Ua faaitoito ratou

E ERE noa i te mea ohie ia faaitoito i te poro. Inaha, ua parau te aposetolo Paulo e i te hoê taime, ua na reira oia ‘i roto i te mârô rahi.’ (Tesalonia 1, 2:2) E hoona anei te ‘mârôraa’ i te poro? Aita e haapapuraa e e tupu te tahi mau ohipa maere mau, tera râ, te oaoa pinepine nei te nunaa o te Atua i te mea ra e ua faaitoito ratou. Teie te tahi mau hiˈoraa.

Ua faaroo maitai te hoê potii e vau matahiti, o Tara te iˈoa, i te parauraa ta ˈna orometua haapii i te piha e i roto i te Piti o te Tamaˈi Rahi, ua titauhia te mau ati Iuda i roto i te aua tapearaa ia tamau i te hoê Fetia rearea a Davida i nia i to ratou ahu ei tapao. Ua uiui aˈera Tara e e tia anei ia ˈna ia paraparau. “Ua pure au a araara noa ˈi to ˈu mata,” ta ˈna ïa e haamanaˈo ra. I muri iho, ua amo aˈera oia i to ˈna rima i nia e parau atura e tei roto atoa te mau Ite no Iehova i taua mau aua tapearaa ra, e e poro toru vareau to ratou. Ua anaanatae te orometua haapii e ua haamauruuru ia ˈna. Maoti ta Tara tatararaa, ua tupu te tahi atu â mau aparauraa e te orometua haapii, e ua mataitai atoa ta ˈna piha taatoa i muri aˈe i te video ra La fermeté des Témoins de Jéhovah face à la persécution nazie.

I Guinée, i Afirika Tooa o te râ, ua hinaaro te hoê potii poro bapetizo-ore-hia, o Irène te iˈoa, e haere i mua i roto i ta ˈna taviniraa. Ua faaitoito te tuahine mitionare i faatere i ta ˈna haapiiraa Bibilia ia ˈna ia tamata i te opere i Te Pare Tiairaa e te A ara mai na! na to ˈna mau hoa i te fare haapiiraa. Ua taiâ Irène no te mea aita to ˈna mau hoa haapiiraa i farii. Maoti râ te faaitoitoraa a te tuahine mitionare, ua faaoti aˈera Irène e paraparau na mua i te hoa haapiiraa i manaˈohia e o ˈna te mea patoi roa ˈˈe. Ua maere Irène, inaha ua faaroo e ua farii oioi te potii i te mau vea. Ua na reira atoa te tahi atu mau tamarii haapii. Mea rahi aˈe ta Irène vea i vaiiho i taua avaˈe ra i na avaˈe amuihia e pae na mua ˈtu.

I Trinité, ua taiâ rii te hoê matahiapo e paraparau i te vahine faatere o te hoê fare haapiiraa no te faaite ia ˈna i te faufaaraa o te A ara mai na! i te paeau haapiiraa. Noa ˈtu râ, ua faaitoito oia. Te parau ra oia e: “Ua pure au i to ˈu tomoraa i roto i te aua. Ua maere roa vau e mea maitai roa te vahine faatere.” Ua farii oia i te A ara mai na! no nia i te tumu parau ra “Eaha te tiaturiraa i teie mahana no te mau taurearea?” e i te faaohipa atoa i te reira no te haapii i te mau piha. Mai reira mai, ua farii oia e 40 vea o te hohora ra i te mau tumu parau e rave rau.

Ei taurearea, mea fifi noa no Vaughn ia poro. “E ruru noa vau, e rari noa to ˈu apu rima, e e paraparau vitiviti au—eita ta ˈu e nehenehe e faataere.” Noa ˈtu râ, ua riro mai oia ei tavini ma te taime taatoa. E ere noa râ i te mea ohie no ˈna ia paraparau. I te hoê taime, i muri aˈe i te hoê mahana fiu i te imiraa i te ohipa, ua hinaaro oia e poro i te hoê taata i roto i te métro, “e ohipa maitai aˈe ïa te ravehia i te hoê mahana au ore.” Ua taiâ râ oia i te feia tapihoo i roto i te métro. I te pae hopea, ua faaitoito aˈera oia i te paraparau i te hoê taata paari i pihai iho ia ˈna. Mea maoro to raua paraparauraa. “E mau uiraa maitatai ta oe no te hoê taata apî mai ia oe,” ta te taata tapihoo ïa i parau, a ui ai e, “E taata tuatapapa faaroo anei oe?” Ua pahono Vaughn e, “Eita, e Ite no Iehova vau.” “Ah,” ua ata te taata. “Te taa ra ia ˈu i teie nei.”

Te oaoa nei teie mau Ite atoa—e e rave rahi atu â—i to ratou faaitoitoraa i te poro. E na reira atoa anei outou?

[Hohoˈa i te api 25]

Tara

[Hohoˈa i te api 25]

Vaughn