Ua apiti oia i te haaparareraa i te maramarama ‘e tae atu i te hopea o te fenua’
E OHIPA matauhia e te aposetolo Paulo te haaparareraa i te maramarama pae varua “e tae noa ˈtu i te hopea o te fenua ra.” Ei faahopearaa, e rave rahi feia ‘[e au to ratou aau i te ora mure ore] tei faaroo.’—Ohipa 13:47, 48; MN; Isaia 49:6.
Ua ite-papu-hia te hinaaro haavare ore e haaparare i te maramarama pae varua i roto i te oraraa itoito o William Lloyd Barry, te hoê melo o te Tino Aratai a te mau Ite no Iehova, e ta ˈna mau tutavaraa Kerisetiano tuutuu ore. Ua pohe o Taeae Barry i te 2 no Tiurai 1999, a rave ai oia i ta ˈna tuhaa i roto i te hoê tairururaa mataeinaa i Hawaii.
Ua fanauhia Lloyd Barry i Niu Zelani i te 20 no Titema 1916. Ua anaanatae e ua faaohipa aˈena to ˈna metua vahine e metua tane i te mau parau mau Bibilia i vauvauhia i roto i te mau papai a C. T. Russell, i haapararehia e te Watch Tower Bible and Tract Society. Ua paari mai ïa Taeae Barry i roto i te hoê utuafare Kerisetiano itoito.
Noa ˈtu e mea anaanatae na ˈna te ohipa taaro e te haapiiraa, e ua noaa atoa hoi ia ˈna te tahi ite i te pae o te ihi, ua haamau noa Taeae Barry i te aau rotahi i nia i te mau mea pae varua. No reira, i te 1 no Tenuare 1939, ua haamata oia i te taviniraa ma te taime taatoa, a riro mai ai ei melo no te utuafare o te Betela i te piha ohipa a te Taiete i Auteralia. I to te hau faatere opaniraa i te Taiete i te matahiti 1941, ua tamau noa Taeae Barry i te rave i te ohipa i roto i te piha ohipa, i te tahi taime no te papai i te mau faaitoitoraa i te mau hoa faaroo. Ua horoa atoa oia i te hiˈoraa i roto i te taviniraa i te vahi taata.
I te avaˈe Febuare 1942, ua faaipoipo Taeae Barry i te tahi atu tavini ma te taime taatoa. Ua ohipa noa ta ˈna vahine î i te here o Melba ma te haapao maitai e o ˈna i te roaraa o teie mau matahiti i te mau vahi e rave rahi o te fenua nei. Ua rave raua i te hoê taahiraa avae rahi i roto i te taviniraa i te fenua ěê na roto i te haereraa i te 11raa o te pǔpǔ a te Haapiiraa Bibilia a te Watchtower no Gileada i te mau Hau Amui no Marite. Ua tonohia raua i te hoê vahi ta te rahiraa paha e parau e “te hopea o te fenua”—i Tapone. I to raua taeraa ˈtu i te avaˈe Novema 1949, ua haamata raua i te tavini ei mitionare i te oire tapaeraa pahi no Kobe. I taua taime ra, 12 noa taata e poro ra i te parau apî maitai i Tapone. Ua haapii Taeae Barry i te mau peu e te reo o to ˈna fenua apî e ua faahotu i te here rahi no te mau Tapone, i pihai iho hoi ia ratou to ˈna taviniraa i na matahiti e 25 i muri mai. Ua ite-maitai-hia to ˈna here i te feia “e au to ratou aau i te ora mure ore” e te mau taeae Kerisetiano e rahi noa ˈtura i Tapone, o te tauturu ïa ia ˈna ia manuïa i roto i te tiaauraa i te amaa ehia matahiti i te roaraa.
I ropu i te matahiti 1975, e 30 000 ïa mau Ite i Tapone, ua tonohia te utuafare Barry i Brooklyn, i New York. Ei Kerisetiano faatavaihia i te varua moˈa, ua titauhia Taeae Barry ia tavini ei melo no te Tino Aratai a te mau Ite no Iehova. (Roma 8:16, 17) Ua riro to ˈna ite i te papai ei mea faufaa roa no ta ˈna ohipa apî i roto i te Tuhaa Papairaa. E ua faaineine to ˈna ite rahi i te ohipa a te hoê amaa e i te fenua ěê ia ˈna no te horoa i te hoê tauturu faufaa ei melo no te Tomite Neneiraa a te Tino Aratai.
Ehia matahiti i muri aˈe, te haamanaˈo noa râ Taeae Barry i to ˈna here i te Hitia o te râ e to ǒ mau taata. E nehenehe te feia e haere i te Haapiiraa no Gileada e te mau melo o te utuafare o te Betela e papu e e haamatara ta ˈna mau oreroraa parau e mau vauvauraa manaˈo i te mau aamu tamahanahana no nia i te feia e rave rahi i tavini i roto i te ohipa mitionare. Ua faataahia ma te oraora mau te ohipa pororaa i te Basileia i “te hopea o te fenua” ia faatia Taeae Barry i to ˈna iho mau aamu ma te anaanatae rahi. Ua faatiahia te tahi pae o te reira i roto i to ˈna iho aamu neneihia i roto i Te Pare Tiairaa o te 15 no Setepa 1960 (Beretane).
Te tiaturi papu nei tatou e ei ‘taata aiˈa e te Mesia,’ e tamau noa Taeae Barry i te anaanatae mai i te feia “e au to ratou aau i te ora mure ore.” Parau mau, e mihi-rahi-hia oia e te feia atoa i matau e i here ia ˈna ei taata maitai i te pae varua, te itoito roa no Iehova e te here i te nunaa o te Atua ma te mahanahana. Te oaoa nei râ tatou e ua faaoromai Taeae Barry ma te haapao maitai e tae noa ˈtu i te hopea o ta ˈna hororaa i te fenua nei.—Apokalupo 2:10.
[Hohoˈa i te api 16]
O Lloyd Barry e o John Barr i te matararaa te “Étude perspicace des Écritures” na roto i te reo Beretane i te matahiti 1988
[Hohoˈa i te api 16]
Feia i noaa te parau tuite a te 11raa o te pǔpǔ haapiiraa no Gileada, tei farerei i Tapone e 40 matahiti i muri aˈe