Te faatia ra te feia poro i te Basileia

Te haapii nei te hoê taata patoi i mutaa iho, i te parau mau

E RAVE rahi ohipa tei faatiahia i roto i te mau parau apî no nia i te tamaˈi tivila i tupu i Liberia. Tau ahuru tausani taata tei pohe, e hau atu â tei hopoi-ê-hia. Noa ˈtu teie mau ati, te tamau noa nei te feia mafatu haavare ore i te farii i te parau mau, mai ta te aamu i muri nei e faataa ra.

Mai te 10raa mai â o to ˈna matahiti, ua haapiihia o James i roto i te Ekalesia Lutero. I muri aˈe i to ˈna riroraa mai ei taata nenei i te hoê vea faaroo, ua faaohipa aˈera oia i to ˈna tiaraa no te papai i te mau tumu parau o te faahapa ra i te mau Ite no Iehova. Ua papai oia noa ˈtu e aita roa ˈtu oia i farerei aˈenei i te hoê o ratou.

I muri iho, ua faaea o James i te papai i te vea faaroo, e ua riro mai oia ei fatu hotela manuïa. I te hoê mahana, te parahi ra oia i te vahi fariiraa taata o ta ˈna hotela, ua haere atura e piti tuahine faaeta maitai e farerei ia ˈna. I to ˈna iteraa i to raua huru faaahuraa au maitai, ua titau atura oia ia raua ia tomo mai. I to raua râ faataaraa i te tumu o to raua tere, ua parau oia e, “Mea rahi roa ta ˈu ohipa, eita ta ˈu e nehenehe e paraparau.” Ua pûpû atura na tuahine Ite i te mau tamatahitiraa i te mau vea o Te Pare Tiairaa e te A ara mai na!, e ua farii oia no to ˈna noa hinaaro e ia reva raua. Ua tae mai te mau vea 12 avaˈe i te maoro i ǒ na ra, ua tuu râ oia i te reira i roto i te hoê pute uraina ma te ore e iriti i to ratou puohu.

I te mea hoi e te tupu ra te hoê tamaˈi tivila, ua tuu aˈera o James i te moni e te mau taoˈa faufaa i roto i te hoê pute no te horo i te tapao matamua o te aroraa. I te hoê poipoi, ua paaina te hoê ofai haapurara i muri mai i te opani i muri, e ua haru maira oia ma te riaria i ta ˈna pute e horo atura e imi i te ora. Ua tia ia ˈna e i te mau tausani tivila e horo ê ra ia na roto atu e rave rahi vahi hiˈopoaraa. I reira, e pinepine te mau tivila hapa ore i te eiâhia e i te haapohehia aita hoi e tumu.

I te vahi hiˈopoaraa matamua, ua uiuihia o James e ua faauehia ˈtura oia ia tatara i ta ˈna pute. I to ˈna tatararaa, ua hiˈo atura oia i roto e ua maere roa oia. Ua horuhoru roa oia i to ˈna iteraa e te pute ta ˈna i rave mai, e ere ïa te pute e to roto ta ˈna mau taoˈa faufaa. Ma te riaria uˈana, ua haru mai oia i te pute to roto te mau vea atoa o Te Pare Tiairaa e te A ara mai na! aita i tatarahia te puohu. Teie râ, i to te faehau iteraa i te mau vea e to ˈna taioraa i to ˈna iˈoa i nia i te titeti, ua na ô atura oia e: “Ah, e Ite no Iehova oe. Aita matou e imi ra ia outou, ua ite matou e eita outou e haavare.” I muri aˈe i to ˈna iritiraa mai i te tahi mau vea i rapaeau i te pute, ua parau atura te faehau ia James ia haere i mua.

Ua tupu atoa te reira i na vahi hiˈopoaraa taa ê e iva, no te mea ua manaˈo te mau tomana atoa e e Ite no Iehova o James e ua tuu atura ratou ia ˈna ia haere ma te ore e rave ino ia ˈna. Ua mauruuru o James i teie nei e aita oia i rave mai i ta ˈna mau taoˈa faufaa no te mau mea o ta ˈna i ite mai nei, ahiri e e, ua haapohe-atoa-hia paha ïa oia no ta ˈna mau taoˈa.

I to ˈna taeraa ˈtu i te vahi hiˈopoaraa hopea e te riaria roa ˈˈe, ua huru ê roa oia i te iteraa e rave rahi tino pohe i raro. No to ˈna hoi riaria, ua tiaoro atura oia i te iˈoa o Iehova. Ua pure oia e mai te peu e e tauturu mai te Atua ia ˈna i roto i teie vahi pohe, e tavini ïa oia ia ˈna e tae noa ˈtu i te hopea.

Ua faaite atura o James i ta ˈna pute i te mau faehau, e i reira faahou ua na ô ratou e: “Aita matou e imi ra i teie mau huru taata.” Ua na ô faahou ratou ma te huri tia ˈtu ia ˈna ra: “Te faaea ra hoê o to oe mau taeae i raro i teie aivi. A haere ia ˈna ra.” Mai reira mai, ua taui roa te manaˈo o James no nia i te mau Ite. Ua haere oioi atura oia e farerei i te taeae, e ua ravehia ˈtura te mau faanahoraa no te faatere i te hoê haapiiraa Bibilia i nia i te buka ra E nehenehe oe e ora e a muri noa ˈtu i roto i te paradaiso i nia i te fenua nei.a

Tau mahana i muri iho, ua faahepo te hoê aroraa ia ˈna ia faarue mai i taua vahi ra. I taua taime ra, ua horo o James i roto i te uruaihere ma te haru noa mai i ta ˈna buka ra E ora e a muri noa ˈtu! I te roaraa 11 avaˈe a taa ê ai oia e te mau Ite, ua haapii oia i ta ˈna buka e pae taime. I to ˈna neheneheraa i te pae hopea e hoˈi i te oire, ua haapii faahou oia i te Bibilia e te mau Ite e ua haere oioi oia i mua. Tau taime noa i muri iho, ua bapetizohia ˈtura oia, e te tavini ra oia i teie nei ma te haapao maitai e to ˈna mau taeae i te pae varua.

[Nota i raro i te api]