‘Na vai i tuu atu i te paari i roto i te mau ata ra?’

“IA ITE outou i te hoê ata i te tupuraa i te mau pae tooa o te râ ra, e oioi outou i te na ô ai e, ‘E ûahia,’ e oia mau atura hoi. E ia farara mai te mataˈi maraamu ra, e na ô outou, ‘E riro i te veavea,’ e tupu atura te reira.” Teie mau parau a Iesu, i papaihia e te papai evanelia ra o Luka, e mau hiˈoraa ïa no te mau faaiteraa atea no nia i te huru o te ahuaraˈi mai tei ravehia na i Paletetina tahito ra. (Luka 12:54, 55, MN) I roto vetahi mau tupuraa, e nehenehe te mau taata i mutaa ihora e taa i te mau tapao e e tohu i te mau tohuraa poto papu.

I teie mahana, te faaohipa nei te feia hiˈopoa meteo i te mau mauhaa aravihi, mai te mau taoˈa peeutari, te mau radio hiˈohiˈo Doppler, e te mau matini roro uira puai mau, no te hiˈopoa i te hohoˈa o te ahuaraˈi i nia i te mau tau roa ˈˈe. E pinepine râ teie mau tohuraa i te hape. Eaha te tumu?

E rave rahi mau mea o te haafifi nei i te tohu atea-papu-raa o te ahuaraˈi. Ei hiˈoraa, e nehenehe te mau tauiraa manaˈo-ore-hia o te anuvera, te haumi, te teiaha o te reva, e te puai e te aveia o te mataˈi e faarahi roa ˈtu â i te fifi. Apitihia mai i te reira te ohiparaa fifi roa te tahi i nia i te tahi o te mahana, te mau ata, te mau moana, o tei ore â e taa-maitai-hia ra e te mau aivanaa. No te reira tumu, i vai noa ˈi te tohu-atea-raa i te ahuaraˈi i vai noa ˈi ei ite aivanaa tano ore.

Te faahaamanaˈo maira te ite taotiahia o te taata no nia i te ahuaraˈi i te mau uiuiraa i uihia ˈtu ia Ioba ra: “Na vai te hau nei i fanau? No to vai ra opu te vai-paari? . . . E tae anei [t]e reo i nia roa i te ata ra; e moe ihora oe i te hoê maa pape rahi i nia iho ia oe? . . . Na vai i tuu atu i te paari i roto ra? e na vai i horoa ˈtu i te haapao maitai i te aau; e hope ia vai te mau ata ia taio i to ˈna paari? e manii ia vai te mau hue o te raˈi ra?”—Ioba 38:28-37.

Teie te pahonoraa i teie mau uiraa atoa oia hoi, E ere na te taata, na te Atua ra o Iehova râ. Oia, noa ˈtu e ere te paari o te taata nei i te mea ino roa, mea hau aˈe roa ˈtu te paari o to tatou Poiete. E ohipa here mau teie no ǒ mai ia ˈna ra i te faanahoraa oia e ia noaa to ˈna paari ia tatou i roto i te mau api o te Bibilia a nehenehe atu ai to tatou haerea e manuïa.—Maseli 5:1, 2.