E ite anei te feia e mauiui ra i te hau?

E HINAARO anei outou e ia faaorehia te mauiui, eiaha no outou noa, no te huitaata atoa nei râ? E rave anaˈe na i teie mau hiˈoraa:

Ua mauiui roa o Sonia.a Ua haamata te reira i to ˈna iteraa e ua faaturi na ta ˈna tane hoê ahuru matahiti te maoro. E ua roohia ta ˈna tamaiti hopea i te tirotiro HIV, e ua pohe oia i te maˈi SIDA. E piti matahiti i muri iho, ua maˈihia te tahi atu tamaiti ta ˈna, e aita i maoro ua pohe atoa oia i te maˈi SIDA. “E mea maoro roa te tupuraa te tuhaa hopea o to ˈna maˈi,” o ta Sonia ïa e haamanaˈo ra. “Ua hepohepo ino roa oia, ua marua to ˈna rouru, e aita to ˈna mata i ite maitai. E mea peapea roa.”

Ua haapeapea o Fabiana, te hoê tamahine haere haapiiraa tuatoru no Beresilia, no nia i te mau ohipa totiale tano ore a te ao nei. I muri iho, ua roohia oia iho i te ati. Ua haapohe to ˈna taeae ia ˈna iho, no to ˈna faarururaa i te hepohepo. I to Fabiana ereraa i ta ˈna ohipa, ua parau te hoê hoa ia ˈna ia haere e hiˈo i te hoê pai-de-santo (tahuˈa), ma te haaferuri e te tumu i roohia ˈi o Fabiana i teie huru ati, no te mea ïa ua pifao te hoê taata ia ˈna! Aita râ te pai-de-santo i tamǎrû ia ˈna. Ua mauiui noa râ o Fabiana, eita oia e nehenehe e taoto no to ˈna mau ati.

Ua haamata oioi te ati o Ana i roto i to ˈna oraraa. “I te hoêraa o to ˈu matahiti,” o ta ˈna ïa e faatia ra, “ua faarue to ˈu mama ia ˈu, e na to ˈu mama ruau i haapao ia ˈu.” Ua pohe atura te mama ruau o Ana, e toru noa matahiti to ˈna. Ua afaihia o Ana i te hoê fare otare i Rio de Janeiro, i reira to ˈna faaearaa e tae noa ˈtu i te 13raa o to ˈna matahiti. “Mea rave-ino-roa-hia matou i ǒ, e ua riro mai au ei tamahine etaeta,” o ta ˈna ïa e parau ra. “I to ˈu paariraa mai, ua patoi au fatata i te mau mea atoa.”

E au ra e o te mau taata atoa teie e mauiui nei i roto i te hoê ravea aore ra te tahi atu. Oia mau, te ite nei tatou i te mau aamu o te ati o te taata i te mau mahana atoa—ia mataitai anaˈe, ia taio, aore ra ia faaroo tatou i te mau parau apî. “Na roto i te ravea haapurororaa parau i to tatou nei tau, eita ta tatou e nehenehe e ape i te mau parau apî peapea tamau,” o ta te Orometua vahine haapii ra o Mary Sykes Wylie ïa e papai ra. “Te mau tamaˈi, te mau ati natura, te mau fifi i te pae tapihaa, te mau ati purumu pohe, te mau ohipa iino, te ohipa totoaraa, te hamani-ino-raa i te pae taatiraa, te maferaraa, te haavîraa uˈana i te fare—ua riro teie nei mau mea mauiui atoa ei upoo parau rahi riaria i te mau mahana atoa o te senekele 20.” Ua faataa poto noa te aposetolo kerisetiano ra o Paulo ma te parau mau i ta te taata e faaruru nei: “Te uuru tahi nei te mau mea atoa i hamanihia nei ma te mauiui fanau ra.”—Roma 8:22.

E outou? Te mauiui atoa ra anei outou? Eaha te tamǎrûraa ta outou e nehenehe e tiai? E ite anei outou i te hau mau? Ua itea mai ia Sonia, ia Fabiana, e ia Ana i te tamahanahanaraa mau e te hoê hau mau! E nehenehe ta outou e taio i te reira i roto i te tumu parau i muri nei.

[Nota i raro i te api]