Arisetareho—Te hoê hoa taiva ore

O ARISETAREHO te hoê o te mau hoa ohipa e rave rahi o te nehenehe e tiaturihia e te aposetolo Paulo. Eaha ta outou e manaˈo ia faaroo anaˈe outou i to ˈna iˈoa? Aita hoê aˈe mea? E nehenehe anei ta outou e faaite mai e eaha te tuhaa ta ˈna i hauti i roto i te aamu o te mau Kerisetiano matamua? Noa ˈtu e e ere o Arisetareho i te hoê o te feia o te Bibilia o ta tatou i matau roa ˈˈe, ua apiti atoa râ oia i roto e rave rahi mau ohipa i tupu, o tei faatiahia i roto i te mau Papai Heleni Kerisetiano.

No reira, o vai o Arisetareho? Eaha to ˈna taairaa e o Paulo? No te aha e nehenehe ai e parau e e hoa taiva ore o Arisetareho? E eaha te mau haapiiraa ta tatou e nehenehe e huti mai na roto i te hiˈopoaraa i to ˈna hiˈoraa?

I te taime atâta mau i faahitihia ˈi o Arisetareho i roto i te aamu o te buka a te mau Ohipa, te tutuô ra e te arepurepu ra te nahoa taata maamaa i te oire no Ephesia. (Ohipa 19:23-41) Te hamaniraa i te mau hiero rii ario no te ruahine hape ra o Diana, e ohipa hoona ïa no Demeterio e no te tahi atu feia tupai ario no Ephesia. No reira, i te turairaa te ohipa pororaa a Paulo i roto i te oire e rave rahi taata ia faarue i te haamoriraa viivii a taua ruahine ra, ua faahuehue o Demeterio i te tahi atu feia toroa. Ua parau atu oia ia ratou e aita noa te pororaa a Paulo e haamǎtaˈu ra i ta ratou mau faufaa, e riro atoa râ te reira i te faaore i te haamoriraa a Diana.

No te mea aita ratou i ite ia Paulo, ua arato atura te nahoa tei riri i to ˈna mau hoa ra o Arisetareho e o Gaio i roto i te fare apooraa. I te mea hoi e te fifi rahi ra raua, ua taparu atura te mau hoa o Paulo ia ˈna e “eiaha oia e tomo noa ˈtu i roto i taua fare apooraa ra.”

A feruri na e tei roto outou i taua huru tupuraa ra. E piti hora to te nahoa maamaa tutuô-noa-raa e, “E mana rahi to Diana i Ephesia.” Papu maitai e ua riro to raua tapearaahia e taua nahoa maamaa ra ma te ore e nehenehe e paraparau no te paruru ia raua, ei tamataraa riaria mau no Arisetareho e no Gaio. Ua uiui paha raua e e ora mai anei raua. Auaa râ e oia. Oia mau, ia au i te faatiaraa oraora a Luka, ua manaˈo vetahi feia ite e ua faaohipa oia i te mau faaiteraa a te feia i ite mata roa i te ohipa i tupu, peneiaˈe ta Arisetareho e ta Gaio iho.

Ua faahau atura te papai parau o te oire i te faahuehueraa. Ua riro mau â ïa ei tamǎrû rahi no Arisetareho e no Gaio i to raua faarooraa ia ˈna i te fariiraa ma te tano i to raua hapa ore e i to raua iteraa i muri iho e ua hau te faahuehueraa.

Eaha to outou huru i muri aˈe i te hoê ohipa mai teie te huru? E faaoti anei outou e eita outou e maiti i te riro ei hoa mitionare no Paulo, e mea atâta roa, e mea maitai aˈe ia imi outou i te hoê oraraa hau aˈe? Aita o Arisetareho i manaˈo mai te reira! No Tesalonia oia, peneiaˈe ua ite aˈena oia i te mau fifi e tupu ia faaite haere i te parau apî maitai. I to Paulo pororaa i roto i to ˈna oire tau matahiti noa na mua ˈtu, ua tupu atoa te faahuehueraa i reira. (Ohipa 17:1-9; 20:4) Ua turu noa o Arisetareho ma te taiva ore ia Paulo.

Mai Heleni atu i Ierusalema

Tau avaˈe i muri iho i te faahuehueraa te feia tupai ario, tei Heleni o Paulo e te fatata ra oia i te fano i Suria e i Ierusalema i muri iho, ua “moemoe ihora te ati Iuda ia ˈna.” (Ohipa 20:2, 3) O vai to pihai iho ia Paulo i roto i teie huru tupuraa atâta? O Arisetareho!

No teie fifi apî, ua tia ïa ia Paulo, ia Arisetareho, e i to raua mau hoa ia taui i te mau opuaraa, ia fano na mua i Makedonia, e ia tapae na te pae fenua i Asia Iti hou a fano roa ˈtu ai i Phoinikia i Patara. (Ohipa 20:4, 5, 13-15; 21:1-3) Te tumu o teie tere, no te opereraa ïa i te mau ô a te mau Kerisetiano no Makedonia e no Ahaia na to ratou mau taeae riirii i Ierusalema. (Ohipa 24:17; Roma 15:25, 26) E rave rahi roa taata tei tere amui, peneiaˈe ua faaue e rave rau mau amuiraa ia ratou ia rave i teie hopoia. Papu maitai e e rahi aˈe atoa te parururaa i te mea e mea rahi ratou.

E haamaitairaa rahi ta Arisetareho e apee ia Paulo mai Heleni atu i Ierusalema. Tera râ, e fano raua i muri iho mai Iudea e tae noa ˈtu i Roma.

Te tere i Roma

I teie taime, mea taa ê rii te mau huru tupuraa. Ua tapeahia na o Paulo i Kaisarea e piti matahiti, ua ani oia e haere i mua ia Kaisara, e ua tonohia oia i Roma ei mau auri. (Ohipa 24:27; 25:11, 12) A tamata na i te feruri i te huru o te mau hoa o Paulo. E mea roa te tere mai Kaisarea ˈtu i Roma e mea hepohepo atoa aita i papuhia e eaha te faahopearaa. O vai te nehenehe e haere na muri iho ia ˈna no te turu e no te tauturu ia ˈna? Ua maitihia e piti taata aore ra na raua iho i hinaaro. O Arisetareho ïa e o Luka, te taata i papai i te mau Ohipa.—Ohipa 27:1, 2.

Mea nafea to Luka e to Arisetareho neheneheraa e tere na nia i te hoê â pahi i te tuhaa matamua o te tere i Roma? Te na ô ra te taata tuatapapa aamu ra o Giuseppe Ricciotti e: “Ua tere mai raua ei mau horopatete taa ê . . . aore ra, peneiaˈe, auaa hoi e mea maitai te raatira hanere o tei haavarevare noa i te faariro ia raua ei mau tavini no Paulo, i te mea e e faatia na te ture ia tauturuhia te hoê taata huiraatira Roma e e piti tavini.” Auê o Paulo i te faaitoitohia i to raua vairaa mai i pihai iho ia ˈna e ta raua tauturu!

Ua faaite o Luka e o Arisetareho i to raua here no Paulo noa ˈtu e e nehenehe raua e fifihia. Inaha, ua farerei raua i te hoê tupuraa atâta mau, e to raua hoa i tapeahia, i te parariraa to ratou pahi i nia i te motu no Melita.—Ohipa 27:13–28:1.

Te “hoa tapea-atoa-hia” o Paulo

I to Paulo papairaa i ta ˈna mau rata i to Kolosa e to Philemona i te mau matahiti 60-61 T.T. ra, tei pihai iho noâ o Arisetareho e o Luka ia ˈna i Roma. Ua faahitihia o Arisetareho e o Epaphera mai te ‘mau hoa tapea-atoa-hia’ o Paulo. (Kolosa 4:10, 14; Philemona 23, 24) E au ra e no te hoê area taime, ua tapea-atoa-hia o Arisetareho na muri iho ia Paulo.

Noa ˈtu e ua tapeahia o Paulo i Roma i te roaraa e piti aˈe matahiti, ua nehenehe oia e faaea i roto i to ˈna iho fare tarahu e te hoê faehau e tiai ia ˈna, i reira, ua nehenehe oia e faaite i te parau apî maitai i te feia e haere mai e hiˈo ia ˈna. (Ohipa 28:16, 30) Ua aupuru o Arisetareho, o Epaphera, o Luka, e vetahi atu ia Paulo, na roto i te tautururaa e te tururaa ia ˈna.

“Ei tauturu faaitoito”

I muri aˈe i te hiˈopoaraa i te mau ohipa taa ê i tupu, o ta Arisetareho i apiti atu i roto i te faatiaraa faauruahia a te Bibilia, mai te aha to ˈna huru? Ia au i te taata papai ra o W. D. Thomas, “ua riro [o Arisetareho] ei taata o te nehenehe e faaruru i te patoiraa e o te nehenehe e faaoromai ma te faaroo aueue ore e ta ˈna faaotiraa papu e tavini. Ua riro oia ei taata o tei here i te Atua eiaha noa i te mau mahana maitatai, ia hiti anaˈe mai te mahana i roto i te raˈi ninamu, i roto atoa râ i te mau faaoooraa e te vero.”

Te parau ra o Paulo e ua riro o Arisetareho e vetahi atu “ei tauturu faaitoito” (Heleni, pa·re·go·riʹa) no ˈna, oia hoi ei tamahanahanaraa. (Kolosa 4:10, 11, MN) No reira, na roto i te tamahanahanaraa e te faaitoitoraa ia Paulo, ua riro o Arisetareho ei hoa mau i te mau taime fifi. Ua riro te haereraa na muri iho i te aposetolo e te riroraa ei hoa no ˈna i te roaraa e rave rau matahiti, ei mea faahiahia e te faufaa roa i te pae varua.

Aita paha tatou e farerei ra i te mau huru tupuraa peapea mai tei faaruruhia e Arisetareho. Noa ˈtu râ, e mea faufaa roa taua huru taiva-ore-raa ra i te mau taeae pae varua o te Mesia e i te faanahonahoraa a Iehova, no te feia atoa i roto i te amuiraa kerisetiano i teie mahana. (A faaau e te Mataio 25:34-40.) Peneiaˈe e faaruru iho â te mau hoa haamori o ta tatou i matau i te ati aore ra te hepohepo, no te hevaraa paha, no te maˈi, aore ra no te tahi atu mau tamataraa. Na roto i te aupururaa ia ratou e te horoaraa ˈtu i te tauturu, te tamahanahanaraa, e te faaitoitoraa, e nehenehe tatou e ite i te oaoa e e haapapu e mau hoa taiva ore tatou.—A faaau e te Maseli 17:17; Ohipa 20:35.