Timoteo—‘Te hoê tamaiti mau i te faaroo ra’

MEA apî roâ Timoteo i to te aposetolo Kerisetiano Paulo maitiraa ia ˈna ei hoa ratere. Mea na reira te haamataraa te hoê auhoaraa i vai noa fatata 15 matahiti i te maoro. No te tupu-maitai-raa te taairaa i rotopu i na taata i nehenehe ai Paulo e parau ia Timoteo “tau tamaiti here e te haavare ore i te Fatu nei” e “tau tamaiti mau i te faaroo ra.”—Korinetia 1, 4:17; Timoteo 1, 1:2.

Eaha te mea i roto i te huru taata o Timoteo i here rahi ai Paulo ia ˈna? Nafea to Timoteo riroraa mai ei hoa faufaa mau? E eaha te mau haapiiraa faahiahia ta tatou e nehenehe e huti mai i roto i te aamu faauruahia o te mau ohipa a Timoteo?

Maitihia e Paulo

Ua farerei te aposetolo Paulo i te pǐpǐ apî ra o Timoteo i to ˈna haereraa i Lusetera (i Turekia no teie tau) i te piti o to ˈna tere mitionare i te area matahiti 50 T.T. Peneiaˈe i te hopea o te hoê ahuru e tiahapa aore ra i te omuaraa o te 20raa o to ˈna matahiti, e parau maitai to Timoteo i te mau Kerisetiano no Lusetera e no Ikonio. (Ohipa 16:1-3) Ua ora oia ia au i to ˈna iˈoa, teie hoi te auraa “Te hoê o te faatura i te Atua.” Mai te tamariiriiraa mai â, ua haapiihia Timoteo i te mau Papai Moˈa e to ˈna metua tupuna o Loidi e to ˈna metua vahine o Eunike. (Timoteo 2, 1:5; 3:14, 15) Ua farii paha raua i te Kerisetianoraa i te tere matamua o Paulo i to raua oire tau matahiti na mua ˈˈe. I teie nei, na roto i te ravea o te varua moˈa, e faaite te hoê tohu eaha te huru o Timoteo a muri aˈe. (Timoteo 1, 1:18) Ia au i taua aratairaa ra, e tuu Paulo e te mau matahiapo o te amuiraa i to ratou rima i nia i te taurearea ra, a faataa ˈi ia ˈna no te hoê hopoia taa ê, e e maiti te aposetolo Paulo ia ˈna ei hoa mitionare.—Timoteo 1, 4:14; Timoteo 2, 1:6.

I te mea e e Heleni to ˈna metua tane e e ere i te Kerisetiano, aita Timoteo i peritomehia. Parau mau, e ere teie i te hoê titauraa Kerisetiano. Eiaha râ te mau ati Iuda ta raua e farerei atu ia turori, ua farii Timoteo i teie ravea mauiui.—Ohipa 16:3.

Te hiˈohia ra anei Timoteo ei ati Iuda na mua ˈˈe? Te parau ra te tahi feia ite e ia au i te mau rabi mana, “tei te metua vahine te tiaraa o te mau tamarii no roto i te faaipoiporaa nunaa anoi, eiaha râ te metua tane.” Teie ïa te auraa, “e fanau te hoê vahine ati Iuda i te tamarii ati Iuda.” Te ui maere nei râ te taata papai o Shaye Cohen e “te vai aˈena ra anei te ture a te mau rabi no nia i te taata i te senekele matamua T.T.” e te haapaohia ra anei e te mau ati Iuda no Asia Iti. I muri aˈe i to ˈna tuatapaparaa i te haapapuraa a te aamu, te faaoti ra oia e ia faaipoipo te mau tane Etene i te vahine Iseraela, “e hiˈohia te mau tamarii no roto i teie mau faaipoiporaa ei Iseraela mai te peu noa e faaea te utuafare i roto i te mau Iseraela. I te fenua o te metua vahine, e haafaufaahia te ihotatau o te metua vahine. Ia haere ê te vahine Iseraela i pihai iho i ta ˈna tane Etene, e hiˈohia ta ˈna mau tamarii ei Etene.” Noa ˈtu eaha te tupuraa, ua riro mau paha te mea e e metua nunaa anoi to Timoteo ei ravea maitai i roto i te ohipa pororaa. Eita ïa oia e fifihia i mua i te mau ati Iuda e i mua i te mau Etene, e nehenehe paha ta ˈna e faaruru i te mau taa-ê-raa i rotopu i na pae e piti.

I to Paulo haereraa i Lusetera, ua tupu te hoê tauiraa i roto i te oraraa o Timoteo. No to te taurearea hinaaro-mau-raa e auraro i te aratairaa a te varua moˈa e e tahoê ma te haehaa e te mau matahiapo Kerisetiano, ua noaa ia ˈna te mau haamaitairaa rahi e te mau hopoia i roto i te taviniraa. Ua ite anei oia i te reira i taua tau ra aore aita, ma te arataihia e Paulo, e faaohipahia Timoteo i muri aˈe i roto i te mau tuhaa taviniraa teotaratia faufaa rahi, e e tae roa oia i te vahi atea roa ˈˈe i to ˈna fare i Roma, te oire pu o te hau emepera.

Ua turu Timoteo i te mau faufaa o te Basileia

Hoê noa tuhaa o te aamu faauruahia o te mau ohipa a Timoteo e vai ra, ua ratere rahi râ oia no te turu i te mau faufaa o te Basileia. I to ˈna tere matamua e o Paulo e o Sila i te matahiti 50 T.T., ua tae oia i Asia Iti e i Europa. I reira, ua apiti oia i roto i te pororaa i Philipi, i Tesalonia e i Berea. I to te patoiraa faaheporaa ia Paulo e haere i Ateno, ua vaiihohia Timoteo e Sila i Berea no te tiaau i te pǔpǔ o te mau pǐpǐ i haamauhia i reira. (Ohipa 16:6–17:14) I muri aˈe, ua tono Paulo ia Timoteo i Tesalonia e haapuai i te amuiraa apî i ǒ. Ua afai mai Timoteo i te mau parau apî oaoa no nia i te haereraa i mua i to ˈna farereiraa ia Paulo i Korinetia.—Ohipa 18:5; Tesalonia 1, 3:1-7.

Aita te mau Papai e faaite ra eaha te roaraa o to Timoteo faaearaa i Korinetia. (Korinetia 2, 1:19) Teie râ, peneiaˈe i te area matahiti 55 T.T., ua manaˈo Paulo e tono faahou atu ia ˈna i ǒ ratou no te mea ua faaroo oia i te mau parau apî peapea no nia i to ratou huru. (Korinetia 1, 4:17; 16:10) I muri aˈe, ua tonohia Timoteo e o Eraseto mai Ephesia ˈtu i Makedonia. E i to Paulo papairaa i to Roma mai Korinetia ˈtu, tei ia ˈna faahou ra o Timoteo.—Ohipa 19:22; Roma 16:21.

Ua faarue Timoteo e vetahi atu ia Korinetia e o Paulo i to ˈna revaraa i Ierusalema, e ua apee ratou i te aposetolo e tae noa ˈˈe i Teroa. Ua haere roa ˈtu anei Timoteo i Ierusalema, aita tatou i ite. Te faahiti-roa-hia ra râ to ˈna iˈoa i roto i te mau omuaraa o na rata e toru ta Paulo i papai i roto i te fare tapearaa i Roma i te area matahiti 60-61 T.T.a (Ohipa 20:4; Philipi 1:1; Kolosa 1:1; Philemona 1) Te opua ra Paulo e tono ia Timoteo mai Roma ˈtu i Philipi. (Philipi 2:19) E i muri aˈe i to Paulo tuuraahia, ua faaea Timoteo i Ephesia ia au i te faaueraa a te aposetolo.—Timoteo 1, 1:3.

I te mea e e ere i te mea ohie e te mea au roa ia ratere i te senekele matamua, e nehenehe mau ïa e haapopouhia te hinaaro o Timoteo e ratere no te maitai o te mau amuiraa. (A hiˈo i Te Pare Tiairaa o te 15 no Atete 1996, api 29, tumu parau tarenihia.) A hiˈo na i te hoê noa o te mau tere ta ˈna i rave i muri aˈe e te mea ta te reira e haapii mai no nia ia Timoteo.

Faaiteraa i te huru taata o Timoteo

Tei pihai iho Timoteo ia Paulo i Roma i to te aposetolo e tapeahia ra papairaa i te mau Kerisetiano e hamani-ino-hia ra no Philipi e: “Te tiaturi nei râ vau i te Fatu ra ia Iesu, e eita e roaroa e tono atu ai au ia Timoteo ia outou na, ia itoito hoi au ia ite au i te mau parau ia outou na. Aita hoi a ˈu e taata mai ia ˈna atoa te aau, i te haapao mau i ta outou na. Te imi nei hoi te taata atoa i ta ratou ihora, aore i ta Iesu Mesia ra. Ua ite mau râ outou ia ˈna, e mai ta te tamaiti haapaoraa i te metua ra, o ta ˈna ïa haapaoraa ia ˈu i te ohipa i te evanelia nei.”—Philipi 1:1, 13, 28-30; 2:19-22.

Te haamatara ra teie mau parau i te haapeapearaa o Timoteo no to ˈna mau hoa faaroo. Ia ore oia e haere na nia i te pahi, e titauhia e 40 mahana no te haere avae na Roma e tae atu i Philipi, na nia ˈtu i te Miti Adriatique, e e 40 mahana faahou no te hoˈi i Roma. Ua ineine Timoteo i te na reira no te tavini i to ˈna mau taeae e tuahine.

Noa ˈtu e ua ratere rahi Timoteo, i te tahi taime, e ere oia i te mea maitai roa. Papu maitai e i maui na to ˈna ouma e i “pohe pinepine” na oia i te maˈi. (Timoteo 1, 5:23) Ua rohi râ oia no te maitai o te parau apî maitai. E ere ïa i te mea maere ia piri roa to Paulo taairaa e o ˈna!

Ma te haapiihia e te aposetolo Paulo e maoti te mau mea ta raua atoa i farerei, e au ra e ua faahohoˈa Timoteo i te huru taata o Paulo. No reira Paulo i nehenehe ai e parau atu e: “Ua ite hua râ oe i ta ˈu i haapii ra, e to ˈu haerea, e ta ˈu i titau, e te haapao mau, e te mǎrû, e te aroha, e te faaoromai, e to ˈu hamani-ino-raahia mai, e te mau pohe a roohia mai ai au i Anetiohia, e i Ikonio, e i Lusetera; i te huru o taua mau hamani ino i faaoromaihia e au ra.” Ua manii Timoteo i te roimata e o Paulo, tei roto oia i ta ˈna mau pure, e ua tavini i pihai iho ia ˈna no te turu i te mau faufaa o te Basileia.—Timoteo 2, 1:3, 4; 3:10, 11.

Ua faaitoito Paulo ia Timoteo ‘eiaha roa ei taata e vahavaha mai i to ˈna apîraa.’ Te faaite ra paha te reira e mea huru mamahu rii Timoteo, e e haamarirau rii oia i te haapapu i to ˈna mana. (Timoteo 1, 4:12; Korinetia 1, 16:10, 11) Ua nehenehe râ oia e faaea oia anaˈe, e ua tono Paulo ia ˈna ma te tiaturi no te tahi mau hopoia teimaha. (Tesalonia 1, 3:1, 2) I to Paulo iteraa e e hinaarohia te tiaauraa teotaratia puai i roto i te amuiraa no Ephesia, ua faaitoito oia ia Timoteo e faaea i ǒ no te ‘aˈo atu i te tahi pae eiaha ratou e haapii i te parau ěê.’ (Timoteo 1, 1:3) Noa ˈtu râ e ua tuuhia ˈtu te mau hopoia e rave rahi i nia ia ˈna, ua vai haehaa noa Timoteo. Noa ˈtu te mamahu, mea itoito oia. Ei hiˈoraa, ua haere oia i Roma e tauturu ia Paulo e haavahia ra no to ˈna faaroo. Oia mau, ua tapea-atoa-hia Timoteo maa taime, no te reira atoa paha tumu.—Hebera 13:23.

Ma te feaa ore, ua haapii rahi Timoteo i pihai iho ia Paulo. Te haapapu-maitai-hia ra te faatura o te aposetolo i to ˈna hoa rave ohipa i te mea e ua papai oia e piti rata faauruahia e te Atua e vai ra i roto i te mau Papai Heleni Kerisetiano. I te area matahiti 65 T.T., i to Paulo iteraa e fatata oia i te haapohehia no te faaroo, ua aˈo faahou oia ia Timoteo. (Timoteo 2, 4:6, 9) Ua tamata anei Timoteo i te farerei ia Paulo hou oia a haapohehia ˈi, aita te mau Papai e faaite ra.

A haavata ia outou iho!

Mea rahi te mau mea e nehenehe e haapiihia i roto i te hiˈoraa o Timoteo. Ua faufaa-rahi-hia oia i to ˈna apitiraa ia Paulo, a taui ai mai te hoê taurearea mamahu i roto i te hoê tiaau. E nehenehe te mau taurearea Kerisetiano tane e vahine e faufaa-rahi-hia i te auhoaraa mai te reira i teie mahana. E ia faariro ratou i te taviniraa ia Iehova ei toroa no ratou, e rahi ïa ta ratou ohipa maitatai e rave. (Korinetia 1, 15:58) E nehenehe ratou e riro mai ei pionie, aore ra ei tavini ma te taime taatoa, i roto i ta ratou iho amuiraa, aore ra e tavini i te vahi e hinaaro-rahi-aˈe-hia te feia poro i te Basileia. I roto i te mau ravea e rave rahi, te vai ra te taviniraa mitionare i te fenua ěê aore ra te taviniraa i te pu o te ao nei a te Taiete Watch Tower aore ra i te hoê o ta ˈna mau amaa. E nehenehe iho â ïa te mau Kerisetiano atoa e faaite i te hoê â huru feruriraa e to Timoteo na roto i te taviniraa ia Iehova ma te nephe atoa.

Te hinaaro ra anei outou e tamau i te tupu maitai i te pae varua, ia faaohipahia outou e te faanahonahoraa a Iehova i te vahi ta ˈna e manaˈo e tano? A rave ïa mai ta Timoteo i rave. A haavata ia outou iho i te faito rahi roa ˈˈe. O vai te ite eaha te mau hopoia i roto i te taviniraa e horoahia ˈtu na outou a muri aˈe?

[Nota i raro i te api]

[Hohoˈa i te api 31]

“Aita hoi a ˈu e taata mai ia ˈna atoa te aau”