E faautuaraa anei te veve na te Atua?

UA PARAU te Atua ia Iseraela i tahito ra: “Ia ore roa te feia taoˈa ore i ǒ oe ra.” I roto i te Ture, ua horoa ˈtu oia i te mau faaueraa no nia i te feia veve e oia atoa te faaoreraa i te tarahu. (Deuteronomi 15:1-4, 7-10) Te auraa ïa e aita e feia veve i Iseraela, no te mea e haamaitai Iehova ia ratou. Ua taaihia râ tera haamaitairaa i to ratou faarooraa i te Ture, ta Iseraela i ore hoi i haapao.

E ere râ i te auraa e ua faautua iho â te Atua i te feia taoˈa rii, aore ra ua haamaitai oia i te feia taoˈa rahi. Mea rahi te tavini taoˈa ore haapao maitai a te Atua. E faaamu mamoe e e haaputa maa hotu te peropheta taoˈa ore o Amosa. (Amosa 1:1; 7:14) I te tau o Elia te peropheta, ua tupu te oˈe i Iseraela. Ua ora mai oia maoti te farii maitai o te hoê vahine ivi veve, ua faanavai-semeio-hia hoi ta ˈna faraoa ota e te hinu i te roaraa o te oˈe. Aita Elia e te vahine ivi i taoˈa-rahi-hia; ua horoa râ Iehova i tei hinaaro-mau-hia.—Te mau arii 1, 17:8-16.

I muri aˈe i te mau tupuraa manaˈo-ore-hia, e nehenehe te taata e topa i roto i te veve. E nehenehe te ati e te maˈi e faataupupu aore ra e haafifi roa i te hoê taata i te pae o te ohipa. E itehia mai i muri aˈe i te poheraa te hoê metua, te mau tamarii otare e te mau vahine ivi. E ere teie mau ati i te faautuaraa a te Atua. E hiˈoraa tamahanahana te aamu o Naomi e o Ruta no to Iehova poihere i te feia veve. Noa ˈtu e tei roto Naomi e o Ruta i te veve rahi i te poheraa ta raua na tane, ua haamaitai te Atua ra o Iehova ia raua e ua horoa i ta raua i hinaaro mau i te pae materia.—Ruta 1:1-6; 2:2-12; 4:13-17.

E ere roa te veve i te faautuaraa a te Atua. E nehenehe te feia taiva ore i te Atua ra o Iehova e tiaturi i te mau parau a te arii Davida: “I vai apî na hoi au, e teie nei ua ruhiruhia; aitâ râ vau i ite i te feia parau-tia i te faarueraahia, e to ˈna ra huaai i te aniraa i te maa.”—Salamo 37:25.

[Hohoˈa i te api 8]

Noa ˈtu te veve rahi o Naomi e o Ruta, ua haamaitai e ua poihere te Atua ia raua