia i to ratou oaoa rahi. ‘E hinaaro atoa vau e riro mai ia ratou,’ ta ˈna i manaˈo. ‘E hinaaro vau e horoa na te Atua ra o Iehova i ta ˈu mea maitai roa ˈˈe!’ E tavini taime taatoa Sonia i teie nei.

Eaha ta Sonia i haapii? “No te ahoaho e te panoonoo ore i ta ˈu ohipa, noa ˈtu e i noaa na ia ˈu te moni rahi, aita vau i oaoa, ua hepohepo râ. Ua itea ia ˈu e o to ˈu mau taairaa maitai e to ˈu Metua i te raˈi ra o Iehova te mea faufaa roa ˈˈe i roto i te oraraa. Te oaoa mau ra vau i teie nei.”

“O te nounou moni . . . te tumu o te mau ino atoa,” ta te aposetolo Paulo i papai. “Ua taa ê roa hoi te tahi pae i te parau nei i te titau-noa-raa i te reira, e ua patiatia pupu roa ia ratou iho i te oto e rave rahi.” (Timoteo 1, 6:10) Ua nehenehe Sonia e haapapu, na roto i to ˈna iho tupuraa, e e parau mau te reira.