Te hoê Arii taoˈa rahi e te paari
E manaˈo anei outou e e oaoa outou ia rahi ta outou taoˈa? Ia horoa mai te hoê taata i te hoê tino moni rahi na outou, eita anei outou e oaoa? Oia mau paha. E nehenehe atoa outou e feruri nafea outou e faaohipa ˈi i te reira.
OIA mau, e rave rahi mau tauihaa ta outou e nehenehe e hoo mai no te haamaitai e te faaanaanatae atu â i te oraraa. E nehenehe atoa te moni e riro ei “haapuraa” ia tupu te mau fifi manaˈo-ore-hia, mai te maˈi aore ra te ereraa i te ohipa.—Koheleta 7:12.
Eaha râ te auraa i rotopu i te moni e te oaoa? Te manaˈo ra anei outou, mai te rahiraa, e e faatupu te taoˈa rahi i te oaoa? Mea fifi paha ia ite mai i te mau pahonoraa i teie mau uiraa no te mea e nehenehe noa te moni e faitohia, aore ra e numerahia, area te oaoa ra, eita ïa. Eita outou e nehenehe e tuu i te oaoa i nia i te hoê faito e e faito atu ai.
Oia atoa, e au ra e te oaoa nei te tahi feia taoˈa rahi, area vetahi ra, te peapea ra ïa. E parau mau atoa te reira no te feia veve. Noa ˈtu râ, te tiaturi nei â te rahiraa o te taata—tae noa ˈtu te feia mea rahi aˈena ta ratou taoˈa—e ia rahi atu â ta ratou moni e rahi atu â to ratou oaoa.
Te hoê taata i papai no nia i teie tumu parau, o te Arii Solomona ïa no Iseraela i tahito ra. Oia te hoê o te feia taoˈa rahi roa ˈˈe i ora aˈenei. E nehenehe outou e taio i te hoê faataaraa no nia i ta ˈna mau taoˈa e rave rahi i roto i te pene 10 o te buka o te Bibilia o Te mau arii 1. A tapao na, ei hiˈoraa, e te parau ra te irava 14 e: “E te teiaha o te auro i tae mai ia Solomona i te matahiti hoê, e ono ïa hanere e ono ahuru e ono tiahapa taleni auro.” E aifaito teie numera i te 25 tǎne auro. I teie mahana, e hau atu teie rahiraa auro i te 200 000 000 dala Marite!
Teie râ, e ere noa Solomona i te taata taoˈa rahi; ua haamaitaihia oia e te Atua i te paari. Te faatia ra te Bibilia e: “Hau ê atura te arii ra o Solomona i te taoˈa e te paari i te hui arii atoa o te ao nei. Ua imi maira to te mau fenua atoa ia Solomona, ia ite ratou i te paari i tuuhia mai e te Atua i roto i tana aau ra.” (Te mau arii 1, 10:23, 24) E nehenehe atoa tatou e faufaahia i te paari o Solomona, i te mea e e tuhaa atoa ta ˈna mau papai o te aamu Bibilia. E hiˈo anaˈe eaha ta ˈna i parau no nia i te auraa i rotopu i te taoˈa rahi e te oaoa.
[Faaiteraa i te fatu o te hohoˈa i te api 3]
No roto mai i te Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart