Ua rave ratou i te hinaaro o Iehova

Ua horoa Iesu i te taime no te mau tamarii

UA FATATA roa te hope na matahiti taviniraa e toru e te afa a Iesu. Fatata roa oia i te tomo atu i Ierusalema e i te faaruru i te hoê pohe mauiui mau. Ua ite maitai oia eaha te ohipa e tupu i muri iho, inaha ua parau oia i ta ˈna mau pǐpǐ e: “Ua tuuhia te Tamaiti a te taata nei i te rima o te taata, e e taparahi pohe roa ratou ia ˈna.”—Mareko 9:31.

Papu maitai, te hinaaro ra o Iesu e faaohipa maitai aˈe i te mau mahana atoa, te mau hora atoa, te mau taime atoa e toe ra. Te hinaaro faahou ra ta ˈna mau pǐpǐ i te tauturu. Ua ite Iesu e te hinaaro noa ra ratou i te aˈoraa puai mau no nia i te faufaaraa o te haehaa e no nia i te haamǎtaˈuraa tamau e turori. (Mareko 9:35-37, 42-48) Te hinaaro atoa ra ratou i te haapiiraa no nia i te faaipoiporaa, te faataaraa, e te faaea-taa-noa-raa. (Mataio 19:3-12) Ma te ite e fatata roa oia i te pohe, eita e ore ua paraparau maitai o Iesu i ta ˈna mau pǐpǐ e ma te hoê manaˈo ru. Ua riro te taime ei mea faufaa roa—te hoê ïa tupuraa o te faaite maira e mea faahiahia roa ˈtu â te ohipa o ta Iesu i rave i muri iho.

Te farii popou nei Iesu i te mau tamarii

Te faatia ra te aamu Bibilia e: “Ua hopoi maira ratou i te tamarii rii ia ˈna ra, ia faatiaia ˈtu oia ia ratou.” I to te mau pǐpǐ iteraa ˈtu i te reira, ua faahiti oioi atura ratou i to ratou mauruuru ore. Peneiaˈe e te manaˈo ra ratou e taata faufaa roa o Iesu aore ra mea ohipa roa ta ˈna no te tâuˈa ˈtu i te mau tamarii. A feruri na i te maere rahi o te mau pǐpǐ, i to Iesu ririraa ˈtu ia ratou! “A tuu mai i te tamarii rii ia haere noa mai ia ˈu nei, e eiaha e tapeahia ˈtu,” o ta ˈna ïa i parau atu ia ratou. I muri iho, ua parau faahou Iesu e: “Oia mau ta ˈu e parau atu ia outou nei, O te ore e farii i te basileia o te Atua mai te tamaiti aruaru ra, e ore roa ˈtu oia e ô i reira.”—Mareko 10:13-15.

Ua ite Iesu i te mau huru faahiahia roa i nia i te tamarii. E pinepine ratou i te uiui e te tiaturi noa. E farii ratou i te mau parau a to ratou mau metua e e turu atoa ratou i to ratou mau metua i mua i te tahi atu mau tamarii. Ua riro to ratou farii maitai, to ratou huru hinaaro noa e ite ei mea e tia ia peehia e te taatoaraa o te opua e tomo atu i roto i te Basileia o te Atua. Mai ta Iesu i parau, “mai ia ratou hoi to te basileia o te Atua ra.”—A faaau e te Mataio 18:1-5.

Aita râ o Iesu i faaohipa noa i teie mau tamarii no te hoê noa faahohoˈaraa. Te faataa maitai ra te aamu e mea au roa na Iesu ia amui atu e o ratou. Te faataa ra o Mareko e ua “rave atura [Iesu] ia ratou, ua hii ihora, ua tuu atura i tana rima i nia iho ia ratou, e ua faaora ˈtura oia ia ratou.” (Mareko 10:16) I roto noa i te faatiaraa a Mareko e itehia ˈi te manaˈo mahanahana e “ua tuu atura [Iesu] i tana rima i nia iho ia ratou.”a No reira, ua rave hau atu Iesu i te mau titauraa a te feia paari, o tei afai i teie mau tamarii ia Iesu ra e ia nehenehe noa oia e ‘tapea ˈtu’ ia ratou.

Eaha ïa te auraa ‘te tuuraa o Iesu i ta ˈna rima’ i nia i te mau tamarii? E ere teie i te hoê tapaˈo no te hoê oroa faaroo, mai te hoê bapetizoraa. I roto i te tahi mau tupuraa, te auraa o te tuuraa i te rima i nia, o te nominoraa ïa, i roto i te tahi atu, o te haamaitairaa ïa. (Genese 48:14; Ohipa 6:6) No reira, peneiaˈe ua haamaitai noa Iesu i te mau tamarii.

I roto i te mau tupuraa atoa, ua faaohipa Mareko i te hoê taˈo puai aˈe no te “haamaitairaa” (ka·teu·lo·geʹo), oia hoi te hoê ïa taˈo puai e te hohonu mau. Te faaite ra te reira e ua haamaitai o Iesu i te mau tamarii ma te aau putapû mau, ma te poihere, e ma te mahanahana. Papu maitai, aita oia e hiˈo ra i te mau tamarii mai te hoê hopoia teimaha mau o te haamâuˈa i te taime.

Te haapiiraa no tatou

Eita roa ˈtu te huru raveraa a Iesu i nia i te mau tamarii e i nia i te mau taata paari e haamǎtaˈu e e faahaehaa atoa. “E ata ohie noa oia e ata oia ma te oaoa,” ta te hoê ïa buka faahororaa e parau ra. Eita ˈtura ïa e maerehia e haafatata ohie noa te mau taata atoa ia ˈna noa ˈtu ehia to ratou faito matahiti. Ma te feruri-maite-raa i nia i te hiˈoraa o Iesu, e nehenehe tatou e uiui ia tatou iho e, ‘Mea ohie ra anei au i te haafatatahia mai e vetahi ê?’ ‘Ua rahi roa anei ta ˈu ohipa no te haapeapea ˈtu i te mau ohipa e te mau tapitapiraa a vetahi ê?’ E turai te faatupuraa i te hoê anaanatae i te mau taata ia tatou ia horoa ia tatou iho, mai ta Iesu i rave na. E ite vetahi ê i to tatou anaanatae mau e e hutihia mai ratou ia tatou ra.—Maseli 11:25.

Mai te faaitehia mai e te faatiaraa a Mareko, ua oaoa roa Iesu i te faaearaa i pihai iho i te mau tamarii. Peneiaˈe ua rave oia i te taime no te mataitai ia ratou ia hauti anaˈe, no te mea ua faahiti oia i ta ratou mau hauti i roto i te hoê o ta ˈna mau faahohoˈaraa. (Mataio 11:16-19) Peneiaˈe e mea apî roa vetahi mau tamarii o ta Iesu i haamaitai no te haafaufaa o vai mau na oia e eaha ta ˈna e haapii ra. Aita râ te reira i turai noa ˈˈe ia ˈna ia manaˈo e te haamâuˈa ra oia i to ˈna taime. Ua horoa oia i te taime no te mau tamarii no te mea te here ra oia ia ratou. Peneiaˈe ua pahono e rave rahi mau tamarii ta Iesu i farerei i te roaraa o ta ˈna taviniraa i to ˈna here i muri aˈe na roto i te riro-roa-raa mai ei pǐpǐ na ˈna.

Mai te peu e e ua rave Iesu i te taime no te mau tamarii i te roaraa o te mau hebedoma hopea faufaa mau o to ˈna oraraa, papu maitai e e nehenehe atoa tatou e rave i te taime no ratou i roto i tatou tabula ohipa î maitai. E tia ia tatou ia haapao maitai i tei titau ra i te mau hinaaro taa ê, mai te mau tamaroa e te tamahine otare. Oia mau, e ruperupe mai te mau tamarii atoa ia tâuˈa-anaˈe-hia ratou, e o te reira te hinaaro o Iehova ia horoa ˈtu tatou i te here e te tauturu atoa ta tatou e nehenehe.—Salamo 10:14.

[Nota i raro i te api]