Te haamanaˈo-faahou-raa i te mau mahana hopea o Iesu i nia i te fenua nei

UA TAE i te hitu o te mahana o te avaˈe ati Iuda no Nisana i te matahiti 33 T.T. A feruri na e te mataitai ra outou i te mau ohipa e tupu ra i roto i te mataeinaa Roma no Iudea. Te faarue nei o Iesu Mesia e ta ˈna mau pǐpǐ ia Ieriko e to ˈna mau rauere heeuri, e te haere ra ratou ma te rohirohi na nia i te hoê purumu e puehu noa te repo e te tipuupuu. E rave rahi atu â feia ratere e haere atoa ra na nia i taua purumu ra i Ierusalema no te oroa Pasa o te matahiti. Teie râ, e ohipa ê atu tei roto i te feruriraa o te mau pǐpǐ a te Mesia i teie paiumaraa rohirohi mau.

Ua tiai na te mau ati Iuda i te hoê Mesia o te nehenehe e faatiamâ ia ratou i te zugo Roma. E rave rahi tei tiaturi e o Iesu no Nazareta taua Faaora ra tei tiai-maoro-hia na. Ua paraparau oia no nia i te Basileia o te Atua e toru matahiti e te afa te maoro. Ua faaora oia i te feia maˈi e ua faatamaa oia i te feia poia. Oia, ua tamahanahana oia i te mau taata. Teie râ, te riri nei te mau raatira faaroo i to Iesu faahapa-uˈana-raa ia ratou e te opua nei ratou e haapohe ia ˈna. Teie râ oia e haere vitiviti nei na nia i te purumu mǎrô i mua i ta ˈna mau pǐpǐ no te hoê tumu papu.—Mareko 10:32.

A topa noa ˈi te mahana i muri mai i te Mouˈa i Oliveta i mua mai, ua tapae o Iesu e to ˈna mau hoa i te oire no Betania, i reira ratou e faaea ˈi i na rui e ono i muri iho. I reira, na to ratou mau hoa herehia o Lazaro, o Maria, e o Mareta i farii mai ia ratou. Ua riro te po ei tamǎrûraa i te tere veavea e ei tapao o te haamataraa o te Sabati o te 8 no Nisana.—Ioane 12:1, 2.

9 no Nisana

I muri aˈe i te Sabati, ua î roa o Ierusalema i te ohipa. Ua haere ê na e mau tausani ratere i roto i te oire no te oroa Pasa. Te maniania râ o ta tatou e faaroo ra, e mea taa ê ïa i teie taime o te matahiti. Te haere vitiviti ra te mau nahoa taata hiˈopoa na nia i te mau aroâ ǒaǒa i te mau uputa o te oire. A faaô haere ai ratou na roto i te mau uputa tei apǐ hoi, te ite ra ratou i te hoê ohipa faahiahia! E rave rahi taata oaoa o te haere ra i raro i te Mouˈa i Oliveta na nia i te purumu mai Betephage mai. (Luka 19:37) Eaha ïa te auraa o teie mau mea atoa?

A hiˈo na! Te haere maira o Iesu no Nazareta na nia i te hoê fanauˈa asini. Te hohora ra te mau taata i te ahu i nia i te purumu i mua ia ˈna. Area vetahi ra, te tahirihiri ra ïa i te mau amaa tamara tei tâpûhia iho nei e te pii ra ratou ma te oaoa e: “Ia ora na te Arii o Iseraela o tei haere mai ma te iˈoa o [“Iehova,” MN].”—Ioane 12:12-15.

A fatata ˈi te nahoa ia Ierusalema, ua hiˈo atura o Iesu i te oire e ua putapû roa oia. Ua haamata ˈtura oia i te taˈi, e te faaroo ra tatou ia ˈna i te tohuraa e e haamouhia teie oire. I to Iesu taeraa ˈtu i te hiero i muri iti noa ˈˈe, ua haapii oia i te mau nahoa taata e ua faaora oia i te feia matapo e te hapepa o tei haere mai ia ˈna ra.—Mataio 21:14; Luka 19:41-44, 47.

Te mataitai noa maira te mau tahuˈa rahi e te mau papai parau. Auê ratou i te riri rahi e i to ratou iteraa i te mau ohipa faahiahia mau ta Iesu e rave ra e i te oaoa o te mau nahoa taata! Ma te ore e nehenehe e huna i to ratou inoino, te ani ra te mau Pharisea e: “E te orometua, e aˈo aˈe na oe i to mau pǐpǐ nei.” “Teie ta ˈu parau ia outou,” o ta Iesu ïa e pahono ra, “ia mamû noa ratou nei, ua pii noa mai ïa te mau ofai nei.” Hou oia e reva ˈi, te ite ra o Iesu i te mau ohipa tapihoo e ravehia ra i roto i te hiero.—Luka 19:39, 40; Mataio 21:15, 16; Mareko 11:11.

10 no Nisana

Ua tae o Iesu i te hiero i te aahiata. I te mahana na mua ˈtu, aita oia i nehenehe e rave i te tahi ohipa, ua inoino râ oia no te tapihooraa ino mau o te haamoriraa a to ˈna Metua, te Atua ra o Iehova. No reira ma te itoito rahi, te haamata ra oia i te tiahi i te feia e hoo mai e e hoo atu i roto i te hiero. I muri iho, te faatahuri ra oia i te mau iri a te feia hoo moni nounou e te mau parahiraa a te feia hoo uupa ra. “Ua oti hoi i te papaihia e,” o ta Iesu ïa e parau ra, “E parauhia to ˈu fare e fare pureraa, faarirohia iho nei râ e outou ei ana no te eiâ haru.”—Mataio 21:12, 13.

Mea riri roa na te mau tahuˈa rahi, te mau papai parau, e te feia rahi i te mau ohipa e te haapiiraa a Iesu i mua i te taata. Auê ratou i te hinaaro rahi e haapohe ia ˈna! Na te nahoa râ e haafifi nei i ta ratou opuaraa, no te mea te maere ra te mau taata i te haapiiraa a Iesu e “te faaroo papu maite” noa ra ratou “ia ˈna.” (Luka 19:47, 48) Te fatata maira te po, te hoˈi ra o Iesu e to ˈna mau hoa ma te oaoa i Betania no te taoto.

11 no Nisana

I te poipoi roa, tei nia ê na o Iesu e ta ˈna mau pǐpǐ i te purumu e haere ra na te Mouˈa i Oliveta i Ierusalema. I to ratou tapaeraa ˈtu i te hiero, ua farerei oioi maira te mau tahuˈa rahi e te feia paari ia Iesu. Te haamanaˈo maitai noa ra ratou i te ohipa ta Iesu i rave i nia i te feia hoo moni e i te feia hoo taoˈa i roto i te hiero. Te ani ra to ˈna mau enemi ma te ino mau e: “O vai te tumu i teie nei mau mea ta oe e rave nei? e na vai i horoa mai i teie nei mana ia oe?” “E ui atoa vau ia outou i ta ˈu,” o ta Iesu ïa e pahono ra. “Ia faˈi mai outou ra, e faˈi atoa ˈtu vau ia outou i te tumu i ta ˈu nei mau mea e rave nei. Nohea te bapetizo a Ioane? no te raˈi mai anei; e na te taata anei?” Ua feruri ihora te feia patoi ratou iho: “Ia parau tatou, No te raˈi mai, e riro oia i te parau mai e, Eaha ihora outou i ore i faaroo atu ai ia ˈna? Ia parau râ tatou, Na te taata; te mǎtaˈu nei hoi tatou i te taata, te parau nei hoi te taata atoa e, e peropheta mau Ioane.” No te taa ore, ua pahono atura ratou ma te paruparu e: “Aore matou i ite.” Ua parau mǎrû atura o Iesu e: “E ore atoa vau e faaite atu ia outou i te tumu i rave ai au i teie nei mau mea.”—Mataio 21:23-27.

I teie nei, te tamata nei te mau enemi o Iesu i te faahapa ia ˈna na roto i te tahi parau ia nehenehe ratou e haru ia ˈna. “E mea au anei i te ture,” o ta ratou ïa e ani ra, “ia hopoi i te moni aufau na Kaisara, e aore anei?” “A faaite mai na i te moni aufau,” o ta Iesu ïa e pahono ra. Te ani ra oia e: “No vai teie nei hohoˈa e te parau?” “No Kaisara,” o ta ratou ïa e parau ra. Ma te faahaama ia ratou, te parau maitai ra o Iesu i te feia atoa e faaroo maira e: “E hopoi maori i ta Kaisara ia Kaisara ra, e ta te Atua ra, e hopoi â ïa i te Atua ra.”—Mataio 22:15-22.

Ma te haamamû i to ˈna mau enemi na roto i te mau haapapuraa o te ore e nehenehe e patoihia, te faaite puai nei o Iesu i teie nei i to ˈna au ore i mua i te mau nahoa taata e i ta ˈna mau pǐpǐ. A faaroo na ia ˈna i te faahaparaa ma te mǎtaˈu ore i te mau papai parau e i te mau Pharisea. “Eiaha râ outou e pee ia ratou,” o ta ˈna ïa e parau ra, “o te parau hoi ta ratou, aita râ i haapao.” Ma te mǎtaˈu ore, te faahiti ra oia i te mau ati i nia ia ratou, ma te faataa ia ratou mai te mau aratai matapo e te haavare. Te parau ra o Iesu e: “E te mau ophi e! e te mau fanauˈa ehidena e! Eaha outou e ora ˈi i te pohe ra i te [“Gehena,” MN]?”—Mataio 23:1-33.

I to ˈna faahitiraa i teie mau faahaparaa uˈana, e ere ïa te auraa e aita o Iesu i ite i te mau huru maitatai o vetahi. I muri iho, ua ite oia i te mau taata i te tuuraa i te moni i roto i te afata faufaa a te hiero. Auê te putapû e i te tuuraa te hoê vahine ivi taoˈa ore i ta ˈna moni taatoa i roto i te afata—e piti lepeta haihai roa! Ma te haapopou mahanahana, te haamatara ra o Iesu i te reira, inaha, mea rahi aˈe ta ˈna i tuu i ta te feia pueraa taoˈa “rahi roa ra.” No to ˈna aroha, te haafaufaa rahi nei o Iesu i te mau mea atoa ta te hoê taata e nehenehe e rave.—Luka 21:1-4.

I teie nei, te faarue nei o Iesu i te hiero no te taime hopea. Te paraparau ra vetahi mau pǐpǐ no nia i te nehenehe o te hiero, ua ‘faaunaunahia oia i te mau ofai maitatai e te taoˈa moˈa.’ Ua maere ratou i to Iesu pahonoraa ˈtu e: “Te fatata maira te tau e ore e vaiihohia ˈi te tahi ofai i nia iho i te tahi, e ore e toe ai i te hurihia i raro.” (Luka 21:5, 6) A apee noa ˈi te mau aposetolo ia Iesu i rapaeau i te oire tei apǐ, te uiui noa ra ratou e eaha te auraa o ta ˈna mau parau.

I muri iti noa ˈˈe, te parahi ra o Iesu e ta ˈna mau aposetolo e te fanaˈo ra i te hau e te maniania ore o te Mouˈa i Oliveta. A mataitai noa ˈi ratou i te nehenehe o Ierusalema e o te hiero, ua ani maira o Petero, o Iakobo, o Ioane, e o Anederea i te haamaramaramaraa no nia i te parau tohu maere a Iesu. Ua na ô ratou e: “E faaite mai oe ia matou i te tupuraa o taua mau mea nei? e te tapao o to oe [vairaa] mai e te hopea o [te faanahoraa o te mau mea]?”—Mataio 24:3; MN; Mareko 13:3, 4.

Ei pahonoraa, ua horoa te Orometua Rahi i te hoê parau tohu faahiahia mau. Ua tohu oia e e tupu te tamaˈi uˈana, te aueueraa fenua, te oˈe, e te maˈi pee. Ua tohu atoa o Iesu e e poro-haere-hia te parau apî maitai o te Basileia ati aˈe te fenua nei. Ua faaara oia e: “E ati rahi hoi tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu.”—Mataio 24:7, 14, 21; Luka 21:10, 11.

Ua faaroo maitai na aposetolo e maha a faataa ˈi o Iesu i te tahi atu mau tuhaa o ‘te tapao o to ˈna vairaa mai.’ Ua haamatara oia i te faufaaraa ia “ara.” No te aha? Te parau ra oia e: “Aore hoi outou i ite i te hora e tae mai ai to outou Fatu.”—Mataio 24:42; Mareko 13:33, 35, 37.

Ua riro te reira ei mahana o te ore e moehia e Iesu e ta ˈna mau aposetolo. Inaha, te reira te mahana hopea o te taviniraa a Iesu i mua i te taata hou oia e tapeahia ˈi, e haavahia ˈi, e e haapohehia ˈi. I te mea e te po ra, ua haamata ratou i te hoˈi na raro i Betania na nia i te aivi, e ere hoi i te mea atea.

12 e 13 no Nisana

Te parahi ra o Iesu ma te hau i te 12 no Nisana i pihai iho i ta ˈna mau pǐpǐ. Ua taa ia ˈna e te hinaaro uˈana ra te mau raatira faaroo i te haapohe ia ˈna, e aita oia e hinaaro ra e ia haafifi ratou i ta ˈna oroa Pasa i te po i muri iho. (Mareko 14:1, 2) I te mahana i muri iho, i te 13 no Nisana, te rohi nei te mau taata no te rave i te mau faaineineraa hopea no te oroa Pasa. I te omuaraa o te avatea, ua tono o Iesu ia Petero raua o Ioane no te faaineine i te oroa Pasa i Ierusalema no ratou i roto i te hoê piha i nia. (Mareko 14:12-16; Luka 22:8) Na mua iti noa ˈˈe i te toparaa mahana, ua farerei maira o Iesu e na aposetolo hoê ahuru ê atu ia raua i reira no ta ratou oroa Pasa hopea.

14 no Nisana, i muri aˈe i te toparaa mahana

Te hiti mǎrû noa maira te marama o te marumarupo i nia ia Ierusalema a hiti mai ai te atiraa avaˈe i nia i te Mouˈa i Oliveta. I roto i te hoê piha rahi tei atuatuhia, te tarava ra o Iesu e na 12 i te hoê airaa maa faaineinehia. “Hinaaro rahi roa to ˈu i te amu i teie nei pasa, o vau e outou atoa, a pohe atu ai au,” o ta ˈna ïa e parau ra. (Luka 22:14, 15) I muri iho, ua maere te mau aposetolo i to Iesu tiaraa mai i nia e to ˈna tuuraa i to ˈna ahu rapaeau i te hoê pae. Ua rave maira oia i te hoê tauera e te hoê farii pape, haamata ˈtura oia i te horoi i to ratou avae. Auê ïa haapiiraa e tavini ma te haehaa e ore e moehia!—Ioane 13:2-15.

Teie râ, ua ite o Iesu e ua faanaho aˈena te hoê o teie mau taata—o Iuda Isakariota—i te hoo ia ˈna i te mau raatira faaroo. Papu maitai e ua hepohepo roa oia. “E haavare mai te hoê o outou na ia ˈu,” o ta ˈna ïa e parau ra. Ua peapea roa te mau aposetolo i te reira. (Mataio 26:21, 22) I muri aˈe i te faatupuraa i te oroa Pasa, ua parau atura o Iesu ia Iuda e: “Ta oe e rave ra ia peepee i te rave.”—Ioane 13:27.

I to Iuda revaraa, ua faatupu atura o Iesu i te amuraa maa no te haamanaˈo i to ˈna pohe e fatata maira. Ua rave atura oia i te hoê pane faahopue-ore-hia, haamaitai atura na roto i te pure, vahi atura, e faaue atura i na 11 ia amu. “O tau tino teie,” o ta ˈna ïa i parau, “e horoahia na outou nei, e na reira outou ei manaˈoraa ia ˈu.” I muri iho, ua rave atura oia i te hoê aˈua uaina uteute. I muri aˈe i te haamaitairaa, ua horoa ˈtura oia i te aˈua ia ratou ra, ma te parau atu ia inu i te reira. Ua parau faahou o Iesu e: “O to ˈu ïa toto, e toto no te faufaa apî, i haamaniihia no te taata e rave rahi ia matara te hara.”—Luka 22:19, 20; Mataio 26:26-28.

I taua po faufaa ra, te horoa ra o Iesu i ta ˈna mau aposetolo haapao maitai e rave rahi mau haapiiraa faufaa, e i rotopu i te reira, te faufaaraa o te here autaeae. (Ioane 13:34, 35) Te haapapu ra oia ia ratou e e noaa ia ratou te hoê “tauturu, MN,” oia hoi te varua moˈa. E e faahaamanaˈo mai te reira ia ratou i te mau mea atoa ta ˈna i parau atu ia ratou. (Ioane 14:26) I muri iho i te po, papu maitai e ua faaitoito-rahi-hia ratou i to ratou faarooraa ia Iesu i te pureraa ma te tuutuu ore no ratou. (Ioane, pene 17) I muri aˈe i te himeneraa i te mau himene arueraa, ua faarue atura ratou i te piha i nia, e ua apee atura ia Iesu i rapae i te maororaa po haumǎrû.

Na te Peho no Kiderona ˈtu, ua haere atura o Iesu e ta ˈna mau aposetolo i te vahi auhia e ratou, te ô i Getesemane. (Ioane 18:1, 2) A tiai noa ˈi ta ˈna mau aposetolo, ua faaatea rii atu o Iesu no te pure. Aita e parau no te faataa i to ˈna hepohepo rahi i te pae o te mau manaˈo horuhoru a taparu ai oia ma te haavare ore i te Atua ia tauturu mai ia ˈna. (Luka 22:44) Ua riro te manaˈo e nehenehe to ˈna Metua here i nia i te raˈi e faahapahia mai te peu e e hiˈa oia, ei mea teimaha roa.

Aitâ i oti atura te pure a Iesu, ua tae maira o Iuda Isakariota e te hoê nahoa ma te ˈoˈe, te omore, e te mori. “E Rabi, ia ora na,” o ta Iuda ïa i parau, a hôˈi mǎrû noa ˈi oia ia Iesu. Tera hoi te tapao ia haru te mau taata ia Iesu. Ma te tupu taue, ua rave maira o Petero i ta ˈna ˈoˈe e tarai atura i te tariˈa o te tavini a te tahuˈa rahi. “A oomo i to ˈoˈe i roto i te vehî,” o ta Iesu ïa i parau a tapiri ai oia i te tariˈa o taua tavini ra. “O te rave hoi i te ˈoˈe ra, e pohe ïa i te ˈoˈe.”—Mataio 26:47-52.

Ua tupu oioi roa te mau mea atoa! Ua haruhia e ua ruruuhia o Iesu. No to ratou mǎtaˈu e te taa ore, ua faarue maira te mau aposetolo i to ratou Fatu e horo atura. Ua afaihia ˈtura o Iesu i ǒ Ana ra, te tahuˈa rahi tahito. I muri iho, ua afaihia oia ia Kaiapha ra, te tahuˈa rahi i taua taime ra, ia haavahia oia. I te aahiata, ua pari haavare te Sunederi ia Iesu i te parau faaino. I muri iho, ua afai o Kaiapha ia ˈna i mua i te tavana Roma ra o Ponotio Pilato. Ua afai atura oia ia Iesu i mua ia Heroda Anetipa, te tia faatere o Galilea. Ua tâhitohito maira o Heroda e ta ˈna mau tiai ia Iesu. I muri iho, ua faahoˈihia maira oia ia Pilato ra. Ua haapapu o Pilato e aita ta Iesu e hara. Ua faahepo râ te mau raatira faaroo ati Iuda ia ˈna ia faautua ia Iesu i te utua pohe. I muri aˈe i to ˈna hamani-ino-rahi-raahia na roto i te parau e i te pae tino, ua afaihia ˈtura o Iesu i Golagota, i reira to ˈna patitiraahia ma te aroha ore i nia i te hoê pou haamauiuiraa e to ˈna faarururaa i te hoê pohe mauiui.—Mareko 14:50–15:39; Luka 23:4-25.

Ahiri e ua faahope roa te pohe o Iesu i to ˈna oraraa, e tupu ïa te hoê ati rahi roa ˈˈe i roto i te aamu. Auaa râ, e ere mai te reira. I te 16 no Nisana 33 T.T., ua maere ta ˈna mau pǐpǐ i te iteraa e ua faatiahia mai oia mai te pohe mai. I muri iho, hau atu i te 500 taata tei ite mata roa ˈtu e ua faaora-faahou-hia mai o Iesu. E 40 mahana i muri aˈe i to ˈna tia-faahou-raa, ua ite te hoê pǔpǔ pǐpǐ haapao maitai ia ˈna i te revaraa i nia i te raˈi.—Ohipa 1:9-11; Korinetia 1, 15:3-8.

Te oraraa o Iesu e o outou

Nafea te reira ia ohipa i nia ia outou—i nia mau â ia tatou paatoa? Te faahanahana ra te taviniraa, te poheraa, e te tia-faahou-raa o Iesu i te Atua ra o Iehova, e e mea faufaa roa no te tupuraa o Ta ˈna opuaraa rahi. (Kolosa 1:18-20) E mea faufaa te reira no tatou, ia nehenehe ta tatou mau hara ia faaorehia na roto i te tusia o Iesu, e ia fanaˈo i te hoê taairaa piri roa e te Atua ra o Iehova.—Ioane 14:6; Ioane 1, 2:1, 2.

E ohipa atoa te reira i nia i te feia pohe. Ua iriti te tia-faahou-raa o Iesu i te ravea no te faahoˈi mai ia ratou i te ora i roto i te Paradaiso i nia i te fenua nei tei tǎpǔhia mai e te Atua. (Luka 23:39-43; Korinetia 1, 15:20-22) Mai te peu e te hinaaro ra outou e ite hau atu â no nia i teie mau tumu parau, te titau manihini atu nei matou ia outou ia haere i te oroa Haamanaˈoraa o te poheraa o te Mesia i te 11 no Eperera 1998, i te hoê Piha no te Basileia a te mau Ite no Iehova i to outou vahi.

[Tumu parau tarenihia i te api 6]

“Ei ana no te eiâ haru”

UA TANO roa o Iesu i te parauraa e ua faariro taua feia hoo taoˈa nounou ra i te hiero o te Atua “ei ana no te eiâ haru.” (Mataio 21:12, 13) No te aufau i te tute o te hiero, ua tia i te mau ati Iuda e i te mau peroseluto no te tahi atu mau fenua ia taui i ta ratou moni ê no te moni e fariihia. I roto i ta ˈna buka ra Te oraraa e te tau o Iesu te Mesia (Beretane), te faataa ra o Alfred Edersheim e mea matauhia e e faanaho na te feia hoo moni i ta ratou mau ohipa tapihoo i roto i te mau mataeinaa i te 15 no AdaraEzera 6:15, hoê avaˈe na mua ˈˈe i te oroa Pasa. I te omuaraa o te 25 no Adara, e haere na ratou i roto i te hiero i Ierusalema no te taviri i te rahiraa ati Iuda e te mau peroseluto ia apîhia ratou. Ua hoonahia te feia hoo taoˈa, ma te rave i te moni taime i nia i te mau moni atoa tei tauihia. I to Iesu parauraa e e feia eiâ ratou, e tapao faaite ïa e mea rahi roa ta ratou moni taime e rave, inaha, e taviri atoa na ratou i te moni a te feia veve.

Aita vetahi i nehenehe e afai mai i ta ratou iho mau animala no te tusia. Area te taata o te afai mai i ta ˈna ra, ua tia ïa ia ˈna ia afai i te animala i te hoê taata hiˈopoa i te hiero—no te hoê moni taime. I te mea e aita ratou i hinaaro e ia faaruehia te hoê animala i muri aˈe i te afai-atea-raahia mai oia, e rave rahi tei hoo mai i te hoê animala tei “fariihia” e te mau ati Levi a te feia hoo taoˈa iino i te hiero. “E rave rahi feia veve tei eiâhia i reira,” o ta te hoê taata ite ïa e parau ra.

Te vai ra te haapapuraa e ua nounou te tahuˈa rahi tahito ra o Ana e to ˈna utuafare i te feia hoo taoˈa i te hiero. Te faahiti ra te mau papai Rabi i te parau o “te mau Ohipa hoo tauturu a te mau tamaiti a Ana [i te hiero].” Te moni a te feia hoo moni ra e i noaa mai na roto i te mau animala i hoohia i roto i te hiero, o ta ratou ïa imiraa moni matamua. Te parau ra te hoê taata ite e ua tiahi o Iesu i te feia hoo taoˈa “eiaha noa no te toroa o te mau tahuˈa, no ta ratou atoa râ imiraa moni.” Noa ˈtu eaha te tumu, ua hinaaro mau â to ˈna mau enemi e haapohe ia ˈna!—Luka 19:45-48.

[Tapura i te api 4]

Te mau mahana hopea o te oraraa taata o Iesu

Nisana 33 T.T. Tupuraa Taata rahi roa ˈˈe*

Mahana maa Sabati (Monire 6 no Eperera 1998) 101, par. 4

Sabati 16 Ua faatiahia mai o Iesu 128

* Te mau numera i ǒ nei, o te mau pene ïa i roto i te buka ra Te taata rahi roa ˈˈe i ora aˈenei. Te vai ra te hoê tabula o te mau faahororaa huˈahuˈa a te mau Papai no nia i te taviniraa hopea a Iesu, i roto i te buka ra “Toute Écriture est inspirée de Dieu et utile,” mau api 277-278. Ua neneihia teie mau buka e te Watchtower Bible and Tract Society of New York, Inc.