Te turu nei te faanahonahoraa a Iehova i ta outou taviniraa

“Hiˈo atura vau i te hoê melahi i te maueraa na ropu i te reva nei: ma te evanelia e tia i te vairaa ra ei pororaa.”—APOKALUPO 14:6.

1. Nafea to te mau Ite no Iehova tamataraahia, e no te aha ratou i ora mai ai?

NO TE aha e mea faufaa roa ia farii i te ohipa tururaa i te taviniraa kerisetiano a te faanahonahoraa a Iehova i nia i te raˈi? Oia mau, e nehenehe anei ta te mau Ite no Iehova e rave i te pororaa i te parau apî maitai o te Basileia o te Atua i rotopu i te hoê ao patoi ahiri aita te tauturu a te mau nuu o te raˈi a Iehova? Ua rave te mau Ite i taua pororaa ra i te roaraa o te hoê senekele here aiˈa puai mau, e te mau faanahoraa politita haavî, te mau tamaˈi rahi, e te mau patoiraa rau. Ahiri aita te tauturu a Iehova, e nehenehe anei ta te mau Ite e ora mai i roto i te haafifiraa o te manaˈo ino e te pae tahi o te ao atoa nei, e mea pinepine, i te hamani-ino-raa uˈana i ravehia i nia ia ratou?—Salamo 34:7.

Te oraraa mai noa ˈtu te patoiraa a to te ao atoa nei

2. Eaha te faaauraa i rotopu i te mau Kerisetiano mau o te senekele matamua e o to tatou tau?

² I teie nei senekele 20, ua faaohipa te mau enemi, no te pae haapaoraa e politita atoa, i te mau huru haafifiraa atoa, tei au i te ture e te tahi atu â, no te tamata i te tapea aore ra te faaore i te ohipa a Iehova. Ua hamani-ino-hia te mau taeae e mau tuahine kerisetiano, ua parauhia te mau parau haavare no nia ia ratou, ua faainohia, e ua pari-haavare-hia ratou—e rave rahi tei taparahi-pohe-hia—mea pinepine roa o te mau upoo faatere haapaoraa no Babulonia Rahi te tumu. E nehenehe e parauhia, mai te mau Kerisetiano matamua, e “i tena na pǔpǔ, ua faainohia ïa e aita vahi toe, ua ite matou.” Mai te upoo faatere haapaoraa ati Iuda i te tau o te Mesia i aro puai na no te tapea i te taviniraa, na reira atoa te upoo faatere haapaoraa e te mau apotata, ma te tahoê atu i to ratou mau hoa politita, i te tamataraa i te faataupupu i te ohipa faaiteraa e haapiiraa rahi a te nunaa o Iehova.—Ohipa 28:22; Mataio 26:59, 65-67.

3. Eaha ta tatou e nehenehe e haapii mai na roto i te taiva ore o Henryka Żur?

³ A rave na ei hiˈoraa i te ohipa i tupu i Polonia i te 1 no Mati 1946. Ua apee o Henryka Żur, te hoê potii Ite 15 matahiti no te pae o Chelm, i te tahi atu Ite, te hoê taeae, no te haere e farerei i te feia anaanatae i te hoê oire rii fatata. Ua haruhia raua e te mau melo o te hoê pǔpǔ faehau Katolika o te Narodowe Siły Zbrojne (Nuu o te Nunaa). Mea ino roa to te taeae taparahiraahia, ua ora mai râ oia. O Henryka râ, aita ïa. Ua hamani-ino-hia oia ma te riaria mau ehia rahiraa hora a tamata noa ˈi ratou i te faahepo ia ˈna ia tohu i te tapao Katolika o te satauro. Ua parau hoê o ta ˈna feia hamani ino e: “A tiaturi oe i ta oe e hinaaro, a tohu noa i te tapao Katolika o te satauro. Eita anaˈe e ofai pupuhi te tiai mai ia oe!” Ua haaparuparu anei oia i roto i to ˈna taiva ore? Aita. Ua arato aˈera te feia haapaoraa faahua ia ˈna i roto i te hoê ururaau fatata e ua pupuhi aˈera ia ˈna. Noa ˈtu râ, ua upootia oia! Aita ratou i manuïa i te ofatiraa i to ˈna taiva ore.a—Roma 8:35-39.

4. Nafea to te feia politita e te feia haapaoraa tamataraa i te faaore i te ohipa pororaa i te Basileia?

⁴ Hau atu i te hoê hanere matahiti to te mau tavini o te Atua no teie nei tau apî hamani-ino-raahia ma te faatura ore. No te mea e ere te mau Ite no Iehova i to te mau haapaoraa rahi a Satani, e eita iho â ratou e hinaaro i te reira, te hiˈohia ra ratou mai te hoê tapao tano maitai no te feia faaino pae tahi aore ra te feia patoi uˈana. Ua aro-puai-hia ratou e te feia politita. Ua hamani-ino-hia te mau Ite e rave rahi no to ratou faaroo. Tae noa ˈtu tei parauhia e mau faatereraa hau manahune tei tamata i te haafifi i te pororaa i te parau apî maitai. I te matahiti 1917 aˈena ra, i Kanada e i te mau Hau Amui no Marite, ua rave te mau upoo faatere haapaoraa i te mau pariraa i te orure hau i te Feia Haapii Bibilia, mai tei matauhia te mau Ite. Ua tapea-hape-hia te feia toroa a te Taiete Watch Tower i te fare tapearaa, i muri iho noa râ i faaorehia ˈi te mau pariraa.—Apokalupo 11:7-9; 12:17.

5. Eaha te mau parau i riro ei faaitoitoraa i te mau tavini a Iehova?

⁵ Ua faaohipa o Satani i te mau ravea atoa e vai ra ia ˈna ra no te tamata i te tapea i te ohipa faaiteraa a te mau taeae o te Mesia e to ratou hoa taiva ore. Teie râ, mai ta te mau tupuraa e rave rahi e faaite ra, eita te mau haamǎtaˈuraa, te mau faariariaraa, te haavîraa uˈana, te fare tapearaa, te mau aua haavîraa, tae noa ˈtu te pohe, e haamamû i te mau Ite no Iehova. E te reira noa iho â te huru i te mau tau atoa. Ma te tuutuu ore, ua riro noa te mau parau a Elisaia ei faaitoitoraa: “Eiaha e mǎtaˈu, e rahi to tatou e iti to ratou.” Te hoê tumu, te mea ïa e e hemo roa te mau pǔpǔ a te Diabolo i te mau melahi haapao maitai!—Te mau arii 2, 6:16; Ohipa 5:27-32, 41, 42.

E haamaitai Iehova i te pororaa itoito

6, 7. (a) Eaha te mau tutavaraa oioi i ravehia no te poro i te parau apî maitai? (b) Eaha te tauiraa i riro ei haamaitairaa i tupu i te matahiti 1943 ra?

⁶ I te roaraa o te senekele 20, ua faaohipa te mau Ite no Iehova i te mau ravea aravihi e rave rahi no te faaaano e te faaoioi i te ohipa faaiteraa rahi hou te hopea e tae mai ai. I te matahiti 1914 ra, ua avari o Orometua Russell, te peretiteni matamua o te Watch Tower Bible and Tract Society, i te faaohiparaa oioi i te mau hohoˈa e te mau hohoˈa taviri, i apiti-maite-hia e te hoê paraparauraa niuhia i nia i te Bibilia i haruharuhia i nia i te mau pehe, i roto i te hoê hohoˈa teata Bibilia e vau hora te maoro parauhia “Te Hohoˈa-Darama o te Poieteraa.” Ua maere roa te feia mataitai i roto i te mau fenua e rave rahi i taua tau ra. I muri aˈe, i te mau matahiti 1930 e 1940, ua haamata aˈera te mau Ite i te matauhia no ta ratou pororaa i tera e tera fare e ta ratou mau matini faataˈi pehe, e faaohipa ra i te mau oreroraa parau Bibilia i haruharuhia tei vauvauhia e J. F. Rutherford, te piti o te peretiteni o te Taiete.

⁷ I te matahiti 1943 ra, ua ravehia te hoê taahiraa avae mǎtaˈu ore i raro aˈe i te faatereraa a Nathan H. Knorr, te toru o te peretiteni o te Taiete, ia faaotihia e haamau i te hoê haapiiraa no te mau tavini i roto i te mau amuiraa atoa. E haapiihia ïa te mau Ite i te poro e te haapii i tera e tera fare ma te ore e faaohipa i te mau pehe. Mai reira mai, ua faanahohia te tahi atu â mau haapiiraa no te mau mitionare, te mau tavini ma te taime taatoa, te mau matahiapo o te mau amuiraa, e te mau tiaau haapao i te mau amaa a te Taiete Watch Tower. Eaha te mau faahopearaa i noaa mai?

8. Nafea to te mau Ite faaiteraa i te faaroo rahi i te matahiti 1943 ra?

⁸ I te matahiti 1943 ra, i ropu i te Piti o te Tamaˈi Rahi, 129 000 anaˈe Ite e itoito ra i roto e 54 fenua. Teie râ, te tiaturi ra ratou e e tupu roa te Mataio 24:14 hou te hopea e tae mai ai e te hinaaro mau ra ratou i te reira. Ua papu ia ratou e e rave iho â Iehova e ia porohia te poroi faaararaa faufaa na mua ˈˈe i te anairaa o te mau tupuraa o te hopoi mai i te hopea o te faanahoraa viivii o te mau mea. (Mataio 24:21; Apokalupo 16:16; 19:11-16, 19-21; 20:1-3) Ua haamaitaihia anei ta ratou mau tutavaraa?

9. Eaha te mau tupuraa e faaite ra e ua ruperupehia te ohipa faaiteraa?

⁹ I teie nei, te vai ra 13 fenua ua hau atu i te 100 000 Ite itoito i ǒ ratou taitahi. Te tahi i roto ia ratou e mau fenua to te Ekalesia Katolika te rahiraa. Teie râ, a hiˈo na i to ratou huru. Fatata e 450 000 feia poro i te parau apî maitai i Beresilia, e ua hau atu i te 1 200 000 taata tei amui atu i roto i te oroa Haamanaˈoraa i te pohe o te Mesia i te matahiti 1997 ra. Te vai atoa ra te hiˈoraa o Mexiko, fatata e 500 000 Ite e hau atu i te 1 600 000 taata i tae atu i te oroa Haamanaˈoraa. Te tahi atu â mau fenua Katolika, o Italia ïa (fatata e 225 000 Ite), o Farani (fatata 125 000), o Paniora (hau atu i te 105 000), e o Raparata (hau atu i te 115 000). I te mau Hau Amui no Marite, i reira e rahi ai to te mau haapaoraa Porotetani, Katolika, e ati Iuda, fatata e 975 000 Ite e ua hau atu i te 2 000 000 tei amui atu i roto i te oroa Haamanaˈoraa. Papu maitai, e nahoa taata rahi teie e haere mai nei i rapae ia Babulonia Rahi, te hau emepera o te haapaoraa hape na te ao nei, e ta ˈna mau haapiiraa e au i te aai e e fariu mai nei i nia i te mau tǎpǔ ohie e te papu a te Atua no te mau “raˈi apî e te fenua apî.”—Petero 2, 3:13; Isaia 2:3, 4; 65:17; Apokalupo 18:4, 5; 21:1-4.

Faatanoraa i nia i te mau hinaaro o te taata

10. Nafea te tau i taui ai i te tahi mau vahi?

¹⁰ Te rahiraa o te feia i fariu mai i nia ia Iehova na roto ia Iesu Mesia, mea itehia mai ïa i tera e tera fare. (Ioane 3:16; Ohipa 20:20) Ua faaohipahia râ te tahi atu â mau ravea. Ua taui te tau, e no te mau huru tupuraa i te pae faanavairaa faufaa, e rave rahi vahine e rave nei i te ohipa i rapaeau i te fare i teie nei. Mea pinepine roa, i roto i te hebedoma, mea iti roa te taata e nehenehe e farereihia i te fare. No reira te mau Ite no Iehova i faatano ai i nia i teie huru tupuraa. Mai ia Iesu e ta ˈna mau pǐpǐ matamua, e haere ratou i te vahi e te taime e nehenehe ai te taata e farereihia.—Mataio 5:1, 2; 9:35; Mareko 6:34; 10:1; Ohipa 2:14; 17:16, 17.

11. Ihea te mau Ite no Iehova e poro ai i teie mahana, e eaha te faahopearaa?

¹¹ Te haamata ra te mau Ite i te poro ma te ara maitai i te mau taata i nia i te mau tapearaa pereoo rahi, te mau anairaa fare toa rahi, te mau fare hamaniraa tauihaa, te mau piha ohipa e imiraa faufaa, te mau fare haapiiraa, te mau aua mutoi, te mau titoraa mori, te mau hotela e te mau fare tamaaraa, e i roto i te mau aroâ. Oia mau, e poro ratou i te mau vahi atoa e nehenehe te taata e farereihia. E mai te peu e tei te fare te taata, e haere noa atoa ïa te mau Ite e farerei ia ratou i ǒ. Te faahopearaa o teie huru raveraa tauiui e te ohie ia faaohipa, te maraaraa ïa o te opereraa i te mau papai Bibilia. Te itehia maira te feia e au i te mamoe. Te haamatahia ra te mau haapiiraa Bibilia apî. Te ravehia ra te ohipa haapiiraa rahi roa ˈˈe o te aamu o te taata, ma te itoito e na tavini aau tae mau hau atu i te pae mirioni e te afa! Te fanaˈo ra anei oe i te haamaitairaa e riro ei hoê o ratou?—Korinetia 2, 2:14-17; 3:5, 6.

Eaha te turai ra i te mau Ite no Iehova?

12. (a) Nafea Iehova e haapii ai i to ˈna nunaa? (b) Eaha te faahopearaa ta teie haapiiraa i faatupu?

¹² Eaha ta te faanahonahoraa i nia i te raˈi e ohipa e teie atoa nei mau mea? Ua tohu o Isaia e: “E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra.” (Isaia 54:13) Te haapii ra Iehova i teie fetii taeae tahoê no te ao atoa nei na roto i ta ˈna faanahonahoraa iteahia i nia i te fenua—i roto i te mau Piha no te Basileia, te mau tairururaa e te mau rururaa. E faatupu te reira i te tahoêraa e te hau. Ua horoa mai te haapiiraa a Iehova i te hoê nunaa taa ê, i haapiihia ia here te tahi i te tahi e i to ratou taata-tupu mai ia ratou ihora, eiaha ia riri i to ratou taata-tupu, noa ˈtu ihea ratou e ora ˈi i roto i teie nei ao amahamaha e te faatupu i te amahamaha.—Mataio 22:36-40.

13. Nafea tatou e papu ai e te aratai atoa ra te mau melahi i te ohipa pororaa?

¹³ Na te here e turai i te mau Ite no Iehova ia tamau noa i te poro noa ˈtu te anaanatae ore o te taata e te hamani-ino-raa. (Korinetia 1, 13:1-8) Ua ite ratou e te faaterehia maira ta ratou ohipa faaoraraa taata mai nia mai i te raˈi, mai ta te Apokalupo 14:6 e parau ra. Eaha te poroi e porohia ra i raro aˈe i te aratairaa a te mau melahi? “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra: e haamori outou ia ˈna, tei hamani i te raˈi, e te fenua, e te tai, e te mau pape pihaa ra.” E faateitei te pororaa i te parau apî maitai o te Basileia i te iˈoa o Iehova. Te titauhia ra te taata ia faahanahana i te Poiete, oia te Atua, eiaha râ te mau mea ora e te haapiiraa matapo e mea tupu noa mai te mau mea. E no te aha e mea ru mau te ohipa pororaa? No te mea ua tae mai te hora faautuaraa—faautuaraa ia Babulonia Rahi e te mau tuhaa atoa o te faanahoraa iteahia o te mau mea a Satani.—Apokalupo 14:7; 18:8-10.

14. O vai teie e rave nei i teie ohipa haapiiraa rahi?

¹⁴ Aita hoê aˈe Kerisetiano pûpûhia i haapaehia i te ohipa pororaa. Na te mau matahiapo i te pae varua e aratai i te pororaa e te amuiraa. Te ohipa maitai ra te mau pionie i faaineine-maitai-hia i roto i te pororaa. Te haaparare ra te feia poro itoito i te poroi o te Basileia na te mau vahi atoa o te fenua nei, noa ˈtu e e nehenehe ratou e poro i te tahi noa aore ra e rave rahi hora i te avaˈe.—Mataio 28:19, 20; Hebera 13:7, 17.

15. Eaha te hoê tapao e ua ohipa te pororaa a te mau Ite no Iehova?

¹⁵ Ua ohipa anei teie mau tutavaraa atoa i nia i te ao nei? Hoê noa haapapuraa e oia, te rahiraa ïa o te mau taime i faahitihia ˈi te mau Ite no Iehova i roto i te mau porotarama afata teata e i roto i te mau vea. E haapapu pinepine te reira i to tatou onoonoraa e to tatou hinaaro mau ia farereihia te mau taata atoa. Inaha, e ohipa hohonu to tatou itoito e to tatou ite-tamau-raahia i nia i te taata, noa ˈtu e te patoi nei te rahiraa o te taata i te poroi e te feia poro!

To tatou itoito no te faanavai i te faaiteraa

16. Eaha te huru feruriraa e tia ia faaitehia i teie nei i roto i te taime poto e toe nei?

¹⁶ Aita tatou i ite ehia â roaraa taime i vaiihohia no teie faanahoraa o te mau mea, eita atoa iho â tatou e hinaaro e ite a maitai noa ˈi to tatou manaˈo i roto i te taviniraa ia Iehova. (Mataio 24:36; Korinetia 1, 13:1-3) Ua ite râ tatou e ia nehenehe te here, te puai, e te parau-tia a Iehova ia faaitehia, e tia ia “na mua” te parau apî maitai i te porohia. (Mareko 13:10, MN) No reira, noa ˈtu ehia rahiraa matahiti to tatou tiai-ru-noa-raa i te hopea o teie ao iino, te parau-tia ore, e te uˈana, e tia ia tatou ia ora ma te itoito ia au i to tatou pûpûraa e ia au i to tatou huru. Peneiaˈe mea paari aˈe tatou aore ra mea maˈimaˈi, e nehenehe noa râ tatou e tavini ia Iehova ma te itoito o ta tatou i fanaˈo i to tatou apî-rii-raa aore ra maitai-aˈe-raa. Peneiaˈe eita ta tatou e nehenehe faahou e horoa i te hoê â taime i roto i te taviniraa e i mutaa iho, e nehenehe mau râ tatou e atuatu i te maitai o ta tatou tusia arueraa ia Iehova.—Hebera 13:15.

17. A faatia i te hoê aamu faaitoito o te nehenehe e tauturu ia tatou paatoa.

¹⁷ No reira, e mea apî aore ra e mea paari tatou, e faaite anaˈe i te itoito e e tufa anaˈe i ta tatou poroi oaoa no te hoê ao apî na te feia atoa ta tatou e farerei. E riro anaˈe mai te tamahine iti mamahu e hitu matahiti no Auteralia tei haere e to ˈna mama i te fare toa. Ua faaroo oia i te Piha no te Basileia e mea faufaa roa no te taatoaraa ia poro, no reira oia i tuu ai e piti vea iti i roto i ta ˈna pute. A ohipa ˈi to ˈna mama i te pae hooraa tauihaa, ua moe aˈera te tamahine iti ra. Ia imi to ˈna mama ia ˈna, e inaha te pûpû ra oia i te hoê vea iti na te hoê vahine! Ua haafatata ˈtura te mama e parau atura eiaha oia ia inoino mai te peu e ua faahuehue ta ˈna tamahine i te vahine ra. Ua farii maitai râ te vahine ra i te vea iti. Ia vai mai te mama raua anaˈe ta ˈna tamahine, ua ani atura oia ia ˈna nafea te noaaraa mai ia ˈna te itoito no te haafatata ˈtu i te hoê taata matau ore. “Ua parau noa vau, Tahi, Rua, Toru, Fa! E haere atura vau!”

18. Nafea tatou e nehenehe ai e faaite i te hoê huru feruriraa faahiahia mau?

¹⁸ E hinaaro paatoa tatou i te hoê huru feruriraa mai to taua tamahine iti no Auteralia ra, no te haafatata ˈtu iho â râ i te feia matau ore aore ra i te feia toroa e te parau apî maitai. Peneiaˈe te mǎtaˈu ra tatou i te patoiraa. Eiaha tatou ia haamoe i ta Iesu i parau: “Eiaha e tapitapi i te parau ei faatiaraa ia outou iho, e te huru o ta outou parau ia parau atu: na te [v]arua [moˈa] hoi e haapii mai ia outou i te parau e tia ia parau atu i reira ra.”—Luka 12:11, 12.

19. Eaha to outou manaˈo i ta outou taviniraa?

¹⁹ No reira a tiaturi i te tauturu a te varua o te Atua ia haafatata ˈtu outou i te taata ma te huru maitai e te parau apî maitai. Te tiaturi nei te mau mirioni taata i te mau tane e mau vahine mea pinepine eita e tia ia tiaturihia o te vai ra i teie mahana e ananahi ra aita faahou. E tiaturi tatou ia Iehova e ta ˈna faanahonahoraa i nia i te raˈi—o Iesu Mesia, te mau melahi moˈa, e te mau Kerisetiano faatavaihia i faatiahia—o te ora noa e a muri noa ˈtu! No reira, a haamanaˈo na e: “E rahi to tatou e iti to ratou”!—Te mau arii 2, 6:16.

[Nota i raro i te api]

Nafea outou ia pahono?

◻ Eaha te ohipa i ravehia e te faanahonahoraa a te Atua i nia i te raˈi i roto i te faaoraraa mai i te nunaa a Iehova?

◻ O vai te feia politita e te feia haapaoraa i aro i te mau Ite no Iehova i te senekele 20 nei?

◻ Nafea to te mau Ite no Iehova faatanoraa i ta ratou taviniraa i nia i te mau hinaaro ia au i te anotau?

◻ Eaha te turai ra outou ia poro?

[Hohoˈa i te api 17]

Henryka Żur

[Hohoˈa i te api 18]

Tapone

Matinita

Hau Amui no Marite

Kenya

Hau Amui no Marite

E poro te mau Ite no Iehova i te mau taime e te mau vahi atoa e nehenehe te taata e farereihia

[Hohoˈa i te api 20]

Na mua ˈˈe i teie nei noâ senekele, ua faaohipahia te mau matini faataˈi pehe no te haaparare i te poroi o te Basileia